«راديوجيىلىك – بۇل جاڭارتىلمايتىن شەكتەۋلى رەسۋرس. ماسەلەن, اۋىل شارۋاشىلىعىنا بولىنگەن جەر ءتيىمسىز جانە باسقا ماقساتتارعا قولدانىلسا, الگى جەر تەلىمى قايتارىلۋى ءتيىس. راديوجيىلىك سپەكترىندە دە وسىنداي جاعداي. بىلتىر ءبىز وسى باعىتتا ۇلكەن جۇمىس اتقاردىق. سوتتىڭ شەشىمىمەن بايلانىس وپەراتورلارى راديوجيىلىكتى پايدالانۋ بويىنشا 8 رۇقساتتامادان ايىرىلدى. بۇل رۇقساتتار 2016 جىلى الىنعان بولاتىن, الايدا 6 جىل بويى ءتيىمسىز پايدالانىلعان. بوساتىلعان راديوجيىلىك رەسۋرس حالىققا ساپالى بايلانىس قىزمەت كورسەتۋگە جۇمسالۋ ءۇشىن باسقا تەحنولوگيالارعا نەمەسە باسقا وپەراتورلارعا بەرىلەدى. كەيبىر ءىرى بايلانىس وپەراتورلارى جيىلىكتەردى بولاشاقتا پايدالانۋ ءۇشىن رەزەرۆكە قويادى, ياعني ازىرشە پايدالانبايدى نەمەسە ءبىر-ەكى بازالىق ستانسالاردا عانا پايدالانىپ, جەلىنى ءارى قاراي دامىتپايدى», دەپ جازدى مينيستر.
سونداي-اق ول مۇنداي جاعدايدا باسقالاردىڭ بايلانىس قىزمەتىن ۇسىنۋ مۇمكىندىگى شەكتەلەتىنىن ايتتى.
«بۇل رەتتە ءبىز راديوجيىلىك سپەكترىن ءبولۋ مەحانيزمىن تولىعىمەن وزگەرتەمىز. جۋىردا قازاقستاندا راديوجيىلىكتەر اۋكتسيون ۇلگىسىندە بولىنەدى. مۇنداي مەحانيزم ءۇردىستى اشىق جانە جاريالى ەتەدى, سونداي-اق بايلانىستىڭ جاڭا بۋىنى - 5G تەحنولوگياسىنا ءوتۋ پروتسەسىن ۇيىمداستىرۋعا سەپتىگىن تيگىزەدى. كەشە بايلانىس وپەراتورلارى كەڭەسىنىڭ وتىرىسىن وتكىزىپ, ەكى ماسەلەنى تالقىلادىق - قازاقستانداعى بايلانىس ساپاسىن كوتەرۋ جانە الەمدەگى جاعدايعا وراي وسى سالا بويىنشا ءتۇرلى ستسەناري ازىرلەۋ. بىراق بۇل تۋرالى كەلەسى جولى ايتامىن», دەپ جازدى باعدات مۋسين.
