ءبىرىنشى بولىپ ۋكراينا استاناسى كيەۆكە ەۋروپالىق كوميسسيانىڭ پرەزيدەنتى ۋرسۋلا فون دەر ليايەن كەلدى. ول بىرنەشە كۇن بۇرىن بۇكىل الەمدى ءدۇر سىلكىندىرگەن قازا بولعان بەيبىت تۇرعىنداردىڭ جانتۇرشىگەرلىك كورىنىسى تاراعان بۋچا قالاسىندا بولىپ, جاعدايدى ءوز كوزىمەن كورىپ قايتتى. ەۋروكوميسسيانىڭ باسشىسى رەسەي اسكەرىنىڭ سوعىس قىلمىسىنا بارعانىن ايتىپ, جاۋاپتىلار جازاعا تارتىلۋعا ءتيىس دەگەن پىكىرىن ايتتى. الايدا رەسەي بۋچاداعى قىرعىندى مويىنداعان جوق.
ەو شەنەۋنىكتەرى كەلەر كۇنى ۋكراينانىڭ شىعىسىندا رەسەي شابۋىلىنان قاشپاق بولعان بەيبىت تۇرعىندارعا تولى تەمىر جول ستانتسياسىنا تۇسكەن زىمىران سوققىسىنان كەم دەگەندە 50 ادام قازا تاۋىپ, جۇزگە جۋىق جولاۋشىنىڭ جاراقات العانىن حابارلادى. دونەتسك وبلىسىنىڭ كراماتورسك ۆوكزالىندا قالادان كەتۋگە جينالعان مىڭداعان تۇرعىن بولعان. لۋگانسك جانە دونەتسك وبلىستارىنىڭ تۇرعىندارىنا تەزىرەك ەۆاكۋاتسيا جاساۋ كەرەك دەگەن كەڭەستەن كەيىن ۆوكزالعا حالىق كوپ جينالعان. اقپاراتتاردا نىسانعا «توچكا-ۋ» زىمىرانىنىڭ قۇلاعانى تۋرالى ايتىلدى. بەيبىت تۇرعىنداردى اياۋسىز قىرعانى تۋرالى ۋكراينا باسشىلىعى تاققان ايىپتى رەسەي تاعى دا جوققا شىعارىپ وتىر. رەسەي پرەزيدەنتىنىڭ ءباسپاسوز حاتشىسى دميتري پەسكوۆ رەسەي قورعانىس مينيسترلىگىنىڭ مالىمدەمەسىنە سۇيەنۋدى ۇسىندى. بۇل مالىمەتتەر بويىنشا رەسەيدىڭ قارۋلى كۇشتەرى مۇنداي زىمىران ءتۇرىن قولدانبايتىنى, سونىمەن قاتار كراماتورسكىدە ول كۇنگە ەشقانداي اسكەري ءىس-قيمىل جوسپارلانباعانى ايتىلعان. الايدا رەسەيدىڭ بۇل مالىمدەمەسىنە حالىقارالىق قاۋىمداستىقتىڭ كوپشىلىگى كۇمانمەن قارايدى.
ەۋرووداق ەشقاشان ۋكراينا قۇرباندارىنىڭ ورنىن تولتىرا المايتىنىن ايتقان ۋرسۋلا فون دەر ليايەن ەلدىڭ ۇيىمعا مۇشەلىككە كىرۋ تۋرالى ءوتىنىشىن تەزدەتۋدى ۇسىندى.
ەۋروپالىق كوميسسيانىڭ باسشىسى ۋرسۋلا فون دەر ليايەن پرەزيدەنت ۆولوديمير زەلەنسكيگە ەۋرووداققا مۇشەلىككە ءوتۋدىڭ باستاپقى نۇكتەسى بولاتىن قۇجاتتى تاپسىرا وتىرىپ, بۇل شەشىمدى قابىلداۋ ادەتتەگىدەي جىلدارعا ەمەس, بىرنەشە اپتاعا سوزىلۋى مۇمكىن ەكەنىن اتاپ ءوتتى.
