اتالعان چەمپيوناتتىڭ ماقساتى – جاستاردىڭ ۇلتتىق سپورتقا دەگەن قىزىعۋشىلىعىن ارتتىرۋ جانە سالاماتتى ءومىر سالتىن ناسيحاتتاۋ. سەگىز كۇنگە سوزىلعان جارىسقا ەلىمىزدىڭ بارلىق وڭىرىنەن 300-گە جۋىق جاس توعىزقۇمالاقشى قاتىستى.
جارىس قورىتىندىسى بويىنشا, توعىزقۇمالاقتىڭ بليتس تۇرىنەن 17 جاسقا دەيىنگى ۇلدار اراسىنان اقتوبەلىك دياس جانباۋ الدىنا جان سالماسا, قىزداردان ەلوردالىق اقجىبەك ماناربەكقىزىنا تەڭ كەلەر ەشكىم بولمادى. 19 جاسقا دەيىنگى ۇلدار توبىندا شىمكەنتتىك داستان قالىبەك دارا شىقسا, قىزداردان شىعىسقازاقستاندىق ايانا يساحان توپ جاردى. ال 21 جاسقا دەيىنگى جاستاردىڭ ىشىنەن 1-ورىندى قىزىلوردالىق اسىلبەك قارجاۋباەۆ يەلەنسە, قىزداردان تاعى ءبىر قىزىلوردالىق اقەركە كەنجەبەكوۆا بيىك تۇعىردان كورىندى.
راپيدتەن دە جاستارىمىز جەڭىس جولىندا ايانىپ قالمادى. اسىرەسە, بليتستەن ءبىرىنشى ورىن العان دياس جانباۋ (17 جاسقا دەيىنگى) مەن اقجىبەك ماناربەكقىزىنىڭ راپيدتە دە باقتارى جاندى. ال 19 جاسقا دەيىنگىلەر اراسىنان قىزىلوردالىق دامير احمەتوۆ (ۇلدار) پەن الماتىلىق اقەركە ءتۇرسىنالى (قىزدار) جەڭىمپاز اتاندى. 21 جاسقا دەيىنگىلەر توبىندا اسىلبەك قارجاۋباەۆ ەكىنشى مارتە چەمپيون اتانسا, قىزداردىڭ ىشىنەن ەلوردالىق قۇندىز ەسىركەپ دارا شىقتى.
كلاسسيكا بويىنشا قايرات تۇراربەك پەن ايانا يساحان (17 جاسقا دەيىن) جارىستا ۇزدىك دەپ تانىلدى. 19 جاسقا دەيىنگى جىگىتتەر اراسىنان پاۆلودارلىق ەراسىل اۋتاليپوۆ پەن قىزدار اراسىنان قىزىلوردالىق امير بەكزات جەڭىمپاز اتاندى. ال 21 جاسقا دەيىنگى جىگىتتەردەن جامبىلدىق نۇربول ءالدىباي, قىزداردان قوستانايلىق جانسايا سمايىلوۆا دارا شىقتى.
ماراپاتتاۋ راسىمىنە پارلامەنت ءماجىلىسىنىڭ دەپۋتاتى ماقسات رامانقۇلوۆ, دۇنيەجۇزىلىك توعىزقۇمالاق فەدەراتسياسىنىڭ ۆيتسە-پرەزيدەنتى ماقسات شوتاەۆ, توعىزقۇمالاقتان قازاقستاننىڭ ەڭبەك سىڭىرگەن سپورت شەبەرى حاكىمجان ەلەۋسىنوۆ جانە №87 اباي اتىنداعى مەكتەپ-گيمنازياسىنىڭ ديرەكتورى ايگۇل قاشاەۆا قاتىستى.
