جاس سۋرەتشى نۇراحمەت نۇربول – ومىرگە تەرەڭ فيلوسوفيالىق كوزقاراسپەن قارايتىن دارىن يەسى. ونىڭ شىعارماشىلىق گالەرەياسى رۋح كەڭىستىگىندە تەرەڭ تۇسىنىكتەر مەن تاڭعاجايىپ تانىمدارمەن تامىرلاسىپ, ادەپكى وي جۇيەسىنەن جىراققا جەتەلەيدى. قاراڭىزشى, «نازىك جان» كارتيناسى كورەر كوزگە انىق كورىنىس بولعانىمەن, ىشكە بۇققان قۇپياسى وڭايلىقپەن اشىلمايدى.
جاس سۋرەتشىنىڭ بارلىق جۇمىستارى ەلىمىزدىڭ بۇگىنگى ومىرىندە بولىپ جاتقان ءتۇرلى قۇبىلىستارعا تەرەڭ وي-تولعاۋلارى مەن مازاسىزدانۋ سەزىمدەرىمەن ايقىندالعان. وسى ورايدا, وزىندىك جەكە دۇنيەتانىمى بار جانە ونى بىزگە ءوز كارتينالارى ارقىلى جەتكىزۋگە قۇشتار سۋرەتشى شىعارماشىلىعىن قامتيتىن باستى تاقىرىپتىڭ ءبىرى – ءتۇس جانە ءتۇس كورۋ. ۇيقى جانە ءتۇس ۇعىمدارى ءبىر ءسات شىنايى ومىردەن ارىلۋعا, كوز جۇمىپ ۋايىم-قايعىدان الشاقتاۋعا اكەلەدى.
پسيحولوگ زيگمۋند فرەيدتىڭ ايتۋىنشا ء«تۇس − ادامنىڭ شىنايى ومىردەگى ارمانىنا, تىلەگى مەن ىقىلاسىنا جانە ىنتىزارلىعىنا قولىن جەتكىزىپ, كوڭىلىن تىنىشتاندىراتىن تىلسىم قۇبىلىس». ولاي بولسا اتالعان تاقىرىپتى سيپاتتايتىن سۋرەتشىنىڭ «نازىك جان» تۋىندىسى – كۇردەلى راكۋرستا جازىلعان كومپوزيتسيانىڭ ءبىرى.
باقساڭىز, تۋىندىداعى كەيىپكەرلەردىڭ بارلىعى ۇيقى ۇستىندە. نەگە ولار ۇيىقتاپ جاتىر؟ ۇيقىداعى كەيىپكەرلەر تىنىشتىقپەن ءارى جالعىزدىقپەن تىلدەسەتىندەي. ولار قاتاڭ, ستاتيكالىق كۇيدە جازىلعان, سەبەبى ەشقانداي قوزعالىس جوق. ول ءوزىنىڭ كەيىپكەرلەرىن تۇستىك جازىقتىق بەتىنە ورنالاستىرعان جانە ولاردىڭ ارقايسىسى ءوز الەمىندە ءومىر سۇرەدى. بۇل جۇمىستارىندا اۆتور ادامزات بالاسىنا وي تاستاپ, سىن ايتىپ تۇرعانداي.
سۋرەتشى ءوز جۇمىستارى جايلى: «ادامدار بۇگىنگى ومىرىندە قايشىلىققا ۇرىنىپ, قاۋىمنىڭ اعىمىنا ىلەسىپ, قيىندىقتارعا كوز جۇمعىسى كەلەتىندەي. ەلىمىزگە قىس تۇسكەندەي, حالقىمىزدىڭ تەرەڭ ۇيقىعا باتقانىن سەزەمىن. سول ۇيقىدا شىنايىلىق پەن ساعىمنىڭ اراسىندا جاڭىلعانداي, ادامدار كوزدەرىن اشۋعا اسىقپايدى», دەپ تۇجىرىمدايدى. بۇل اۆتوردىڭ ىشكى جان كۇيزەلىسىنەن حابار بەرەتىندەي.
