وعان سايكەس بانكپەن جاسالعان مامىلەلەردى اياقتاۋ مەرزىمى تاعى ءۇش ايعا, 13 ساۋىردەن باستاپ 12 شىلدەگە دەيىن ۇزارتىلادى.
«بۇل كورسەتىلگەن كەزەڭ ىشىندە بانكتىڭ شتاتتىق رەجيمدە جۇمىس ىستەي بەرەتىنىن بىلدىرەدى. بانك كليەنتتەرىنە تەڭگەمەن جانە رۋبلمەن جۇرگىزىلەتىن تولەمدەر مەن اۋدارىم وپەراتسيالارى (سالىقتار, باج سالىقتارى, الەۋمەتتىك اۋدارىمدار) قانداي دا ءبىر شەكتەۋلەرسىز قولجەتىمدى بولادى», دەلىنگەن حابارلامادا.
بۇعان دەيىن OFAC-تىڭ رەسەيلىك «سبەربانك» جاق-قا جانە ونىڭ ەنشىلەس ۇيىمدارىنا قاتىستى ولاردى SDN-گە (Specially Designated Nationals) قوسۋدى كوزدەيتىن وقشاۋلاۋ سانكتسيالارىن ەنگىزەتىنى تۋرالى مالىمدەگەنىن ەسكە تۇسىرەمىز.
كورسەتىلگەن قارجى ۇيىمىمەن جانە ونىڭ باسقا دا ەنشىلەس قۇرىلىمدارىمەن وپەراتسيالار 2022 جىلعى 13 ساۋىرگە دەيىن اياقتالۋعا ءتيىس.
«تۇتاستاي العاندا, قازاقستان سبەربانكى قارجىلىق ورنىقتىلىقتى كورسەتىپ وتىر جانە سالىمدارعا, كرەديتتەرگە قىزمەت كورسەتۋدى, سونداي-اق اقشا قاراجاتىن قابىلداۋ جانە بەرۋدى قوسا العاندا, كليەنتتەر الدىنداعى ءوز مىندەتتەمەلەرىن ۋاقتىلى ورىنداۋدا. بانكتىڭ مىندەتتەمەلەرىن وتەۋ ءۇشىن وتىمدىلىكتىڭ جەتكىلىكتى كولەمىن جيناقتايتىن شامامەن 1,6 ترلن تەڭگە سوماداعى جوعارى ساپالى نەسيە پورتفەلى بار», دەلىنگەن مالىمدەمەدە.
قازىرگى تاڭدا قازاقستان سبەربانكىندە 400 ملرد تەڭگە مولشەرىندە كاپيتالدىڭ جەتكىلىكتى قورى بار.
وسىلايشا, بانكتىڭ قارجىلىق ورنىقتىلىعى نەگىزگى ۇيىمنىڭ قوسىمشا قولداۋىمەن بىرگە كليەنتتەردىڭ تولەمدەرى مەن اۋدارىمدارىنا ۇزدىكسىز قىزمەت كورسەتۋگە مۇمكىندىك بەرەدى.
بانك دەپوزيتتەرگە مىندەتتى كەپىلدىك بەرۋ جۇيەسىنىڭ قاتىسۋشىسى بولىپ تابىلادى, بۇل قازاقستان زاڭناماسىندا بەلگىلەنگەن ليميتتەر شەگىندە ازاماتتار قاراجاتىنىڭ ساقتالۋىن قامتاماسىز ەتەدى.
ءوز تاراپىنان, قر قارجى نارىعىن رەتتەۋ جانە دامىتۋ اگەنتتىگى بانك سەكتورىنداعى احۋالعا كۇندەلىكتى مونيتورينگتەۋدى جۇزەگە اسىرادى جانە, قاجەت بولعان جاعدايدا, سىرتقى ەكونوميكالىق تاۋەكەلدەردىڭ قارجى نارىعىنىڭ تۇراقتىلىعىنا اسەرىن السىرەتۋ ءۇشىن قاجەتتى شارالار قابىلدايدى.
