ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى ۋنيۆەرسيتەت جۇمىسىنداعى كوپتەگەن زاڭ بۇزۋشىلىقتى انىقتادى. اتاپ ايتقاندا, ينستيتۋتتا ءبىلىم بەرۋ ۇيىمدارى قىزمەتىنىڭ ۇلگىلىك ەرەجەلەرى, مەملەكەتتىك جالپىعا مىندەتتى ستاندارت تالاپتارى, سونداي-اق بىلىكتىلىك تالاپتارى ساقتالماعان.
ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ باسقارما باسشىسى ەلۆيرا ساپاربەكوۆا: «ۋنيۆەرسيتەتتى تەكسەرۋ بارىسىندا كوپتەگەن زاڭ بۇزۋشىلىق انىقتالدى. مىسالى, وقىتۋشىلاردىڭ ءبىر ۋاقىتتا ءارتۇرلى تىلدە وقىتاتىن ەكى ءتۇرلى توپتا ساباق وتكىزۋ فاكتىلەرى كەزدەستى. بىراق مۇعالىمدەردىڭ وقۋ جۇكتەمەسىندە ءار توپ بويىنشا اۋديتوريالىق ساباقتار بولەك ەسەپتەلگەن. ودان بولەك, وقۋ ورنىندا كەيبىر ساباقتار مۇلدەم وتكىزىلمەگەن. ءبىلىم بەرۋ باعدارلامالارىن ازىرلەۋ جانە بەكىتۋ كەزىندە زاڭ بۇزۋشىلىقتارعا جول بەرىلگەن. سونىمەن بىرگە اتىراۋ ينجەنەرلىك-گۋمانيتارلىق ينستيتۋتىنىڭ ستۋدەنتتەردى وقىتقان ءبىلىم بەرۋ باعدارلامالارى ءبىلىم جانە عىلىم مينيسترلىگىنىڭ تىزىلىمىنە ەنگىزىلگەن باعدارلامالارعا سايكەس كەلمەدى. ناتيجەسىندە ستۋدەنتتەر وقۋ پاندەرىن تولىق مەڭگەرمەگەن. سونداي-اق وقۋ پروتسەسى ساپالى پروفەسسورلىق-وقىتۋشىلىق كادرمەن قامتاماسىز ەتىلمەگەن», دەدى.
تەكسەرۋ اتىراۋ ينجەنەرلىك-گۋمانيتارلىق ينستيتۋتىندا ساپانى قامتاماسىز ەتۋدىڭ ىشكى جۇيەسى مەن قاجەتتى ماتەريالدىق-تەحنيكالىق بازانىڭ جوقتىعىن كورسەتتى. بىرقاتار ءبىلىم بەرۋ باعدارلاماسى بويىنشا وقۋ, ادىستەمەلىك جانە عىلىمي ادەبيەتتەر جوق, ياعني ستۋدەنتتەردىڭ ساپالى ءبىلىم الۋىنا جاعداي جاسالماعان. مۇنى تەست تاپسىرعان ستۋدەنتتەردىڭ ءبىلىم ناتيجەلەرى راستادى. ياعني ينستيتۋت ستۋدەنتتەرىنىڭ 90 پايىزى شەكتى بالدى جيناي المادى.
ايتا كەتەيىك, ۇلگىلىك قاعيدالاردىڭ نورمالارىنا سايكەس ستۋدەنتتەر ۋنيۆەرسيتەت ليتسەنزياسىنان ايىرىلعان ساتتەن باستاپ وقۋىن جالعاستىرۋ ءۇشىن باسقا جوو-عا اۋىسۋعا قۇقىلى.
