جوبانىڭ ۇيلەستىرۋشىسى – «قازسۋشار» كاسىپورنىنىڭ پاۆلودار وبلىستىق فيليالى. اتالعان مەكەمەنىڭ ءبولىم باسشىسى سەرىك مۇستافين قاجەتتى قارجىنىڭ بولىنگەنىنە سەندىرىپ وتىر. نۇر-سۇلتان قالاسىندا ورىن تەپكەن باس كەڭسەدەگى باسشىلىق سولاي دەپتى. سايكەسىنشە, جوبا بيىل جىل سوڭىنا دەيىن اياقتالادى دەپ كۇتىلۋدە.
ەستەرىڭىزگە سالساق, اتالعان جوبانىڭ قۇرىلىسى 2020 جىلى باستالعان ەدى. كانالدىڭ ۇزىندىعى 12,5 شاقىرىمعا تەڭ. ازىرگە 7,5 مىڭ شاقىرىمى عانا دايىن تۇر. التى اۆانكامەرانىڭ بىرەۋى سالىنعان. ءاۋ باستا بيۋدجەتتەن بولىنگەن 5 ملرد 800 ملن تەڭگە قاراجات تولىعىمەن يگەرىلىپتى. قالعان سومانى الۋ ءۇشىن ءتيىستى مينيسترلىككە ءوتىنىش جولدانعان. وكىنىشكە قاراي, پاندەمياعا بايلانىستى ءتۇرلى سەبەپ ايتىلىپ, ءوتىنىش كەرى قايتارىلعان. «قازسۋشار» كاسىپورنىنىڭ پاۆلودار وبلىستىق فيليالى باسشىلىعى بيىل كوپتەن كۇتكەن 4 ملرد 600 ملن تەڭگە قارجى ءبولىندى دەپ جار سالسا, ازىلدەمەگەنى بولار. جوبانىڭ ماڭىزدىلىعىن سۋ سالاسىنىڭ ارداگەرى لەونيد باتالوۆ ايتىپ بەردى.
– جوبانىڭ قۇرىلىسى كسرو ۋاقىتىندا قولعا الىنعان-دى. بىراق كەيىن توقىراۋ سالدارىنان جۇمىستار اياقسىز قالدى. توسەلگەن پليتالار تالان-تاراجعا ءتۇستى. كانالدى قايتا جاڭعىرتۋ جۇمىستارى جالعاسىن تابۋعا ءتيىس. ەگەر وسى قالىپتا 1-2 جىل تۇرسا, ەروزيا پايدا بولىپ, كانال ءىشى قۇمعا تولىپ قالۋى ابدەن مۇمكىن. ءشوپ قاۋلاپ ءوسىپ كەتۋى دە عاجاپ ەمەس. قارجىلاندىرۋ جالعاسپاسا, وسى ۋاقىتقا دەيىن جۇمسالعان مەملەكەت قارجىسى سۋعا ءسىڭدى دەي بەرىڭىز. مەملەكەت باسشىسىنىڭ سۋارمالى القاپتى دامىتۋ جونىندەگى تاپسىرماسى جۇزەگە اسۋى كەرەك. جەر, سۋ – ءبارى دايىن. شارۋالار كانالدىڭ ىسكە قوسىلۋىن اسىعا كۇتىپ وتىر, – دەيدى ل.باتالوۆ.
ءيا, جوبانىڭ ارتىقشىلىعى كوپ. ءتىپتى شارۋالار تاريف ماسەلەسىنە دە باس اۋىرتىپ وتىرعان جوق. كانال قۇرىلىسى اياقتالسا, ديقاندار بوركىن اسپانعا اتاتىنى ءسوزسىز. بار ءۇمىت – بۇل ىسكە جاۋاپتى مينيسترلىكتەردىڭ قۇزىرىندا.
جالپى, وڭىردە سۋارمالى القاپتى دامىتۋ باعىتىندا قولعا الىنعان جوبالار كوپ. بۇل – اگروونەركاسىپ كەشەنىن جانداندىرۋ ارقىلى وبلىس ەكونوميكاسىن ارتاراپتاندىرۋعا مۇمكىندىك بەرەدى. جوبالاردىڭ جۇزەگە اسۋىنا «قازسۋشار» مەكەمەسى اتسالىسىپ جاتقانىن اتاپ وتكەن ءجون.
اتالعان كومپانيانىڭ دەم بەرۋىمەن وبلىستا 5 ينۆەستيتسيالىق جوبا قولعا الىنعان. جەلەزين اۋدانىنداعى جۇمىستار اياقتالىپ تا قويعان. ال اقتوعاي, پاۆلودار جانە ماي اۋداندارىنداعى جوبالاردىڭ تاعدىرى ۋاقىت ەنشىسىندە. بارلىق جوبا ءساتتى ىسكە قوسىلسا, 17,5 مىڭ گەكتار سۋارمالى القاپ پايدا بولماق. سۋارمالى القاپتى دامىتۋ ارقىلى كارتوپ, كوكونىس ونىمدەرى, مال ازىعى مولىنان جينالماق.
