ورىندالعان وتىنىشتەردىڭ ەڭ كوبى الماتى قالاسىنىڭ (17,7 پايىزى), نۇر-سۇلتان قالاسىنىڭ (13,4 پايىزى), ماڭعىستاۋ وبلىسىنىڭ (11,6 پايىزى) تۇرعىندارى تاراپىنان جولدانعان.
زەينەتاقى جيناقتارىنىڭ ءبىر بولىگىن پايدالانۋعا وتىنىشتەردى قابىلدايتىن ۋاكىلەتتى وپەراتورلار – وتباسى بانكى, «قازاقستان حالىق بانكى», «Altyn Bank», «بانك تسەنتركرەديت» جانە «بانك فريدوم فينانس قازاقستان». ورىندالعان وتىنىشتەردىڭ ەداۋىر (جالپى سانىنىڭ 95,30 پايىزى) بولىگى وتباسى بانكى ارقىلى بەرىلگەن. قالعان بانكتەردىڭ ۇلەسى كەلەسىدەي: «قازاقستان حالىق بانكى» – 3,23 پايىز, «بانك تسەنتركرەديت» – 1,39 پايىز, «Altyn Bank» (0,05 پايىز) جانە «بانك فريدوم فينانس قازاقستان» (0,03 پايىز).
وتىنىشتەردىڭ باسىم بولىگى تۇرعىن ءۇي ساتىپ الۋعا (تۇپكىلىكتى ەسەپ ايىرىسۋ), جەكە تۇرعىن ءۇي سالۋعا (مەنشىكتە جەر تەلىمى بولعان جاعدايدا) باعىتتالعان. بۇل باعىتتا شامامەن 2 ترلن تەڭگەگە (جالپى سومانىڭ 64,4 پايىزى) 469 628 ءوتىنىش ورىندالدى.
تۇرعىن ءۇي قۇرىلىس جيناقتارى جۇيەسى بويىنشا يپوتەكالىق تۇرعىن ءۇي قارىزىن الۋعا (قۇرىلىستى قوسپاعاندا), ونى تولىق جانە ءىشىنارا وتەۋگە جانە قايتا قارجىلاندىرۋعا, سونداي-اق تۇرعىن ءۇي قۇرىلىس جيناقتارى جۇيەسى بويىنشا جەكە تۇرعىن ءۇي سالۋعا (جەر تەلىمىن ساتىپ الۋدى قوسقاندا) جالپى سوماسى 402,2 ملرد تەڭگەگە (13 پايىز) 276 303 ءوتىنىش ورىندالدى.
(ينفوگرافيكانى جاساعان امانگەلدى قياس, «ەQ»)
تۇرعىن ءۇي ساتىپ الۋعا يپوتەكالىق تۇرعىن ءۇي قارىزىن الۋ ءۇشىن باستاپقى جارنانى ەنگىزۋگە, يپوتەكالىق تۇرعىن ءۇي قارىزى بويىنشا بەرەشەكتى تولىق, ءىشىنارا وتەۋگە جانە ونى قايتا قارجىلاندىرۋعا 378,6 ملرد تەڭگە (12 پايىز) اۋدارىلدى. بۇل دەگەنىمىز – 261 128 ءوتىنىش.
تۇرعىن ءۇي قۇرىلىس جيناق اقشاسىنا سالىمدى تولىقتىرۋعا ءارى قاراي جيناقتاۋ ءۇشىن 249,2 ملرد تەڭگەگە (8 پايىز) 274 506 ءوتىنىش ورىندالدى.
