ايماقتار • 12 ءساۋىر، 2022

قولىنان كەلمەسە، تەندەرگە نەگە قاتىسادى؟

100 رەت كورسەتىلدى

جارىقتىق كۇن جادىراپ كەپ بەرگەندە، كوكتەم كەنشىلەر استاناسىنا ءاپ-ساتتە جەتىپ كەلدى. ناۋرىزدىڭ سوڭىن الا جاپالاقتاپ جاۋعان مول قار كۇرت ەرىدى دە، قارعىن سۋ ساي-سالانى قۋالاعانداي اسفالت جولدىڭ ۇستىمەن بوي بەرمەي اقتى. جاي عانا اققان جوق، ارزان ءاسفالتتى شايىپ، قالا كوشەلەرىندەگى كۇرە جولداردىڭ شات-شالەكەيىن شىعاردى...

مىنە، وسى ماسەلەنى مايشاممەن قاراعان جيىندا قاراعاندى قالاسىنىڭ اكىمى ەرماعانبەت بولەكپاەۆ جۇمىسىن ساپاسىز ىستەگەن مەردىگەردى، مىندەتىنە جاۋاپسىز قاراعان تەحنيكالىق قادا­عالاۋ قىزمەتىن قاتاڭ سىنعا الدى.

– جىلدا – وسىلاي! جۇمىس ىستەي الماساڭىزدار، نەگە تەندەرگە قاتى­ساسىزدار؟ قولدارىڭىزدان كەلمەسە، نارىقتان كەتىڭىزدەر، باسقالار بار، – دەپ ماسەلەنى توتەسىنەن قويدى قالا باسشىسى.

ە.بولەكپاەۆ ءوزىن تالاپشىل باسشى رەتىندە كورسەتىپ كەلە جاتقان اكىمنىڭ ءبىرى. جيىندا ول مىندەتىنە جاۋاپسىز قاراپ، سالعىرتتىققا جول بەرگەن تەحنيكالىق قاداعالاۋ ۇيىمدارى­نا قاتىستى سوت ءىسىن قوزعاۋ كەرەكتىگىن قا­تاڭ تۇردە تالاپ ەتتى. ال جۇمىسىن ءجۇردىم-باردىم ىستەگەن مەردىگەرلەر كەپىلدىك مىندەتتەمەلەرى اياسىندا اقاۋ­لاردى تۇزەيتىن بولادى.

مەردىگەرلەردىڭ دە ايتار ءۋاجى بار ەكەن. ولار تاسجولعا توسەلەتىن بيتۋمنىڭ جەرگىلىكتى كليمات جاع­دا­يىنا توتەپ بەرە المايتىن ساپاسىنا سىن ايتىپ، اقتالدى. ءداپ وسى جەردە مەردىگەر اقشا ۇنەمدەيمىن دەپ ساپاسىز ءارى ارزان بيتۋمدى ادەيى الدى ما دەگەن سۇراق تۋىندايدى. الدە بىزدە ساپالى بيتۋم ءوندىرىسى اتىمەن جوق پا؟

راسىندا دا، تەرەڭ زەرتتەپ، انىق­تايتىن ماسەلە. بيۋدجەتتىڭ قىرۋار قارجىسىن ارزان بيتۋممەن بىرگە سۋشا اعىزا بەرەتىن بولسا، مۇنداي سوراقى ىسكە قاساقانا بارعان مەردىگەرگە دەگەن اياۋشىلىق بولماۋى كەرەك.

جيىندا قالالىق كوممۋنالدىق شارۋاشىلىق، جولاۋشىلار كولىگى جانە اۆتوموبيل جولدارى ءبولىمىنىڭ باسشىسى مىندەتىن اتقارۋشى رۇستەم قوجاقاپانوۆ اسفالت جولدارى قار­عىن سۋدان كەيىن شۇرق تەسىك بولىپ شىعا كەلگەن كوشەلەردى سانامالاپ بەردى.

– قاراعاندىداعى ورتاق جول جە­لىسى 920 شاقىرىم بولادى. ونىڭ 104،1 شاقىرىمىنا كەپىلدىك قىزمەت كورسەتىلۋدە. بارلىعى 62 ۋچاسكەگە كەپىلدىك بەرىلگەن. بۇگىندە كوكتەمگى تەكسەرۋ جۇمىستارى باستالعانعا دەيىن الدىن الا 10 ۋچاسكەدە اقاۋ بار ەكەنى انىقتالدى، – دەپ مالىمدەدى ول.

جالپى، كەنشىلەر استاناسىندا اۆتوبۋس جۇرگىزۋشىلەرى كوپ شا­عىمداناتىن جولداردىڭ ءتىزىمى بار ەكەن. مۇنى اتقارۋشى بيلىك قالاداعى اۆتوپاركتەرمەن بىرلەسە وتىرىپ انىقتاپتى. «قارا تىزىمگە» ىلىككەن كوشەلەر قاتارىنا قازىبەك بي اتىنداعى اۋدانداعى ون، ءاليحان بوكەيحان اۋدانىنداعى 11 نىسان ەنگەن ەكەن. سونىمەن اتالعان جيىندا قالا اكىمىنىڭ قاھارىنا ۇشىراعان مەردىگەرلەر اۋا رايىنىڭ قولايعا جاققان كەزىندە وزدەرى جىبەرگەن كەم­شىلىكتەر مەن ولقىلىقتاردى جويىپ، اقاۋلاردى تۇزەۋگە كىرىسەتىن بولدى. ال وعان دەيىن ۋاقىتتى جوعالتپاي، ويدىم-ويدىم بولعان جولدارداعى ويىق پەن شۇڭقىرلاردى تاقتاتاسپەن بىتەپ، تەگىستەيدى.

وسى ورايدا جەرگىلىكتى تاكسي جۇر­گىزۋشىسى ايتقان مىنا اڭگىمە ەسكە تۇسەدى. قاراعاندىداعى اسفالت جولى ساپالى سالىنعان جالعىز كوشە بار ەكەن، ول – بۇرىنعى بەيبىتشىلىك گۇلزارى داڭعىلى. قىرعىن كولىككە دە، قارعىن سۋعا دا قىلى قيسايماپ­تى. سويتسە، ول تاسجول وسىدان بىرنە­شە جىل بۇرىن نەمىس تەحنيكاسىمەن نە­مىس تەحنولوگياسى بويىنشا توسەل­گەن ەكەن...

 

قاراعاندى

سوڭعى جاڭالىقتار

دوللار ارزاندادى

ەكونوميكا • بۇگىن، 16:52

قوسشىدا جاڭا مەكتەپ اشىلادى

ءبىلىم • بۇگىن، 16:25

ۇقساس جاڭالىقتار