ەۋرووداقتىڭ جوعارى لاۋازىمدى تۇلعالارىنىڭ ءبىرى ۋرسۋلا فون دەر ليايەننىڭ بۇل ساپارى ۆ.زەلەنسكيگە مورالدىق تۇرعىدان قولداۋ عانا ەمەس, قارجىلاي كومەك تە كورسەتۋگە باعىتتالعان ەدى.
ەۋروپالىق كوميسسيا ۋكراينانى جانە سوعىستان قاشقان بوسقىنداردى قابىلدايتىن ەلدەردى قولداۋعا 1 ملرد ەۋرو بولۋگە ۋادە بەردى. اتاپ ايتقاندا, 600 ملن ەۋرو ۋكرايناعا, ەل بيلىگىنە جانە ءىشىنارا بىرىككەن ۇلتتار ۇيىمىنا بولىنەدى. ال 400 ملن ەۋرو قيىن كەزەڭدە اسا ۇلكەن جاۋاپكەرشىلىكپەن بوسقىنداردى قابىلداپ, كومەك قولىن سوزعان مەملەكەتتەرگە بەرىلەدى.
بۇۇ بوسقىندار جونىندەگى اگەنتتىگى جاريالاعان مالىمەتكە سايكەس رەسەيدىڭ ۋكرايناعا شابۋىلىنان بەرى 4 441 663 بوسقىن ەلدەن كەتكەن. ولاردىڭ 90 پايىزى ايەلدەر مەن بالالار ەكەنى بەلگىلى. حالىقارالىق كوشى-قون ۇيىمى ۋكراينا ىشىندە شامامەن 7,1 ميلليون ادام كوشىرىلگەنىن حابارلادى. بۇل كورسەتكىشتەر الدەقايدا جوعارى بولۋى مۇمكىن.
ەو وكىلدەرىنەن بولەك كيەۆكە ۇلىبريتانيا پرەمەر-ءمينيسترى بوريس دجونسون دا باردى. ول ۆولوديمير زەلەنسكيمەن كەزدەسىپ, ۋكراينا حالقى ءۇشىن قيىن كەزەڭدە قولداۋ بىلدىرەتىنىن اتاپ ءوتتى. ۇلىبريتانيا ۋكرايناعا اسكەري كومەك رەتىندە 120 برونەترانسپورتەر مەن كەمەگە قارسى كەشەندەردى جىبەرەدى. بۇل قارۋ-جاراق جۇما كۇنى جاريالانعان Starstreak زەنيتتىك زىمىراندارىنا, 800 تانككە قارسى باسقارىلاتىن زىمىراندارعا جانە جوعارى دالدىكتەگى باررەل سناريادتارىنا قوسىمشا جىبەرىلەدى. سونىمەن قاتار دجونسون ۋكرايناعا دۇنيەجۇزىلىك بانك جەلىسى بويىنشا 500 ملن دوللار كولەمىندە قوسىمشا نەسيەلىك كەپىلدىك بەرىلگەنىن حابارلادى.
ودان بولەك, لوندون «ۋكرايندار ءۇشىن ومىرلىك ماڭىزدى گۋمانيتارلىق قىزمەتتەردى ۇزدىكسىز كورسەتۋدى قامتاماسىز ەتۋ» ماقساتىندا ۋكراينا ۇكىمەتىنە وتەۋسىز كومەك رەتىندە 400 ملن فۋنت ءبولدى. ۇلىبريتانيا سونىمەن قاتار ۋكراينادان يمپورتتالاتىن ونىمدەردىڭ كوپ بولىگىنە تاريفتەردى تومەندەتىپ, ۋكراين تاۋارلارىنا قاتىستى كەدەندىك جەڭىلدىكتەر ەنگىزدى.
رەسەي اسكەرى ۋكراينانىڭ سولتۇستىگى, كيەۆ ماڭىن بوساتقالى ەل استاناسىندا كەيبىر ەو ەلدەرىنىڭ ەلشىلىكتەرى قىزمەتىن قايتا جالعاستىرا باستاعانىن ايتا كەتۋ كەرەك.