تۇرعىن ءۇيدى ساتىپ الۋ قۇقىعىمەن ۇزاق مەرزىمدى جالعا الۋ شارتتارى بويىنشا تولىق جانە ءىشىنارا تولەم جاساۋ, جەكەشەلەندىرۋ, تولەمدى ءبولىپ تولەۋ ارقىلى ساتىپ الۋ جانە ساتۋ, سونداي-اق جەكە تۇرعىن ءۇي قۇرىلىسى نەمەسە جەكە قوسالقى شارۋاشىلىق ء(بىرجولا ەسەپ ايىرىسۋ) نىسانالى ماقساتى بار ازاماتتىق-قۇقىقتىق مامىلەلەر بويىنشا جەر تەلىمىن مەنشىككە ساتىپ الۋدى قامتيتىن وزگە ماقساتتارعا 75,2 ملرد تەڭگە (2,4 پايىز) اۋدارىلدى.
ايتا كەتەيىك, ۋاكىلەتتى وپەراتورلاردان سالىمشىلاردىڭ جەكە زەينەتاقى شوتتارىنا ءوتىنىش بەرۋشىنىڭ ءوتىنىشى جانە وزگە دە سەبەپتەر بويىنشا 422,1 ملرد تەڭگەدەن اسا قاراجات قايتارىلعان. سەبەبى قازاقستاندىقتار بىرجولعى زەينەتاقى تولەمدەرىن بەلگىلەنگەن مەرزىمدە پايدالانباعان.
سونىمەن قاتار بجزق ەمدەلۋگە بەرىلگەن 293,5 ملرد تەڭگەگە 380 996 ءوتىنىشتى ورىندادى. بۇل رەتتە الۋعا بولاتىن ورتاشا سوما شامامەن 0,8 ملن تەڭگە. سالىمشىلاردىڭ بجزق-داعى جەكە زەينەتاقى شوتتارىنا ۋاكىلەتتى وپەراتوردان (وتباسى بانكى) 26,9 ملرد تەڭگە قايتارىلدى. بۇل قاراجات ءوتىنىش بەرۋشىنىڭ ءوتىنىشى نەمەسە وزگە دە سەبەپتەر بويىنشا بەلگىلەنگەن مەرزىمدە پايدالانىلماعان.
ەمدەلۋگە بەرىلگەن وتىنىشتەردىڭ ەداۋىر بولىگى ءتىس ەمدەۋگە – 284,5 ملرد تەڭگەگە 365 751 ءوتىنىش (ەمدەلۋگە بەرىلگەن وتىنىشتەردىڭ جالپى سانىنىڭ 96 پايىزى) باعىتتالدى. سونداي-اق وفتالمولوگيالىق قىزمەتتەرگە 5,1 ملرد تەڭگەگە 10 844 ءوتىنىش جانە ورفاندىق اۋرۋلاردى ەمدەۋگە 1,1 ملرد تەڭگەگە 1 251 ءوتىنىش ورىندالدى.
2022 جىلدىڭ 1 ساۋىرىندەگى جاعداي بويىنشا, ينۆەستيتسيالىق پورتفەلدى باسقارۋشىلارعا 7,9 ملرد تەڭگە اۋدارىلدى. بجزق 4 975 ءوتىنىشتى ورىندادى. اۋدارىمنىڭ ورتاشا سوماسى – 1,6 ملن تەڭگە. قازىرگى ۋاقىتتا بجزق زەينەتاقى اكتيۆتەرىن سەنىمگەرلىكپەن باسقارۋعا قاتىستى ءتورت ينۆەستيتسيالىق پورتفەلدى باسقارۋشىمەن شارت جاساستى. ايتا كەتەيىك, 7,9 ملرد تەڭگەنىڭ 45,59 پايىزى نەمەسە 3,6 ملرد تەڭگەسى Jusan Invest-كە, 28,05 پايىزى نەمەسە 2,2 ملرد تەڭگەسى Halyk Global Markets-كە, 15,90 پايىزى نەمەسە 1,3 ملرد تەڭگەسى BCC Invest-كە, 10,46 پايىزى نەمەسە 0,8 ملرد تەڭگەسى «سەنتراس سەكيۋريتيز» كومپانياسىنا اۋدارىلعان.
