تاۋلى جەرلەردە جاۋىن-شاشىننىڭ تۇسۋىنە جانە قار جامىلعىسىنىڭ تۇراقسىز بولۋىنا بايلانىستى كىشى جانە ۇلكەن الماتى سۋ الابتارىندا 25-28 ناۋىرىز ارالىعىندا قار كوشكىنى قاۋپى ساقتالادى.
«بۇگىن «شىمبۇلاق» اۋماعىندا قاۋىپسىزدىكتى قامتاماسىز ەتۋ ءۇشىن «اۆالانچەر» پنەۆماتيكالىق قوندىرعى ارقىلى كىشى الماتى وزەنى باسسەينىندە كوشكىندەردى ءتۇسىرۋ بويىنشا الدىن الۋ پروفيلاكتيكالىق جۇمىستارى جۇرگىزىلدى. ناتيجەسىندە 600 تەكشە مەتر قار ماسساسى تاستالدى», دەپ حابارلادى الماتى قالالىق توتەنشە جاعدايلار دەپارتامەنتىنىڭ ءباسپاسوز قىزمەتى.
سونىمەن قاتار, تاۋلى جەرلەردە قار كوشكىنى قاۋپىنىڭ بارىنا بايلانىستى جانە توتەنشە جاعدايلاردى بولدىرماۋ ماقساتىندا مەدەۋ, شىمبۇلاق, تۇيىق سۋ شاتقالىندا اۆتوكولىكتەر مەن ادامداردىڭ ءوتۋىن شەكتەۋ ءۇشىن بلوكپوستار قويىلدى.
سونداي-اق, تجد قالا تۇرعىندارى مەن قوناقتارىن تاۋعا بارۋدان باس تارتۋعا, اۋا رايىنىڭ جاعدايىن باقىلاۋعا, قار كوشكىنىن تۋدىرۋى مۇمكىن تىك قارلى بەتكەيلەرگە شىقپاۋعا, توتەنشە جاعدايلاردى بولدىرماۋ ماقساتىندا بارلىق قاۋىپسىزدىك شارالارىن ساقتاۋعا شاقىردى.
