جولداۋدىڭ تۇرپاتى بولەك بولدى. قاڭتار وقيعاسىنىڭ جاي-جاپسارىن تاعى ءبىر تاپسىرلەپ بەردى. اۋدارا قاراپ, اقتارا تەكسەرىلەتىنىن تاعى ءبىر ءتۇيىپ ايتتى.
پرەزيدەنت قوعامداعى جۇيەنىڭ سەڭىن بۇزدى. جىلى اعىستىڭ ارناسىن اشتى. ەندىگى جەردە سايلاۋعا كۇندەلىكتى قاسىمىزدا جۇرگەن قاراپايىم زامانداستارىمىز بەلسەنە قاتىسىپ, تاڭداۋ جاسايتىن كۇن تۋماق. ەلدىڭ بولاشاعى ءۇشىن تەر توككىسى كەلەتىندەر جاڭا پارتيا قۇرامىن دەسە, كەدەرگى جويىلىپ, جول اشىلدى. وبلىس جانە رەسپۋبليكالىق ماڭىزى بار قالالاردىڭ ءماسليحاتتارىن ارالاس جۇيە بويىنشا سايلايدى.
مەملەكەت باسشىسى بيلىك پارتياسىنان كەتىپ, پرەزيدەنتكە شامادان ارتىق وكىلەت بەرۋدەن باس تارتىپ, اكىمدەر جەتەكشى پارتيا فيليالدارىن باسقارۋدى توقتاتۋ كەرەك دەپ ادىلدىك تۋىن بيىك كوتەردى. نەسىنە جاسىرايىق, بۇرىنعى جەتەكشى پارتيانى اكىمدەر باسقارعاسىن, ايدارىنان جەل ەستى. ەندى اتى دا, زاتى دا وزگەردى. دامۋدىڭ داڭعىل جولى وسىندايدان باستالسا كەرەك-ءتى.
جولداۋدا ەل تۇتقاسىنىڭ: «بۇقارالىق اقپارات قۇرالدارى باسەكەگە قابىلەتتى جانە ەركىن بولۋى كەرەك. بۇل قاعيدات قازىر كەز كەلگەن وركەنيەتتى ەل ءۇشىن ايرىقشا ماڭىزدى», – دەگەنى وتە ورىندى بولدى. اسىرەسە باق تۋرالى زاڭدى قايتا قاراۋ تۋرالى اتاپ كورسەتكەنى جاعىمدى جاڭالىق! سەبەبى بۇل زاڭ ەسكىردى. ارزاننىڭ سورپاسى تاتىمايتىن كۇيگە جەتتى. ۋاقىت تالابىنا ساي ەمەس.
جۇرەكتەن شىقپاسا, جۇرەككە جەتپەيدى دەگەندەي, پرەزيدەنت جولداۋىندا جان دۇنيەڭىزگە قوزعاۋ سالاتىن جۇرەكجاردى جولدار جەتكىلىكتى. ايتالىق: «مەن ازاماتتارىمىزدىڭ ەرتەڭ ەمەس, بۇگىن باقىتتى ءومىر سۇرگەنىن قالايمىن. ەڭ باستىسى – ەلىمىزدىڭ ەگەمەندىگى. شىن مانىندە, ءبىز ءۇشىن قازاقستاننىڭ تاۋەلسىزدىگى بارىنەن قىمبات. وسى تۇراقسىز, قۇبىلمالى الەمدە قازاقستانىمىز بىزدەن باسقا ەشكىمگە كەرەك ەمەس. سوندىقتان ماعان ەلىمنىڭ اماندىعى مەن جەرىمنىڭ تۇتاستىعىنان اسقان ەشبىر قۇندىلىق جوق», دەگەنىن تولقىماي قابىلداۋ مۇمكىن بە؟! بۇل ءار الاش پەرزەنتى ءۇشىن تاعدىرشەشتى اتالى ءسوز عوي! سەبەبى تۇسىنىكتى. تورتكىل دۇنيە داعدارىپ, تولقۋ ۇستىندە. الماعايىپ كەزەڭنىڭ سوڭى نەمەن بىتەتىنى بەلگىسىز. ەندەشە اركىم ءوز وتانىندا, ءوز جەرىندە بوس سوزدەن ىسكە كوشىپ, جۇمىلا كىرىسۋ مىندەت. مۇنى اركىم وزىنەن باستاۋ كەرەك. وسىنى سەزىنۋ ءبىر باسقا دا, سوعان ساي ءىس-ارەكەت جاساۋ ءبىر باسقا. بىزگە سوڭعىسى جەتپەي جاتىر.
پرەزيدەنتىمىز: «بىزگە ەشكىم سىرتتان كەلىپ, ەشتەڭە جاساپ بەرمەيتىنى انىق, ءبارى ءوز قولىمىزدا» دەگەنىن ەستەن شىعارماعانىمىز لازىم.
جانۇزاق ايازبەكوۆ,
حالىقارالىق «الاش» ادەبي سىيلىعىنىڭ لاۋرەاتى,
قازاقستان جازۋشىلار وداعى قوستاناي وبلىستىق فيليالىنىڭ ديرەكتورى
