2021 جىلى 5 جەلتوقساندا باستالعان فۋتزالدان BAQ liga چەمپيوناتى بيىل «قازاق راديوسىنىڭ» 100 جىلدىق مەرەيتويىنا ارنالعان بولاتىن. ءار جەكسەنبى سايىن ەلوردا جۋرناليستەرىنىڭ باسىن قوسقان BAQ liga چەمپيوناتى «ا» جانە «ۆ» ليگالارىنا ءبولىندى. چەمپيوننىڭ تاعدىرى سوڭعى تۋرعا دەيىن بەلگىسىز بولىپ, باس جۇلدەنى «7 ارنا» كومانداسى مەن «قازمەديا» ورتالىعى ساراپقا سالدى. ناتيجەسىندە, چەمپيوندىق ويىن «قازمەديانىڭ» پايداسىنا شەشىلىپ, 4:1 ەسەبىمەن جەڭگەن ولار تۇڭعىش رەت BAQ liga چەمپيونى اتاندى. 2-ورىن «7 ارناعا» بۇيىرسا, «National Geographic Qazaqstan» كومانداسى ۇزدىك ۇشتىكتى تۇيىندەدى. ال «ۆ» ليگاسىندا «ەۋرازيا+ورت» كومانداسى جەڭىمپاز اتانىپ, اقپارات جانە قوعامدىق دامۋ مينيسترلىگىنىڭ ۇجىمى كۇمىسپەن كۇپتەلدى. ءۇشىنشى ورىن «Kazaknews.kz» كومانداسىنا بۇيىردى.
سونداي-اق ۇزدىك ويىنشىلار دا ماراپاتتالدى. كوماندا كاپيتاندارى اراسىنداعى داۋىس بەرۋ ناتيجەسىندە «قازمەديا» ويىنشىسى ازات قۇماربەك «ا» ليگاسىنىڭ, «ۆ» ليگاسىندا «ەۋرازيا» ءبىرىنشى ارناسىنىڭ قىزمەتكەرى جاندوس ماناشەۆ ۇزدىك دەپ تانىلدى. ال بىلتىردان باستاپ تاعايىندالعان امانگەلدى سەيىتحان اتىنداعى ارنايى جۇلدە بيىل «حابار 24» رەداكتورى, «قازمەديا» قاقپاشىسى قانات بازىلحانعا بۇيىردى.
ماراپاتتاۋ راسىمىنە پارلامەنت سەناتىنىڭ دەپۋتاتى نۇرتورە ءجۇسىپ, پارلامەنت ءماجىلىسىنىڭ دەپۋتاتى جاناربەك ءاشىمجان, «7 ارنا» باس ديرەكتورى ەرلان يگىسىنوۆ, «قازاق راديولارى» جشس-نىڭ باس ديرەكتورى ەرنۇر بۋراحان, مەملەكەتتىك حاتشىلىعى مەڭگەرۋشىسىنىڭ ورىنباسارى ەرجان بايتىلەس جانە «حابار» اگەنتتىگى اق باسقارما توراعاسى بەرىك ءۋالي قاتىستى.
ايتا كەتەيىك, بايراعىن 2016 جىلدىڭ 10 جەلتوقسانىندا جەلبىرەتكەن BAQ liga – قازاقستان باق وكىلدەرىنىڭ باسىن بىرىكتىرىپ, رەداكتسيالار اراسىندا كوپىر ورناتىپ, ارىپتەستىك تاتۋلىقتى ارتتىرۋعا باعىتتالعان جوبا. بەس جىلدىڭ ىشىندە BAQ liga اياسىندا باق وكىلدەرى اراسىندا 10 فۋتبول ماۋسىمى, 2 ۆولەيبول ماۋسىمى ءوتىپ, وعان بارلىعى 70-تەن استام رەداكتسيادان 1000-عا جۋىق باق قىزمەتكەرى قاتىستى.
ەندى باق ليگانىڭ شاعىن فۋتبولدان جازعى چەمپيوناتى مامىر ايىندا باستالادى.
