فورۋم اياسىنداعى كەزدەسۋلەر

كەشە سەنات توراعاسى, ەقىۇ پارلا­مەنت­تىك اسسامبلەياسىنىڭ ۆيتسە-پرەزيدەنتى, ترانسازيالىق پارلامەنتتىك فورۋمى ۇيىمداستىرۋ كوميتەتىنىڭ توراعاسى قاسىم-جومارت توقاەۆ باستاعان قازاق­ستاندىق دەلەگاتسيا وسى فورۋمداعى دەلە­گاتسيا باسشىلارىمەن بىرقاتار كەزدەسۋلەر وتكىزدى, دەپ حابارلادى وسى پالاتانىڭ ءباسپاسوز قىزمەتى. اتاپ ايتقاندا, ق.توقاەۆ اۋعانستان يسلام رەسپۋبليكاسى پارلامەنتى ۆولۋسي دجيرگا (تومەنگى پالاتا) توراعاسىنىڭ ءبىرىنشى ورىنباسارى ميرۆايس ياسيني جانە اير مەشرانو دجيرگا (جوعارعى پالاتا) توراعاسىنىڭ ورىنباسارى ازيزۋللا ۋلفاتيمەن كەزدەستى. اۋعاندىق ارىپتەستەرىمەن كەزدەسۋ بارىسىندا قازاقستان پارلامەنتى سەنا­تىنىڭ توراعاسى قازاقستاننىڭ ەقىۇ-عا توراعالىق ەتۋى اياسىندا وتكىزىلىپ وتىرعان ترانسازيالىق فورۋمعا اۋعان دەلەگاتسيا­سىنىڭ قاتىسۋى شارانىڭ ەرەكشەلىگىن ارتتىرا ءتۇسىپ, بۇل ۇيىمنىڭ قىزمەت اياسى مەن تۇرپاتىن كەڭەيتەدى جانە الەم قوعامداستىعى پارلامەنتشى­لەرىنىڭ زور ىقىلاسىن تۋعىزادى دەپ اتاپ ءوتتى. – قازاقستان پارلامەنتىنىڭ سەناتى  اۋعانستان پارلامەنتىمەن كوپجاقتى ىنتىماقتاستىقتى كەڭەيتۋگە جانە تەرەڭ­دەتۋگە مۇددەلى, ەكى ەل پارلامەنتشىلەرىنىڭ اراسىنداعى ۇنقاتىسۋدىڭ كەلەشەگى زور, – دەدى ق.توقاەۆ. ول سونداي-اق, اۋعانستان ماسەلەلەرى تالقىعا سالىناتىن ەقىۇ ءسامميتىن  وتكىزۋدى قازاقستان ۇسىنىپ وتىرعانىن ەسكە سالدى. اۋعانستان يسلام رەسپۋبليكاسى ۆولۋ­سي دجيرگا توراعاسىنىڭ ءبىرىنشى ورىن­باسارى ميرۆايس ياسيني قازىرگى زاماننىڭ وزەكتى ماسەلەلەرى ءسوز بولاتىن  فورۋمعا اۋعان پارلامەنتشىلەرى شاقىرىلعانى ءۇشىن شىنايى العىسىن ءبىلدىردى. ول سونداي-اق اۋعانستانعا كورسەتىلىپ جاتقان كومەككە وراي قازاقستان باسشىلىعى مەن ونىڭ حالقىنا ريزاشىلىعىن جەتكىزدى. كەزدەسۋدەگى اڭگىمە بارىسىندا اۋعان جاعى يسلام ەلدەرىن اۋعانستاندى قالپىنا كەلتىرۋگە بەلسەندى اتسالىسۋعا شاقىردى. *  *  * قاسىم-جومارت توقاەۆ پاكستان سەنا­تى توراعاسىنىڭ ورىنباسارى مير دجان مۇحامماد حان دجاماليمەن كەزدەستى. قازاقستان سەناتىنىڭ باسشىسى پاكستاندىق ارىپتەسىن قازاقستان پار­لامەنتى جوعارعى پالاتاسىنىڭ قۇرىلىمى مەن قىزمەتى تۋرالى حاباردار ەتتى. ول الداعى جىلى قازاقستاننىڭ يسلام كونفەرەنتسياسى ۇيىمىنا توراعالىق ەتۋى ايماقتاعى كوپتەگەن وزەكتى ماسەلەلەردى تالقىلاۋعا مۇمكىندىك بەرەتىنىن ايتتى. اڭگىمە بارىسىندا پاكستاندىق پارلامەنتشىلەر قازاقستاننىڭ ەقىۇ-عا بەلسەندى جانە تابىستى توراعالىق ەتىپ كەلە جاتقانىن, ترانسازيالىق پارلامەنت­تىك فورۋمنىڭ كۇن تارتىبىندەگى ماسەلەلەر­دىڭ كوكەيكەستىلىگىن جانە شارانىڭ ۇيىمداستىرىلۋى جوعارى دەڭگەيدە ەكەنىن اتاپ ءوتتى. قازاقستان-پاكستان پارلامەنتارالىق بايلانىستارىن ودان ءارى دامىتۋ جانە ونى نىعايتۋ ماقساتىندا پاكستان سەناتى توراعاسىنىڭ ورىنباسارى قازاقستاندىق ارىپتەستەرىن پاكستان پارلامەنتىنە رەسمي ساپارمەن كەلۋگە شاقىردى. *  *  * قاسىم-جومارت توقاەۆ پەن رەسەي فەدەراتسياسى فەدەرالدى جينالىسى فەدە­را­تسيا كەڭەسى توراعاسىنىڭ ءبىرىنشى ورىن­باسارى, تمد پارلامەنتارالىق اسسام­بلەيا­سى دەلەگاتسياسىنىڭ فورۋمداعى باس­شى­سى الەكساندر تورشينمەن كەزدەسۋدە رەسەي­دىڭ فەدەرالدى جينالىسى فەدەراتسيا كە­ڭە­سىمەن پارلامەنتارالىق بايلانىستاردى كەڭەيتۋ تۋرالى ءسوز بولدى. اڭگىمەلەسۋشىلەر قازاقستاننىڭ ەقىۇ-داعى قارقىندى قىزمەتى, حا­لىق­ارالىق پارلامەنتتىك ۇيىم اياسىنداعى قازاقستاندىق جانە رەسەيلىك پارلامەنت­شىلەردىڭ ءوزارا تابىستى ءىس-قيمىلى مەن بىرلەسكەن ىستەرىنىڭ ودان ءارى ۇيلەسىمدى بولۋىنىڭ ماڭىزىن اتاپ ءوتتى.