ء«الى ەسىمدە, 14-كە تولعاندا اكەم اۋەزوۆ تەاترىنا اپارىپ, ء«بىز پەرىشتە ەمەسپىز» دەگەن سپەكتاكلدى كورسەتكەن. اۋىل كلۋبىنان ۇلكەن ساحنانى العاش كورگەن مەن ءۇشىن تەاتردىڭ وزىنە ءتان اۋراسى, قالىپتاسقان ءتارتىبى, كورەرمەن زالى, اكتەرلەردىڭ ويىنى ۇمىتىلماس اسەر قالدىرعان ەدى. ستۋدەنتتىك جىلدارى ءجيى بارىپ تۇرعانىمىزبەن, قىزمەتكە ارالاسىپ, ەلورداعا قونىس اۋدارعاننان كەيىن اۋەزوۆ تەاترىنا جول تۇسپەي قويىپ ەدى, سونىڭ ورايى جاقىندا كەلدى. الماتىعا جاساعان جۇمىس ساپارىمىزدا قارا شاڭىراققا ارنايى بارىپ, «قان مەن تەر. اقبالا» سپەكتاكلىن تاماشالادىق. سونىمەن بىرگە مۇسىرەپوۆ تەاترىنا دا بارىپ, «قاراگوز» قويىلىمىن كوردىك. سپەكتاكلدەر وتە ۇنادى. ءبىراز وي ءتۇيىپ, تۇشىنىپ قايتتىق», دەپ جازدى داۋرەن اباەۆ Facebook پاراقشاسىندا.
سونداي-اق, مينيستر ف.مولداعالي جانە ا.وسپانباەۆا سياقتى جاس رەجيسسەرلەردىڭ م.اۋەزوۆ جانە ءا.نۇرپەيىسوۆ سىندى كلاسسيك جازۋشىلاردىڭ شىعارمالارىن جاڭاشا كەيىپتە ساحنالاپ جاتقانىن اتاپ ءوتتى.
«جىل وتكەن سايىن تەاترلارىمىز زامانعا ساي تۇلەپ, جاڭارىپ, جاندانىپ كەلە جاتقانى داۋسىز. اكتەرلەردىڭ شەبەرلىگىنە, ساحناعا, كورەرمەن تالعامىنا قاراپ-اق, ەلىمىزدەگى مادەنيەت سالاسىنىڭ دامۋ قارقىنىن بايقاۋعا بولادى. سونىمەن بىرگە, وتاندىق ونەر يەلەرىنىڭ شەتەلدىك ارىپتەستەرىمەن شەبەرلىك تۇرعىسىنان دەڭگەيلەستىگى, كەيدە, ءتىپتى, وزىندىك ەرەكشەلىكتەرىنىڭ ارقاسىندا وزىق تۇراتىنى دا ايقىن بايقالادى. بىرنەشە مەملەكەتتە جۇمىس ىستەپ, وزگە ەلدەردىڭ دە مادەنيەت وشاقتارىن كورگەن ادام رەتىندە بۇلاي تولىق سەنىممەن ايتا الامىن», دەيدى ول.
