2 ساۋىردە 24 جاسقا تولعالى وتىرعان تاراز فۋتبول مەكتەبىنىڭ تۇلەگى ەڭ باعالى فۋتبولشىلاردىڭ رەيتينگىندە 10-ورىندى يەلەنگەن. Transfermarkt سايتىنىڭ مالىمەتىنشە, قازىرگى كەزدە ماسكەۋدىڭ تسسكا كلۋبىندا ونەر كورسەتىپ جۇرگەن جەرلەسىمىزدىڭ ترانسفەرلىك قۇنى 4 ملن ەۋرونى قۇرايدى. ەستەرىڭىزگە سالا كەتەيىك, باقتيەر زاينۋتدينوۆ ءوزىنىڭ سپورتتىق مانسابىن «تارازدا» باستادى. 2018 جىلى «استاناعا» اۋىسسا, كەلەسى ماۋسىمدى رەسەي پرەمەر-ليگاسىنداعى «روستوۆتا» وتكىزدى. 2020 جىلى ول تسسكا-نىڭ جەيدەسىن كيدى. سونداي-اق زاينۋتدينوۆ قازاقستاننىڭ ۇلتتىق قۇراماسى ساپىندا 21 رەت جاسىل الاڭعا شىعىپ, 9 گولدىڭ اۆتورى اتاندى.
ال ەڭ قۇندى جارتىلاي قورعاۋشىلاردىڭ كوشىن رۋسلان مالينوۆسكي باستاپ تۇر. بۇل كۇندەرى يتاليانىڭ ا سەرياسىندا «اتالانتانىڭ» نامىسىن قورعاپ جۇرگەن 28 جاستاعى ۋكراينانىڭ جيتومير قالاسىنىڭ تۋماسى 30 ملن ەۋروعا باعالانعان. ەكىنشى ورىندا – الەكساندر گولوۆين. 25 جاستاعى رەسەيلىك فۋتبولشى 2018 جىلدان بەرى فرانتسيانىڭ «موناكو» كلۋبىنىڭ نامىسىن قورعاۋدا. ونىڭ قۇنى – 25 ملن ەۋرو. ءۇشىنشى ساتىعا رەسەيدىڭ تاعى ءبىر وكىلى الەكسەي ميرانچۋك جايعاستى. 26 جاستاعى «اتالانتا» ويىنشىسىنىڭ باعاسى 11 ملن ەۋرو شاماسىندا.
سونىمەن قاتار «توپ-10» جارتىلاي قورعاۋشىلار تىزىمىندە گەنريح محيتاريان (ارمەنيا, «روما», 10 ملن), لۋكاس سەلارايان (ارمەنيا, «كولامبۋس كريۋ», 8 ملن), ريفات جەمالەتدينوۆ (رەسەي, «لوكوموتيۆ», 7,5 ملن), انتون ميرانچۋك (رەسەي, «لوكوموتيۆ», 7,5 ملن), ۆيتالي بۋيالسكي (ۋكراينا, «دينامو», كيەۆ, 7 ملن) جانە يلزات احمەتوۆ (رەسەي, تسسكا, ماسكەۋ, 4,5 ملن) سىندى ساڭلاقتار بار.
