سۋرەتتەردى تۇسىرگەن ەرلان ومار, «EQ»
اشىق اڭگىمەدە الماتى, نۇر-سۇلتان, اتىراۋ, تۇركىستان قالالارىنداعى جەتەكشى جوعارى وقۋ ورىندارىنىڭ عالىمدارى وزدەرىنىڭ كوكەيدەگى ساۋالدارىن قويىپ, ۇسىنىستارىن ايتتى. ال ولاردىڭ ۇسىنىس-پىكىرلەرىن ءبىلىم جانە عىلىم ۆيتسە-ءمينيسترى قۋانىش ەرعاليەۆ, عىلىم كوميتەتى توراعاسىنىڭ ورىنباسارى دۋمان ورىنبەكوۆ, «مەملەكەتتىك ۇلتتىق عىلىمي-تەحنيكالىق ساراپتاما ورتالىعى» اق ۆيتسە-پرەزيدەنتى دانيار تەباەۆ تىڭداپ, جاۋاپ بەردى.
ءىس-شارانى ۇيىمداستىرۋشىلاردىڭ ءبىرى ءارى مودەراتورى, ل.ن.گۋميلەۆ اتىنداعى ەۇۋ رەكتورىنىڭ كەڭەسشىسى, رھD دوكتور اقەركە ابىلايحان اشىق ديالوگ قاراپايىم چاتتاعى قىزۋ تالقىلاۋدان باستالعانىن جەتكىزدى.
– «بولاشاق» قاۋىمداستىعىندا ءار سالا بويىنشا كلۋبتار قۇرىلعان. ءبىز قۇرعان ءبىلىم مەن عىلىم سالاسىنا قاتىستى كلۋب مۇشەلەرىنىڭ باسىن بىرىكتىرگەن چاتتا قازىر 600-دەن اسا ادام بار. ۆيتسە-ءمينيستردىڭ قاتىسۋىمەن وتكەن وسى اشىق اڭگىمەنىڭ وتۋىنە «بولاشاق» باعدارلاماسىمەن ءبىلىم الىپ كەلگەن جاس عالىمداردىڭ سول ورتاق چاتتا كوتەرىلگەن وزەكتى ماسەلەلەرى تۇرتكى بولدى. ودان كەيىن ءبىز جاس زەرتتەۋشىلەردىڭ قاتارىنا وسى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ تاجىريبەسى مول عالىمدارى مەن وقىتۋشىلارىن قوسىپ, ديالوگ ۇيىمداستىردىق. ءوزىم دە «بولاشاقتىڭ» تۇلەگىمىن, شەتەلدىك جۇيە كەيدە بىزگە كەلمەۋى مۇمكىن ەكەنىنە تاجىريبەدەن كوز جەتكەن. سوندىقتان ونى ويعا, تالقىعا, ساراپقا سالىپ بارىپ كورۋ كەرەك. وسىنى ەسكەرىپ, قوس تاراپتى وي ايتاتىن عالىمدارعا ورتاق الاڭ ۇيىمداستىرۋدى كوزدەدىك. جۇيەلى ۇسىنىستار جيناقتالىپ, مينيسترلىككە جولدانادى, – دەدى ا.ابىلايحان.
اشىق ديالوگتا عالىمداردىڭ جوبالارىن قارجىلاندىرۋ جايى, جوبانى زەرتتەۋ جانە ونى باسقارۋ, گرانت, حالىقارالىق ساراپشىلاردىڭ پىكىرىنە تاۋەلدىلىك سەكىلدى ماسەلەلەر قارالىپ, ونى شەشۋدىڭ جولدارىنا قاتىستى ۇسىنىستار ايتىلدى. ۇسىنىستاردى تىڭداپ, كەرەگىن وزىنە ءتۇرتىپ الىپ وتىرعان ءمينيستردىڭ جوعارى ءبىلىم جانە عىلىم باعىتى بويىنشا ورىنباسارى قۋانىش ەرعاليەۆ:
– اتالعان چاتتا مەن دە بارمىن, جازىلعان پىكىرلەردى وقىپ وتىرامىن. بۇگىنگى كەزدەسۋ ەكىجاقتى دا ءتيىمدى ءارى ناتيجەلى بولدى. ەلىمىز تاۋەلسىزدىك العالى بەرى رەسپۋبليكادا 21 مىڭعا جۋىق عىلىمي جوبا جۇزەگە اسسا, بارلىعى مەملەكەت بيۋدجەتىنەن قارجىلاندىرىلىپ, قولداۋ تاپتى. ناتيجەسىندە, وسىنداي جۇمىستارمەن اينالىساتىن عىلىمي-زەرتتەۋ ورتالىقتارى مەن ءتۇرلى ۇيىمدار اشىلىپ, الەمدى مويىنداتقان جوبالار ومىرگە كەلدى, – دەدى.
جيىن سوڭىندا ق.ەرعاليەۆ ايتىلعان ۇسىنىستاردى جازباشا تاپسىرۋدى ءوتىنىپ, ىقىلاس بىلدىرگەن عالىمداردى جەكە قابىلدايتىنىن ايتتى.
