كۇز ايى كەلىپ, تورعىن قالاعا اتتاندى. ونى بۇل رەت بۇكىل اۋىل بولىپ اتتاندىردى. بار ويلاعاندارى – تەزىرەك ورالىپ, وزدەرى كۇتكەن تەلەفوندارىن اكەلسە دەگەن ىزگى وي. اياداي اۋىل تۇرعىندارىنىڭ ەندىگى ءومىرى كۇتۋمەن ءوتىپ جاتتى. «تورعىن قازاندا كەلەدى ەكەن», «ويباي, قاراشادا كەلەمىن دەپتى», «جوق, قىسقى دەمالىستا كەلەدى ەكەن, اكەسى ايتتى» دەگەن ءارتۇرلى جورامالدار اۋىل اراسىن شارلاپ ءجۇردى. ءتىپتى قويشىلار تەلەفونىن قولىنا العان سوڭ, كىممەن سويلەسەتىنىن, قاي توبەنىڭ باسىنا شىعىپ, ارى-بەرى اينالاتىنىن دا ويشا جوسپارلاپ, ىشتەرىنە سىيماي كەتسە, ءبىر-بىرىنە ايتىپ تا ءجۇردى. سول جىلعى قىستى ءبىزدىڭ اۋىلداعىداي ساعىنا كۇتكەن ەشكىم جوق شىعار؟! جايشىلىقتا, «قىس قاشان كەتەر؟» دەپ ناليتىندار, ەندى «قىس تەزىرەك كەلسە ەكەن» دەسەتىن بولدى.
مىنە, قىس تا كەلدى. تورعىن اۋىلعا ورالمادى. ءبىر قويدان بەرىپ ساتىپ الماق بولعان تەلەفوندار دا جوق. جۇرت اڭ-تاڭ. «تورعىن نەگە كەلمەي جاتىر؟» دەپ ءبىر-بىرىنەن سۇرايدى. سابىرى تاۋسىلعان بىرەۋى ونىڭ اكەسىنە بارىپ, ءمان-جايدى بىلمەك بولدى. ولار دا قالاداعى قىزىنان حابار الا الماپتى. بىرنەشە كۇننەن كەيىن ورازباي قارتتىڭ ۇيىنە اۋىل اراسىنا اتپەن حات جەتكىزەتىن پوشتاشى ات باسىن بۇردى. قولىندا الاقانداي اق كونۆەرت. الدەنەگە تاڭىرقاپ قالعان ورازباي قارت اسىعىس كونۆەرتتى جىرتىپ, وقي باستادى. «قادىرلى ورازباي يمان ۇلى, سىزگە ۋنيۆەرسيتەت اتىنان حابارلاسىپ وتىرمىز. قىزىڭىز تورعىن 1996 جىلى 23 جەلتوقسان كۇنى الدەكىممەن تەلەفوندا سويلەسكەن سوڭ ۇشتى-كۇيلى جوعالعان. اپتا بويى ىزدەپ تاپپادىق. اۋىلعا بارعان جوق پا؟ ەگەر بارسا, قايتارا حات جىبەرەرسىزدەر».
اۋىلداعىلار ەندى ءالى قولىنا ۇستاماعان تەلەفوندارىن ەمەس, تورعىندى ىزدەۋگە كىرىستى. «قايدا كەتتى؟», «سول كۇنى كىممەن سويلەستى ەكەن؟», دەگەن سۇراقتار ولاردى مازالاي باستادى. ۇلكەندەر جاعى «ايتتىق قوي, تەلەفون دەگەن ادامنىڭ باسىن اينالدىرىپ جىبەرەدى» دەگەن سوزدەرىن وسى جولى تاعى دا العا تارتتى. بۇل سوزگە ءبارى سەنگەندەي بولدى. اۋناپ ايلار, جىلجىپ جىلدار ءوتتى. تورعىن سول كۇيى تابىلمادى, اۋىلعا ورالعان جوق. ەشكىم دە ونى ىزدەمەيتىن دە بولدى. اندا-ساندا اۋىلعا بارعاندا, انادايدا تۇرعان توبەلەردى كورەمىن. ەشكىمنىڭ كوزىنە كورىنبەي تورعىن سول ارادا اينالسوقتاپ جۇرگەندەي ەلەستەيدى.
