جاقىندا ۇقك شەكارا قىزمەتىنىڭ ءان-بي ءانسامبلى ءوزىنىڭ شىعارماشىلىق ساپارىن ەلىمىزدىڭ شىعىستاعى شەكاراسىنان باستادى. اتاپ ايتار بولساق, اسكەري-پاتريوتتىق قىزمەتى باسقارماسىنىڭ پودپولكوۆنيك ق.انۋاربەك باستاعان ونەرپازدار توبى ۇقك شەكارا قىزمەتىنىڭ الماتى وبلىسى بويىنشا دەپارتامەنتىنىڭ قاراساي, رايىمبەك, پانفيلوۆ جانە الاكول اۋداندارى بويىنشا شەكارا باسقارمالارىنىڭ ۋچاسكەلەرىندە بولىپ, شەكارا ايماعىن انمەن ارلەدى.
الدىمەن, ءان-بي ءانسامبلى جامبىل اۋدانىنىڭ مادەنيەت ۇيىندە قاراساي اۋدانى بويىنشا شەكارا باسقارماسىنىڭ «قاستەك», «جامبىل», «قارعالى», «قاسكەلەڭ» شەكارا بولىمشەلەرىنىڭ جەكە قۇرامدارىمەن بىرگە جەرگىلىكتى ونەرسۇيەر حالىقپەن كەزدەستى. زال تولى كورەرمەن شەكاراشى ونەرپازدار دايىنداعان پاتريوتتىق اندەردى تىڭداپ, كۇمبىرلەگەن كۇيلەرگە قۇلاق قۇرىشتارىن قاندىردى.
- ءبىزدىڭ ناۋرىز ايىنىڭ باسىنان باستالعان شىعارماشىلىق ساپارىمىز شەكارا قىزمەتىنىڭ 30 جىلدىعىنا ارنالادى. سوندىقتان مەرەكەلىك كونتسەرتتى وتانىمىزدىڭ شەبىن قورعاپ جۇرگەن شەكاراشىلار عانا ەمەس, شەكارا ءوڭىرىنىڭ حالقى دا تاماشالاۋعا ءتيىس. ويتكەنى, ءوڭىردىڭ قارتىنان باستاپ, مەكتەپ وقۋشىسىنا دەيىن ءوزىن شەكاراشى سانايدى, دەيدى پودپولكوۆنيك قۋانىش انۋاربەك.
شىعارماشىلىق توپتىڭ كونتسەرتتىك باعدارلاماسى اتالعان شەكارا باسقارماسىنىڭ «ساتى», «رابات» شەكارا بولىمشەلەرى ورنالاسقان ا.نۇسىپبەكوۆ ەلدى مەكەنىنىڭ مادەنيەت ۇيىندە جالعاستى. ىلە الاتاۋىنىڭ بايىرعى تۇرعىندارى دا شەكاراشى ونەرپازداردى قۇشاق جايا قارسى الىپ, انشىلەر ورىنداعان «شەكارامىز بەرىك بولسىن», «باستاۋ», «بايگە», «التىن بەسىك», «قازاعىم جاسا», «ونەر جولى» سەكىلدى تاماشا اندەرمەن رۋحاني سۋسىندادى.
جىر ءدۇلد ۇلى جامبىل بابامىزدىڭ تۋعان جەرىنەن باستاۋ الىپ, جەر ءجانناتى جەتىسۋدىڭ ءۇشارال قالاسىنا دەيىن جالعاسقان شىعارماشىلىق ساپار كەزىندە جەرگىلىكتى جۇرتشىلىق قازاق ەلىنىڭ ء«جۇز انىنە» ەنگەن تۋىندىلاردى عانا تىڭداۋمەن شەكتەلگەن جوق. ەلىمىزدىڭ كۇشتىك قۇرىلىمدارى اراسىندا, حالىقارالىق بايقاۋلاردا توپ جارىپ جۇرگەن ۇقك شەكارا قىزمەتى ءان-بي ءانسامبلىنىڭ رەپەرتۋارىنان الەم حالىقتارىنىڭ اندەرى مەن بيلەرىن دە كوپتەپ كەزدەستىرۋگە بولادى.
ءارى قاراي, نارىنقول, شونجى اۋىلدارىنىڭ مادەني وشاقتارىنا ات باسىن تىرەپ, اۋدان جۇرتىمەن قاۋىشقان شەكاراشىلاردى كەلەسى نۇكتە – جاركەنت قالاسىنىڭ حالقى كۇتىپ وتىرعان-دى. شەكاراشى ونەرپازدار قالانىڭ مادەنيەت ۇيىندە بولىپ قانا قويعان جوق, قورعاس اۋىلىنا دا ارنايى ات باسىن تىرەدى. وسىلايشا, شەكارا ايماعىن تاماشا ءان-كۇيگە بولەگەن انسامبل مۇشەلەرى جولاي تەكەلى قالاسىنا سوعىپ, الاكول اۋدانىنىڭ ورتالىعىندا ۇشارالدىقتارمەن بىرگە ۇلىستىڭ ۇلى كۇنىن تويلادى.
ۇقك شەكارا قىزمەتىنىڭ 30 جىلدىعى قارساڭىندا شەكارا ءوڭىرىنىڭ حالقىمەن بولعان وسىناۋ ۇلاعاتتى كەزدەسۋ – شەكاراشىلاردىڭ ەل شەبىندەگى كۇن مەن تۇنگە جالعاسقان قىزمەتىن, وتان وعلاندارىنىڭ ەرلىك ىستەرىن ۇلىقتاۋ بولاتىن.
تامارا داۋلەتباەۆا,
جۋرناليست
