وڭىردە سۋ تاپشىلىعىنىڭ الدىن الۋ ماقساتىندا ارنايى جول كارتاسى ازىرلەنۋدە. ونىڭ اياسىندا 65 جوبانىڭ جۇزەگە اسىرىلۋى جوسپارلانعان. ونىڭ جيىرماسى 2022-2025 جىلدار ارالىعىندا جۇزەگە اسۋى كەرەك. بيىل وبلىستىق بيۋدجەت ەسەبىنەن 157,1 شاقىرىم بولاتىن 20 كانال تازالانادى.
جوعارىدا ورنالاسقان سۋ قويمالارىنىڭ جاعدايى دا ءماز ەمەس.
– قازىر توقتاعۇل سۋ قويماسىنا 7,9 ملرد تەكشە مەتر سۋ جينالدى. بىلتىرعى جىلمەن سالىستىرعاندا بۇل 1,2 ملرد-قا كەم. شاردارا سۋ قويماسىنداعى كولەم – 4,8 ملرد. وتكەن جىلى ءدال وسى ۋاقىتتا كوكسارايدا 1,3 ملرد تەكشە مەتر سۋ بولعان. بيىلعى تاپشىلىقتان بۇل سۋ رەتتەگىشكە سۋ جينالعان جوق, – دەدى ارال-سىرداريا باسسەيندىك ينسپەكتسياسىنىڭ ءبولىم باسشىسى سەيىتحان ءابۋوۆ.
تاپشى سۋدىڭ ءار تامشىسىن ساناپ, وبلىستاعى كولدەر جۇيەسىن تولتىرىپ الۋدىڭ دا قامى ويلاستىرىلعان. قاڭتار ايىنىڭ سوڭىنان قىزىلوردا قالاسى, سىرداريا, جالاعاش اۋداندارىنداعى كولدەر جۇيەسىنە سۋ جىبەرىلدى. «قازسۋشار» رمك قىزىلوردا وبلىستىق فيليالى ديرەكتورىنىڭ ورىنباسارى جورابەك ەرنازاروۆ ۇكىمەت رەزەرۆى ەسەبىنەن رەسپۋبليكالىق مەنشىكتەگى 17 كانالعا مەحانيكالىق تازارتۋ جۇرگىزۋ جوبالانىپ وتىرعانىن ايتىپ ءوتتى. ارنالاردى تازارتۋدان بولەك ەگىلگەن ءدان سۋدان قالماس ءۇشىن قاشىرتقى سۋدى قايتا پايدالانۋدىڭ دا امالدارى قاراستىرىلىپ جاتىر. وسى ماقساتتا وبلىسقا رەسپۋبليكالىق بيۋدجەت ەسەبىنەن 67 ناسوس الۋعا سۇرانىس بەرىلىپ, قاجەتتى قارجى كولەمى ۇسىنىلدى.
– بىلتىر جازدا ارال اۋدانىنداعى امانوتكەل اۋىلى تۇسىنان داريا ارناسى ۋاقىتشا بوگەلىپ, ايتارلىقتاي تارتىلىپ كەتكەن اقشاتاۋ-قامىستىباس كولدەر جۇيەسىن تولتىرۋ قولعا الىنعان. ءبىزدىڭ ەسەپ بويىنشا سودان بەرى اقشاتاۋ كولدەر جۇيەسىنە اقشاقىز, اققوي كانالدارى ارقىلى 360 ملن, ال قامىستىباسقا جاسۇلان, قۋلى ارنالارىمەن 236 ملن تەكشە مەتر سۋ جەتكەن. ەندى اۋدان اكىمدىگى وسى جينالعان كولەمدى ۇستاپ تۇرۋدىڭ قامىن جاساپ جاتىر, – دەيدى «قازسۋشار» رمك قىزىلوردا وبلىستىق فيليالى ديرەكتورىنىڭ ورىنباسارى جورابەك ەرنازاروۆ.
داريا ارناسى قالىپتى كەزدە وبلىسقا ۆەگەتاتسيالىق كەزەڭدە 5 ملرد تەكشە مەتردىڭ ۇستىندە سۋ بولىنەتىن. بىلتىر بۇل كولەم 4,1 ملرد-قا ءتۇستى. بيىلعى بولجام وتكەن جىلداعىدان دا از. بار بولعانى 3,3 ملرد تەكشە مەتر توڭىرەگىندە تۇر. شاردارا سۋ قويماسىنا سۋارۋ ماۋسىمىندا قوسىمشا 2,1-2,3 ملرد تەكشە مەتر تۇسسە عانا وسى بولجانعان سۋعا قول جەتكىزۋىمىز مۇمكىن.
وبلىس اۋماعىنا سەكۋندىنا 480-520 تەكشە مەتر سۋ جەتكەننىڭ وزىندە تاپشىلىق تارتاتىنبىز. وسى جىلى 380-400 تەكشە مەتر بولادى دەگەن بولجام بار. ۆەگەتاتسيا كەزەڭىندە سىرداريا, جالاعاش پەن قارماقشى اۋداندارىن سۋلاندىرىپ وتىرعان شىركەيلى كانالى ارقىلى 220-228 تەكشە مەتر جىبەرىلەتىن. ال بيىلعى بولجام 175-180 تەكشە مەتر. بىلتىر ايماقتىڭ برەندى سانالاتىن كۇرىش 84 مىڭ گەكتارعا ەگىلىپ ەدى. وسى جىلى بولىنەتىن سۋ 64 مىڭ گەكتار كۇرىشتىك القاپقا عانا جەتەدى.
وسىعان بايلانىستى ماماندار قازىر اۋدانداردى ارالاپ, ەگىن شارۋاشىلىعىمەن اينالىساتىن كاسىپكەرلەرمەن كەزدەسىپ, كۇرىشتى سۋدى از «ىشەتىن» داقىلدارعا الماستىرۋدىڭ جولىن اقىلداسىپ جاتىر. بىراق ديقانداردىڭ كوبى بۇل ۇسىنىستى ماقۇلداپ وتىرعان جوق. ويتكەنى وڭىردەگى ەگىن شارۋاشىلىعى كۇرىشكە نەگىزدەلگەن. ءارتاراپتاندىرۋ ارقىلى جاڭا داقىل ەككەنمەن دە ونى جينايتىن تەحنيكا جوق, جيناعاننىڭ وزىندە ءونىمدى وتكىزەتىن جەر ىزدەپ سابىلاتىنى تاعى بار. كۇرىش كولەمىن قىسقارتسا, ليزينگكە العان تەحنيكا مەن بانك الدىنداعى نەسيەسىن وتەۋدىڭ قيىنداپ كەتەرىن ايتىپ وتىرعان ديقاندار دالەلىمەن كەلىسەتىن دە تۇستار كوپ.
ايتەۋىر, داريا ارناسى بيىل دا تومەن, ەل كوڭىلى ەلەڭ. نەسىبەسىن جەردەن تەرگەن جۇرت جوعارىعا ۇمىتپەن قاراپ وتىر.
قىزىلوردا وبلىسى
