كوميتەت توراعاسى مۇحتار قۇل-مۇحاممەد بىرىككەن ۇلتتار ۇيىمى بارلىق ەلدەردى تولعاندىراتىن پروبلەمالارعا ءتيىمدى جاۋاپ بەرەتىن ەرەكشە ۇيىم ەكەنىن اتاپ ءوتتى.
«قازاقستان بۇۇ دب-نىڭ نۇر-سۇلتانداعى كەڭسەسىنىڭ اۋقىمدى ۇلەسىن جوعارى باعالايدى. ءبىز ىنتىماقتاستىقتى ودان ءارى نىعايتۋعا, اتاپ ايتقاندا, تاياۋداعى بەس جىلعا دامۋ ماقساتى اياسىندا بۇۇ-نىڭ ەلدىك ارىپتەستىك جونىندەگى جاڭا نەگىزدەمەلىك باعدارلاماسىن تابىستى جۇزەگە اسىرۋعا مۇددەلىمىز», دەدى سەناتور.
تاراپتار قازاقستان پارلامەنتىنىڭ ورنىقتى دامۋ ماقساتتارىن ىسكە اسىرۋداعى ءرولىن تالقىلادى. سەناتور قۇل-مۇحاممەد ۇلتتىق باعدارلامالاردىڭ 80%-ى ودم-عا سايكەس كەلتىرىلگەنىن, ياعني ەلىمىزدىڭ ستراتەگيالىق قۇجاتتارىنا كىرىكتىرىلگەنىن ايتتى. دەپۋتات بۇل قازاقستاندى الەمنىڭ دامۋىنا ءوز ۇلەسىن قوساتىن الەمدىك قوعامداستىقتىڭ اجىراماس بولىگى رەتىندە سيپاتتايتىنىن اتاپ ءوتتى.
مۇحتار قۇل-مۇحاممەد سونىمەن قاتار ەقىۇ پارلامەنتتىك اسسامبلەياسىنا قارار جوباسىن ازىرلەۋ جوسپارى تۋرالى ايتىپ بەردى. وندا ەقىۇ-عا مۇشە ەلدەردىڭ 2030 جىلعا دەيىنگى كەزەڭگە دامۋ سالاسىنداعى كۇن ءتارتىبى بويىنشا مىندەتتەمەلەردى ورىنداۋ جانە ورنىقتى دامۋ ماقساتتارىن ىسكە اسىرۋدىڭ ماڭىزى اتاپ وتىلەتىن بولادى.
ۆيتالي ۆرەميش ءوز كەزەگىندە ءبىزدىڭ ەلمەن ىنتىماقتاستىقتىڭ جوعارى دەڭگەيى مەن ۇلتتىق قۇجاتتاردىڭ ورنىقتى دامۋ ماقساتتارىنا كىرىكتىرىلگەنىن ايتا كەلىپ, ەل پرەزيدەنتى قاسىم-جومارت توقاەۆتىڭ بۇرىن ايتىلعان ساياسي باستامالارى بۇۇ-نىڭ ورنىقتى دامۋ سالاسىنداعى ىنتىماقتاستىق جونىندەگى نەگىزدەمەلىك باعدارلاماسىمەن سايكەس كەلەتىنىنە توقتالدى.
ءسوزىنىڭ سوڭىندا ول ادامنىڭ دامۋى مەن ونىڭ قۇقىقتارى, گەندەرلىك تەڭدىك جانە ەكولوگيالىق تۇراقتىلىق سياقتى تاقىرىپتاعى باعىتتاردى ىسكە اسىرۋدى كوزدەيتىن قارار جوباسىن بىرلەسىپ ازىرلەۋگە دايىن ەكەنىن ايتتى.
