ۇلتتىق ەكونوميكا ءمينيسترى الىبەك قۋانتىروۆتىڭ ايتۋىنشا, جوبا 10 باعىت بويىنشا جۇزەگە اسىرىلاتىن 36 ءىس-شارادان تۇرادى.
وسىلايشا, پرەزيدەنتتىك وكىلەتتىكتەردى شامادان تىس شوعىرلاندىرۋدان باس تارتۋ ماقساتىندا ەل زاڭناماسىنا كەلەسى تۇزەتۋلەر ەنگىزىلەدى:
- پرەزيدەنتتىڭ پرەزيدەنتتىك وكىلەتتىگىن ورىنداۋ مەرزىمىنە پرەزيدەنتتىڭ ساياسي پارتياعا مۇشەلىگىن توقتاتۋى;
- پرەزيدەنتتىڭ جاقىن تۋىستارى ءۇشىن مەملەكەتتىك ساياسي قىزمەتشىلەر جانە كۆازيمەملەكەتتىك سەكتور كاسىپورىندارى باسشىلارى لاۋازىمدارىنا ورنالاسۋعا تىيىم سالۋ;
- پرەزيدەنتتىڭ وبلىستار, رەسپۋبليكالىق ماڭىزى بار قالالار جانە استانا اكىمدەرى اكتىلەرىنىڭ كۇشىن جويۋ نەمەسە توقتاتا تۇرۋ جونىندەگى قۇزىرەتىن الىپ تاستاۋ, سونداي-اق پرەزيدەنتتىڭ اۋداندار, وبلىستىق ماڭىزى بار قالالار, اۋداندىق ماڭىزى بار قالالار, اۋىلدار, كەنتتەر, اۋىلدىق وكرۋگتەر اكىمدەرى قىزمەتىنەن الۋ قۇقىعىن جويۋ.
«سونداي-اق اكىمدەر مەن ولاردىڭ ورىنباسارلارىنا ساياسي پارتيالاردىڭ فيليالدارىندا قىزمەت اتقارۋعا تىيىم سالىنادى», دەدى الىبەك قۋانتىروۆ.
بۇدان باسقا, قر پارلامەنتى سەناتىنىڭ قۇرىلۋ ءتارتىبى مەن بىرقاتار فۋنكتسيالارى قايتا قارالاتىن بولادى.
اتاپ ايتقاندا:
سەناتتاعى پرەزيدەنتتىك كۆوتا 15 دەپۋتاتتان 10 دەپۋتاتقا دەيىن قىسقارادى, ولاردىڭ بەسەۋى قازاقستان حالقى اسسامبلەياسىنا ۇسىنىلادى;
- قحا كۆوتاسى ماجىلىستەن سەناتقا بەرىلەدى;
- قر پارلامەنتى سەناتىنىڭ ءماجىلىس قابىلداعان زاڭداردى ماقۇلداۋ نەمەسە ماقۇلداماۋ قۇقىعى كوزدەلگەن;
- قر پارلامەنتى سەناتىنىڭ وكىلەتتىگى كونستيتۋتسيالىق كەڭەستىڭ جانە جوعارى سوت كەڭەسىنىڭ توراعالارى قىزمەتىنە كانديداتۋرالاردى كەلىسۋ قۇقىعىمەن تولىقتىرىلدى;
- قر پارلامەنتى ءماجىلىسى زاڭ قابىلداۋ قۇقىعىنا يە بولادى;
- ەسەپ كوميتەتى جوعارى اۋديتورلىق پالاتاعا قايتا قۇرىلاتىن بولادى.
ۇەم باسشىسىنىڭ ايتۋىنشا, ەلدى ودان ءارى ساياسي جاڭعىرتۋ ماقساتىندا ءماجىلىستى قالىپتاستىرۋدىڭ ارالاس جۇيەسىن كوزدەيتىن سايلاۋ جۇيەسىنىڭ پروپورتسيونالدى-ماجوريتارلىق مودەلى ەنگىزىلەتىن بولادى.
«ساياسي پارتيالاردى تىركەۋ ءراسىمىن وڭايلاتۋ, ونىڭ ىشىندە تىركەۋ شەگىن 20 مىڭنان 5 مىڭ مۇشەگە دەيىن تومەندەتۋ كوزدەلۋدە. وڭىرلىك وكىلدىكتەردىڭ ەڭ از سانى 600-دەن 200 ادامعا دەيىن ازايتىلادى. پارتيا قۇرۋ ءۇشىن باستاماشىل ازاماتتار توبىنىڭ ەڭ از سانى 1000-نان 700 ادامعا دەيىن قىسقارادى», دەپ قوستى الىبەك قۋانتىروۆ..
سونىمەن قاتار قازاقستاندا كونستيتۋتسيالىق سوت پايدا بولادى. باق تۋرالى زاڭ قايتا قارالادى.
ءۇش جاڭا وبلىس - اباي, جەتىسۋ جانە ۇلىتاۋ پايدا بولادى. ۇلتتىق ەكونوميكا ءمينيسترى اتاپ وتكەندەي, بۇل باعىتتاعى جۇمىس باستالىپ كەتتى.
قازاقستان پرەمەر-ءمينيسترى ءاليحان سمايىلوۆ ۇسىنىلعان جالپىۇلتتىق ءىس-شارالار جوسپارى قويىلعان مىندەتتەرگە تولىق جاۋاپ بەرەتىنىن جانە كەلىسۋدىڭ بارلىق قاجەتتى راسىمدەرىنەن وتكەنىن اتاپ ءوتتى. وسىعان بايلانىستى ۇكىمەت باسشىسى ونى جۇزەگە اسىرۋعا كىدىرىسسىز كىرىسۋدى تاپسىردى.
«بارلىق ءبىرىنشى باسشىلاردىڭ نازارىن اۋدارامىن – سىزدەر جوسپاردىڭ ءاربىر ءىس-شاراسىنىڭ ساپالى جانە ۋاقتىلى ورىندالۋىنا دەربەس جاۋاپ بەرەسىزدەر. ورىنباسارلارىما جوسپاردىڭ باعىتتارىن قاتاڭ باقىلاۋدا ۇستاۋدى تاپسىرامىن», دەدى ءاليحان سمايىلوۆ.
