كوللاجدى جاساعان زاۋرەش سماعۇل, «EQ»
قازىرگى گەوساياسي شيەلەنىس جاعدايىندا رەسەيگە قاتىستى سانكتسيالاردىڭ قايتالاما اسەرى قازاقستاننىڭ ەكونوميكالىق وسۋىنە اسەر ەتەتىنى جانە 2022 جىلى ينفلياتسيالىق قىسىمدى كۇشەيتەرى بەلگىلى. بۇل جاعداي جالعاسىپ جاتقان پاندەميامەن جانە الەۋمەتتىك شيەلەنىستىڭ كوبەيۋىمەن قاتار, ەلدىڭ ەكونوميكالىق دامۋىنا قاتىستى نەگىزگى بەلگىسىزدىكتى تۋدىرادى. وسىلايشا, حۆق 2022 جىلى قازاقستاننىڭ ءىجو-ءسىنىڭ ءوسۋى 2,3 پايىزعا دەيىن تومەندەيدى دەپ بولجايدى. حۆق ساراپشىلارى ۇزاق مەرزىمدى پەرسپەكتيۆادا ەكونوميكانىڭ تۇراقتى ءوسۋى ەكونوميكالىق ءارتاراپتاندىرۋدى جانە ونىڭ ىشىندە كليماتتىڭ وزگەرۋىنە بايلانىستى قاتاڭ شارالاردى قاجەت ەتەدى دەپ اتاپ ءوتتى.
حۆق-نىڭ پىكىرىنە قاراعاندا, سىرتقى تۇراقسىزدىق پەن ينفلياتسيالىق قىسىمنىڭ ارتۋىنا بايلانىستى ۇلتتىق بانك بازالىق مولشەرلەمەنى كوتەردى. بۇل قاجەت بولعان جاعدايدا اقشا-كرەديت ساياساتىن ودان ءارى قاتايتۋ مۇمكىندىگى تۋرالى بەرىلگەن سيگنال بولاتىن.
ينفلياتسيالىق قىسىم مەن فيسكالدىق ىنتالاندىرۋدى ەسكەرە وتىرىپ, حۆق ۇلتتىق بانكتىڭ اقشا-كرەديت ساياساتىن ورتاشا قاتاڭ جانە نەگىزدەلگەن دەپ باعالادى. ينفلياتسيا 2022 جىلعى اقپاندا, نەگىزىنەن, ازىق-ت ۇلىك باعاسىنىڭ ءوسۋى ەسەبىنەن 8,7 پايىزعا جەتتى. بۇل ۇلتتىق بانك بەلگىلەگەن 4-6 پايىز دالىزىنەن جوعارى. وسى رەتتە حۆق بولجامدارىنا سايكەس, 2022 جىلى ينفلياتسيا جوعارى بولادى. الايدا ورتا مەرزىمدى پەرسپەكتيۆادا ونىڭ 4 پايىز دەڭگەيىنە دەيىن تومەندەۋى كۇتىلەدى.
حۆق ۇلتتىق بانكتىڭ ينفلياتسيالىق تارگەتتەۋ ساياساتىنا قولداۋ ءبىلدىرىپ, ينفلياتسيالىق تارگەتتەۋدىڭ تولىققاندى رەجىمىنە كوشۋ, ترانسپارەنتتىلىكتى جاقسارتۋ, اقشا-كرەديت ساياساتىنىڭ تاۋەلسىزدىگىن جانە كوممۋنيكاتسيا تيىمدىلىگىن ارتتىرۋ, سونداي-اق ورتالىق بانكتىڭ تالدامالىق الەۋەتىن دامىتۋ جونىندەگى جۇمىستى وڭ باعالاعان. اتاپ ايتقاندا, حۆق اقشا-نەسيە ساياساتىنىڭ 2030 جىلعا دەيىنگى ستراتەگياسىن اتاپ ءوتتى, ونىڭ نەگىزگى مىندەتى – ينفلياتسيانى 2025 جىلعا قاراي تومەنىرەك دياپازونعا دەيىن اپارۋ. حۆق اقشا-نەسيە ساياساتى كوميتەتىن قۇرۋ, بازالىق مولشەرلەمە بويىنشا شەشىمدەردى اقپاراتتاندىرۋ جانە ءتۇسىندىرۋ, ۆاليۋتالىق وپەراتسيالاردى جاريالاۋ, سونداي-اق كونسۋلتاتسيالار مەن تەحنيكالىق كومەك تارتۋ اياسىندا حۆق-مەن تۇراقتى ەكىجاقتى ديالوگ اتالعان وڭ وزگەرىستەردىڭ نەگىزگى درايۆەرى بولىپ سانالاتىنىن جەتكىزدى.
حۆق ساراپشىلارى اقشا-كرەديت جانە سالىق-بيۋدجەت ساياساتىن ۇيلەستىرۋدى جاقسارتۋ ينفلياتسيانى تەجەۋگە دە ىقپال ەتەدى دەپ سانايدى. اسىرەسە تۇتىنۋشىلىق نەسيەنىڭ ەرەكشە قارقىنمەن ءوسىپ كەلە جاتقانىنا نازار اۋدارعان حالىقارالىق ساراپشىلار, قارجىلىق تۇراقتىلىقتى قامتاماسىز ەتۋ ءۇشىن قارجى نارىعىن قاداعالاۋ مەن رەتتەۋدى ودان ءارى كۇشەيتۋ كەرەك دەيدى.
