جاقىندا Picodi.com ساراپشىلارى قىزىق تالداۋ جۇرگىزىپ, وندا ءار ەلدەگى ازاماتتاردىڭ 1 ملن دوللاردى قانشا جىل جۇمىس ىستەپ تابا الاتىنىن زەرتتەپ كورىپتى. ارينە, زەرتتەۋ بارىسىندا ولار ءار ەلدەگى ورتاشا ايلىق جالاقىنى نەگىزگە العان. رەيتينگكە 102 ەل كىرگەن. ىشىندە قازاقستان دا بار. ءبىزدىڭ ەلدىڭ تۇرعىندارى ميلليون دوللار جيۋ ءۇشىن 245 جىلدان استام ءومىر ءسۇرۋ كەرەك ەكەن. ال وسىنشاما قىرۋار قارجىنى ەڭ قىسقا مەرزىمدە جيناي الۋعا قابىلەتتى ەل – شۆەيتساريا: 13 جىل, 4 اي. ەكىنشى ورىندا 20 جىل, 1 ايمەن اۋستراليا ورنالاسسا, ۇزدىك ۇشتىكتى 20 جىل, 2 ايمەن سينگاپۋر تۇيىندەيدى. سونىمەن قاتار بەستىك قاتارىندا ليۋكسەمبۋرگ (20 جىل, 4 اي) پەن اقش تا (23 جىل, 1 اي) بار.
245 جاس, 11 ايمەن قازاقستان 87-پوزيتسيادا تۇر. بىزگە كورشىلەس ەلدەر ىشىنەن رەسەي (191 جىل, 9 اي), ارمەنيا (215 جىل, 4 اي) جانە گرۋزيا (230 جىل, 2 اي) بىزدەن جوعارى ورنالاسسا, ازەربايجان (257 جىل, 1 اي) مەن وزبەكستاننىڭ (318 جىل, 4 اي) مۇمكىندىگى قازاقستاننان تومەن بولىپ شىقتى. ال پاكىستان, نيگەريا, ۋگاندا ەلىنىڭ ازاماتتارىنا ميلليون دوللار تابۋ ءۇشىن 400 جىلدان استام ۋاقىت قاجەت ەكەن.
زەرتتەۋشىلەر مىندەتتى جارنالار مەن سالىقتاردى ەسەپتەمەگەندەگى ورتاشا ايلىق جالاقى كولەمىن numbeo.com-نان العان. اتالعان رەسۋرستا بىزدەگى ورتاشا ايلىق جالاقى مولشەرى 174 968,29 تەڭگە دەپ كورسەتىلگەن. ءبىرىنشى ورىنداعى شۆەيتسارياداعى ورتاشا ايلىق جالاقى 2 956 110,32 تەڭگەگە تەڭ. قانشا ەسە جوعارى ەكەنىن ايتپاي-اق قويايىق. الەمدەگى 32-تەرريتوريا, 9 ملن-عا جەتەر-جەتپەس حالقى بار, تەڭىزگە شىعار جولى جوق (تاپ ءبىز سياقتى), تابيعي بايلىق دەگەننەن ادا, بىراق اۋىل شارۋاشىلىعىن دامىتۋ ارقىلى جاھاننىڭ باسەكەگە قابىلەتتى ۇزدىك 10 ەكونوميكاسىنىڭ قاتارىنا كىرىپ وتىرعان, 50,1 ملرد دوللاردىڭ ءونىمىن يمپورتتاپ, الايدا ءوزى 303,886 ملرد دوللاردىڭ تاۋارىن ەكسپورتقا شىعارىپ وتىرعان (2018 جىلعى دەرەك) شۆەيتساريا بىزگە قاي تۇرعىدان دا ۇلگى بولۋعا لايىق ەل. باجايلاپ قارار بولساق, مۇمكىندىگىمىز بەن بايلىعىمىز ءالپى ەتەگىندەگى ەلدى ون ەمەس-اۋ, ءجۇز وراپ الار, بىراق مول مۇمكىندىك پەن ەسىل بايلىقتىڭ ەسەبى كورىنبەيدى, حالىقتىڭ بايلىعى حالىققا بۇيىرمايدى. مۇندايدا, ارينە, ميلليون دوللار جيناۋ تۋرالى اڭگىمە ايتۋدىڭ ءوزى كۇيىنىشتى.
