وسى ماقتانۋ سەزىمىنەن, ماقتانگەرشىلىكتەن قاندايدا ءبىر پايدا كورە قويماعانىمىزدى ەسكەرەر ءتۇرىمىز جوق. ءىسىنىپ, كەبىنىپ, كۇپىنىپ ءالى باياعى ەسكى سارىندا ماقتانۋمەن كەلە جاتىرمىز. ال قازىرگى شاپشاڭ وزگەرىستەر كەزەڭىندە ماقتانۋدىڭ دا كريتەريلەرى وزگەرىپ كەتكەنىن باعامدار ەمەسپىز.
قولىمىزداعى بارىمىزدى, ۇلتىمىزدىڭ بارشا يگىلىگىن ايتىپ ماقتانۋدان باسقا قولىمىزدان ماردىمدى ءىس كەلە قويماعاندىقتان وزا شاپقان وزگە جۇرتقا قىزىعا, قىزعانا قاراپ, ولاردىڭ شىن ءدۇلدۇل ەكەنىن ىشتەي مويىندايمىز. بۇل ءوز كەزەگىندە جالعان ماقتاننىڭ «اۋىلىنىڭ» ماڭىنا مىقتاپ تۇسالعانىمىزدى اڭعارتسا كەرەك.
ماقتانۋ سەزىمىن تۋدىراتىن قۇندىلىقتاردىڭ زامانىنا ساي وزگەرىپ وتىراتىنىن ءومىردىڭ ءوزى كورسەتىپ بەرىپ وتىر. ماقتانسا اۋىل شارۋاشىلىعىنىڭ ونىمدەرى الەمدى جاۋلاپ العاندار, وزىق ءارى جاڭا تەحنولوگياسى ارقىلى باسەكەلەستەرىمەن جانتالاسا جارىسىپ, جاھاندى ءوز تاۋارلارىنا تەلمىرتىپ قويعاندار, عارىشتى مەڭگەرىپ, الەمنىڭ توبەسىنەن تونە جاتقان-تۇرعانىڭا دەيىن باقىلاپ, بار قۇپياڭدى ءبىلىپ وتىرعاندار, ءتىپتى مايدا-شۇيدە بۇيىمدارىن برەندكە اينالدىرىپ, قارا بازارىڭا ءامىرىن جۇرگىزىپ تۇرعاندار ماقتانسىن. مەيلى, وزىمىزدەن وق بويى وزىپ كەتكەندەردى قويا تۇرالىق.
وزىمىزبەن شامالاس, بىراق ودان-بۇدان قۇراپ, جوقتان بار جاساپ, ءتىپتى وزگەنىڭ جاسىعىن, قوقىسىن جالما-جان قاقشىپ الىپ, قاجەتتى بۇيىم, دۇنيە جاساپ, ونى پۇلداپ, ءوز بازارىن قىزدىرىپ وتىرعان ەلدەرگە دە ماقتانۋ جاراسادى. ال بىزدىكى نە ماقتان؟ «سولاردان ءبىزدىڭ قاي جەرىمىز كەم؟» دەگەن ساۋالعا شىنايى جاۋاپ تاباتىن ۋاقىت كەلدى عوي.
ەلىمىزدە ءوندىرىس سالاسىندا جىلت ەتكەن جاڭالىق بولسا قۋانىپ, ءبىر-بىرىمىزدەن ءسۇيىنشى سۇراپ, جەردەن جەتى قويان تاپقانداي «ويباي نە دەيسىڭ, ءبىزدىڭ ەلدە مىناداي بۇيىم شىعا باستاپتى, اناداي زات وزىمىزدە وندىرىلەتىن بولىپتى» دەپ جاتامىز. مۇنداي جاعىمدى حاباردى سۇيىنشىلەۋدىڭ استارىندا حالقىمىزدىڭ ۇلى تىلەگى – ءوز قولىمىز ءوز اۋزىمىزعا جەتسە, تەك شيكىزاتقا تاۋەلدى بولماي, ءوز ونەركاسىبىمىز وركەندەسە دەگەن تىلەگى جاتقانى ايتپاسا دا تۇسىنىكتى. مەملەكەت, اتقارۋشى بيلىك حالىقتىڭ كوكەيىن تەسكەن وسىناۋ تىلەكتى ورىنداۋعا تۇبەگەيلى بەكىنسە دەيسىڭ.
