وسى رەتتە الەۋمەتتىك جەلى قولدانۋشىلارى ءارتۇرلى پىكىر جازىپ, ءوز ويلارىمەن ءبولىسىپ جاتىر. ابدۋلاحاد سمانوۆ فەيسبۋكتە ءوز ويىمەن ءبولىسىپ, پىكىر ءبىلدىردى.
«كەي ادامدار سولتۇستىكتەگى كورشىمىز ۋكراينادان سوڭ بىزگە دە ءتيىسۋى مۇمكىن ەكەنىن ايتىپ, ەل-جۇرتتى ۇرەيلەندىرىپ جاتقانىن بايقاپ قالىپ جاتىرمىن.
مەنىمشە, اتا-بابالارىمىزدىڭ جاساعان دۇعاسىنىڭ جەمىسى بولسا كەرەك, قازاق حالقىنا - اللا تاعالانىڭ مەيىرى تۇسكەن حالىق.
ەلىمىز تاۋەلسىزدىكتىڭ العاشقى جىلدارى سىندارلى, قيىن كەزەڭدەردى باستان وتكەردى. تاۋەلسىزدىك العان جىلدارى ەلىمىزدەگى حالىق سانىنىڭ 38 پايىزىن عانا قازاقتار قۇراعان. بۇگىندە ەلىمىزدەگى ەتنوقۇرام بويىنشا قازاقستاردىڭ سانى 70% پايىزعا جاقىنداپ قالدى. سونداي-اق, قازاقستاننىڭ تۇڭعىش پرەزيدەنتى, ەلباسى نۇرسۇلتان نازارباەۆ كورشىلەس ەلدەرمەن شەكارامىزدى شەگەندەدى.
«تاۋەلسىزدىك العان قازاقستاننىڭ الدىندا تاعدىرشەشتى تاڭداۋ تۇردى. جاس مەملەكەت الەمدىك گەوساياساتتاعى ورنىن انىقتاپ الۋعا ءتيىس ەدى. بۇل تۋرالى ەلباسى بىلاي دەپ ەسكە الادى: «قازاقستان قانداي ەل بولادى؟ ازيا مەن ەۋروپانىڭ اراسىنا كوپىر بولا ما؟ نەمەسە «سولتۇستىك – وڭتۇستىك» وسىنە اينالا ما؟»
بۇگىندە جاعداي تىپتەن كۇردەلى, قازىر ەلىمىز كوپۆەكتورلى حالىقارالىق ساياسات ۇستانىپ وتىر. مەملەكەت باسشىسى قاسىم-جومارت توقاەۆ: «ەگەمەندىك دەگەنىمىز – جالاڭ ۇران مەن جالىندى ءسوز ەمەس. ءبىز ءۇشىن ەڭ ماڭىزدىسى – ءار ازاماتتىڭ تاۋەلسىزدىك يگىلىگىن سەزىنە الۋى. ونىڭ باستى كورىنىسى – ەلدەگى بەيبىت ءومىر, قوعامداعى تۇراقتىلىق پەن تىنىشتىق. سونداي-اق, حالىقتىڭ تۇرمىس ساپاسىنىڭ جاقسارۋى جانە جاستاردىڭ بولاشاققا نىق سەنىممەن قاراۋى», دەدى.
ەندەشە, ءبىز وسكەلەڭ ۇرپاقتى بارشا جۇرت ماقتان تۇتاتىن تاريحي تۇلعالاردىڭ تاعىلىمى ارقىلى تاربيەلەۋىمىز كەرەك», دەيدى ابدۋلاحاد سمانوۆ.
