جىل سايىن مۋزەيدىڭ رەستاۆراتورلارى مۋزەي زاتتارىنىڭ بۇزىلۋىن بولدىرماۋ جانە زەرگەرلىك بۇيىمداردى قوسا العاندا, ەكسپوناتتاردىڭ ساقتالۋىنا وڭتايلى جاعداي جاساۋ بويىنشا تۇراقتى جۇمىس جۇرگىزەدى. بۇل جۇمىستىڭ اتقارىلۋ بارىسى مۋزەيدە وتكەن «ناۋرىز ناقىشتارى» اتتى قازاق مادەنيەتى مەن ءداستۇرلى ۇلتتىق ونەرىنىڭ فەستيۆالىندە كەڭىنەن كورىنىس تاپتى.
فەستيۆال اياسىندا مەملەكەتتىك ورتالىق مۋزەي كوللەكتسياسىنداعى قالپىنا كەلتىرىلگەن زەرگەرلىك بۇيىمداردىڭ نەگىزىندە «كونەنىڭ كوزى» اتتى كورمە اشىلدى. كورمەدە ارعى عاسىرلارداعى ءداستۇرلى قازاق زەرگەرلىك اشەكەيلەرىنىڭ سان الۋاندىعى مەن سۇلۋلىعىن عانا كورسەتىپ قويماي, مادەني مۇرانى ساقتاۋعا جانە مۋزەي قۇندىلىقتارىن جاڭعىرتۋعا ءوز ۇلەسىن قوسىپ وتىرعان مۋزەي رەستاۆراتورلارىنىڭ تىنىمسىز كۇردەلى جۇمىسىنىڭ ناتيجەسى كوپشىلىككە تانىستىرىلدى.
ورتالىق مۋزەي رەستاۆراتورلارى ءارتۇرلى سيپاتتاعى ارتەفاكتىلەردى قالپىنا كەلتىرۋ بارىسىندا ءتۇرلى تەحنيكالىق ءادىس-تاسىلدەردى پايدالانا وتىرىپ, ەكسپوناتتاردى جوندەۋ, ەكسپوزيتسيالىق «تۇرگە» كەلتىرۋ جۇمىسىن كەشەندى تۇردە ورىندايدى. سوڭعى ۋاقىتتا مۋزەيدىڭ سۋرەتشى, زەرگەر, تاعى باسقا رەستاۆراتورلارى زەرگەرلىك بۇيىمداردى قوسا العاندا, مۋزەي جادىگەرلەرىنىڭ 700-دەن استام ساقتاۋ بىرلىگىن قالپىنا كەلتىردى.
«كونەنىڭ كوزى» اتتى كورمە ەكسپوزيتسياسىندا العاش رەت ءداستۇرلى قازاق زەرگەرلىك بۇيىمدارىنىڭ مۋزەي قورىنداعى بىرەگەي توپتاماسىنان 100-دەن استام قالپىنا كەلتىرىلگەن ايەلدەردىڭ زەرگەرلىك بۇيىمدارى ۇسىنىلدى: سىرعالار, بىلەزىكتەر, ساقينالار, شولپىلار, كيىمگە ارنالعان ساندىك ىلگەكتەردى مۋزەيگە كەلگەندەر ىقىلاسپەن قىزىقتادى
ەكسپوناتتاردىڭ ىشىندە گاريف جالمۇحانوۆ, يۆان برياكين, التىنبەك ابدۋلداەۆ سياقتى زەرگەرلەردىڭ كوپعاسىرلىق ءداستۇر بويىنشا دايىنداعان زەرگەرلىك اشەكەيلەرى دە وسى كورمەدەن ورىن العان. سونىمەن قاتار كورمەدە ۇلتتىق وپەرا ونەرىنىڭ شامشىراعى كۇلاش بايسەيىتوۆا, قازاقتىڭ بي ونەرىن قالىپتاستىرۋدا ولشەۋسىز ەڭبەك سىڭىرگەن شارا جيەنقۇلوۆا, جەزتاڭداي ءانشى جامال وماروۆا سەكىلدى حح عاسىرداعى اتى اڭىزعا اينالعان ايەلدەردىڭ زەرگەرلىك جيناقتارى كورمەنىڭ سالماعىن ارتتىرىپ, اجارىن اشا تۇسكەن. «كونەنىڭ كوزى» كورمەسى ورتالىق مۋزەي رەستاۆراتور شەبەرلەرىنىڭ كوپ جىلعى جۇمىسىنىڭ ءتۇرلى قىرلارى مەن قۇپيالارىن اشىپ كورسەتەدى.
مادەني ءىس-شارا باعدارلاماسى اياسىندا زەرگەرلىك ونەر بويىنشا شەبەرلىك ساباقتارى ۇيىمداستىرىلىپ, ونەر مايتالماندارى – ەتنيكالىق اندەردىڭ تانىمال ورىنداۋشىسى «تەنگري» مۋزىكالىق ەتنوتوبى, قازاقستاننىڭ ەڭبەك سىڭىرگەن ءارتىسى سۇلۋشاش نۇرماعامبەتوۆا, ج.ەلەبەكوۆ اتىنداعى ەسترادا-تسيرك كوللەدجىنىڭ ستۋدەنتتەرى ونەر كورسەتتى.
الماتى