وسى ارادا ءبىر ايتا كەتەتىن جايت, قوعامدا «قازاقستاندا جاسالعان» دەپ جۇرگەن ونىمدەرگە قاتىستى كۇماندى ويلار جەتەرلىك. بۇيىمداعى جاپسىرما قاعازدا «قازاقستاندا جاسالعان» دەپ جازىلىپ قويعانىمەن ونىڭ ارعى جاعىندا ءبىر شيكىلىكتىڭ بارىن جۇرت بىلەدى. «وتىز جىل بويى حالىق تۇتىناتىن قاراپايىم ءبىر بۇيىمدى وزىمىزدە جاساي المادىق» دەگەن قوعامداعى اششى دا بولسا شىن پىكىردىڭ سالماعىن جەڭىلدەتۋ ءۇشىن «جاسامپازدىقپەن» ويلاپ تابىلعان – شەتەلدەردە جاسالعان بىرقاتار زات-بۇيىمعا «قازاقستاندا جاسالعان» دەگەن جازۋى بار جاپسىرمانى جەلىمدەپ قويۋ امالى اجەپتاۋىر ءورىس الدى. بىراق بۇل قيتۇرقىلىق پەن قۋلىقتى ەل-جۇرت بىلەدى. بىلگەندىكتەن الگىندەي كۇماندى ويلارعا بەرىلەدى. وسىنداي جاعىمسىز ۇردىستەن تۇبەگەيلى ارىلۋدىڭ ۋاقىتى كەلدى.
وتىرىكپەن دە ورگە باسۋعا بولادى دەگەن سوقىر سەنىممەن كۇن وتكىزۋ, ۋاقىت ۇتۋ, ءسويتىپ امالداپ جىلداردى جىلجىتۋ زامانى ءوتتى. وتىرىك ۋادەگە سەندىرۋ, ىقتيمال جارقىن بولاشاقتىڭ ەلەسىنە ەلجىرەتىپ, سونى اڭساتىپ ۇمىتتەندىرۋ, ىرعايداي مويىنىڭدى العا سوزدىرىپ جىنىكتىرۋ ادىستەرى ەندى الداۋ, ارباۋ قۇرالى بولا المايدى دەگەن ۇكىلى ءۇمىتىمىز الداماس دەيمىز.
جالعان ماقتانمەن رۋح, جان سەمىرتكەنمەن ۇلتتىڭ ەڭسەسى كوتەرىلمەيدى. كەلەشەكتە ۇرپاعىمىز وزگە كوشەلى جۇرتتىڭ كوشەسىن سىپىرىپ كەتپەسىن دەسەك, ەلىمىزدىڭ اسا جوعارى مۇمكىندىكتەرىن ءتيىمدى پايدالانىپ, ءوزىن ءوزى سىيلايتىن, قۇرمەتتەيتىن ەل سياقتى ۋاقىت تالابىنا ساي ءىس-ارەكەتتەرگە كوشۋ ماڭىزدى.
بايلىعىمىز – شيكىزاتىمىز تاۋسىلار, تاۋسىلماس, ماسەلە وندا ەمەس, ماسەلەنىڭ كوكەسى وزگەگە ەسە جىبەرۋدە, اقى جەگىزۋدە, نامىستى قولدان بەرىپ وتىرعانىمىزدا عوي. بۇگىن كۇلشەلى بالا بولعانىمىزبەن, ەرتەڭ استاڭ-كەستەڭى شىققان كەن ورىندارىنىڭ باسىندا مولا كۇزەتكەندەي بولىپ بەيشارا ازالى جانداي وتىرىپ قالمايىق. باستى قاۋىپ وسى.