– جوبالار جۇزەگە اسسا, مال بورداقىلاۋ الاڭدارى, تاۋارلى ءسۇت فەرمالارى, كوكونىس قويمالارى كوپتەپ سالىناتىنى تۇسىنىكتى. قايتا وڭدەۋ باعىتىندا دا وڭ وزگەرىستەر ورىن الاتىنىنا سەنىم مول. باستىسى, 3 مىڭعا جۋىق جاڭا جۇمىس ورنى اشىلادى دەپ كۇتىلۋدە. جوبالاردىڭ ارقايسىسى قولعا الىنباس بۇرىن ەكولوگتەردىڭ, وزگە دە سالا ماماندارىنىڭ پىكىرى نازارعا الىندى. تيىمدىلىگى ەسەپتەلدى. تۇپتەپ كەلگەندە, سۋارمالى القاپتى دامىتۋ ەل پرەزيدەنتىنىڭ تاپسىرماسى ەكەنىن ەستەن شىعارماعان ءجون, – دەيدى سەرىك مۇستافين.
بىردەن ايتايىق, ينۆەستجوبالارعا قاراجات مەملەكەتتەن بولىنگەن. «قازسۋشار» مەكەمەسى قارجىنىڭ ماقساتتى جۇمسالۋىن قاداعالاپ, ۇكىمەت پەن شارۋانىڭ اراسىندا التىن كوپىر بولىپ وتىر. جوعارىدا اتاپ وتكەنىمىزدەي, جەلەزين اۋدانىندا باستالعان جۇمىستار تولىعىمەن اياقتالعان. جوبانىڭ تيىمدىلىگىنە كوز جەتكىزۋ ءۇشىن پريرتىشسك اۋىلدىق وكرۋگىنە قاراستى ءۇرلىتۇب اۋىلىندا ورنالاسقان «بولاشاق-اگرو» سەرىكتەستىگىنىڭ قۇرىلتايشىسى قۋات انافينمەن حابارلاستىق. ونىڭ ايتۋىنشا, ينۆەستباعدارلاماعا ىلىگۋ وڭايعا سوقپاعان. ءتيىستى قۇجاتتاردى رەتتەگەنشە ءبىراز ۋاقىت وتكەن. قايتا جەرگىلىكتى اكىمدىك, «اتامەكەن» كاسىپكەرلەر پالاتاسى, «قازسۋشار» كاسىپورنىنىڭ پاۆلودار وبلىستىق فيليالى ماماندارى قولداۋ كورسەتىپ, «پويىزدىڭ سوڭعى ۆاگونىنا» ۇلگەرىپ قالىپتى.
– جوباعا سايكەس, 721,1 گەكتار جەر سۋارمالى القاپقا اينالدى. بۇعان دەيىن قۋ تاقىر بولاتىن. جوبا قۇنى – 355,9 ملن تەڭگە. ول قاراجاتقا 4 سۋ سورعىش ستانساسى, كەشەندى ترانسفورماتورلىق قوسالقى ستانسا سالىندى. ءبىر سۋ سورعىش ستانساسى ەرتىس وزەنىنەن ساعاتىنا 400 تەكشە مەتر سۋدى الۋعا قاۋقارلى. بۇدان بولەك, وزەننەن ەگىس القابىنا دەيىن قۇبىر توسەلدى. وسى جەردەن مەملەكەتتىڭ «ميسسياسى» اياقتالدى. بۇدان كەيىن ءوز قاراجاتىما ەگىس القابىنا قۇبىرلار تارتتىم. 5 جاڭبىرلاتقىش تەحنيكا ساتىپ الىندى. قاجەتتى عيماراتتار سالىندى. قىسقاسى, جوبانى سوڭىنا دەيىن جەتكىزۋ ءۇشىن 1 ملرد تەڭگە قاراجات جۇمسالدى, – دەيدى قۋات انافين.
كوپ جاعدايدا مەملەكەت وزىنە تيەسىلى شارۋالاردى تىندىرىپ, ارى قاراي شارۋالار قارجىنىڭ جەتكىلىكسىزدىگىن العا تارتىپ, جوبانى اياقسىز قالدىراتىن كورىنەدى. ايتپاعىمىز, قۇزىرلى ورگاندار شارۋالارعا جوبانى سوڭىنا دەيىن اياقتاۋعا جاردەمدەسىپ, باعىت-باعدار كورسەتسە ەكەن. فەرمەرلەردى قاراجاتپەن قامتۋ ءبىر بولەك, ونى ءتيىمدى يگەرۋگە اتسالىسۋ ماڭىزدى.
پاۆلودار وبلىسى
