«2021 جىلدىڭ قورىتىندىسى بويىنشا ەلەكتر ەنەرگياسىن ءوندىرۋ كولەمى 114,4 ملرد كۆت ساعاتتى قۇرادى. بۇل رەتتە ماينەرلەردىڭ باقىلاۋسىز وسۋىنە جانە ەلەكتر ستانتسيالارىنداعى اپاتتىق جاعدايلارعا بايلانىستى 2021 جىلعى ماۋسىمنان باستاپ تاپشىلىق پايدا بولدى. ول رەسەي فەدەراتسياسىنان شامامەن 300 ملن.كۆت ساعات كولەمىندە تەرىس سالدو-اعىن ەسەبىنەن جابىلدى. 2022 جىلعا ەلەكتر ەنەرگياسىن ءوندىرۋ جوسپارى – 114,4 ملرد كۆت ساعات», دەدى ول مينيسترلىكتىڭ كەڭەيتىلگەن القا وتىرىسىندا.
«سونداي-اق, ورتالىقتاندىرىلعان ساۋدا-ساتتىقتا ەلەكتر ەنەرگياسىنىڭ تاپشىلىعى مەن جوسپارلى يمپورتى كەزىندە ماينەرلەردى شەكتەۋ تەتىكتەرى ەنگىزىلدى. جالپى, قازىرگى ۋاقىتتا زاڭسىز تسيفرلىق ماينينگ سۋبەكتىلەرىن انىقتاۋ بويىنشا جۇمىس جالعاسۋدا. وسى سۋبەكتىلەردى ودان ءارى رەتتەۋ اياسىندا كەلەسى ماسەلەلەر پىسىقتالۋدا: تسيفرلىق ماينينگ قىزمەتىن ليتسەنزيالاۋدى ەنگىزۋدى جانە تسيفرلىق ماينينگ سۋبەكتىلەرىنىڭ ەلەكتر ەنەرگياسىن تۇتىنۋىنا كۆوتالاردى ايقىنداۋدى كوزدەيتىن زاڭناماعا تۇزەتۋلەردى ەنگىزۋ; جاڭا ماينەرلەر ءۇشىن قۋاتتاردى قوسۋعا موراتوري ەنگىزۋ; تسيفرلىق ماينينگ سۋبەكتىلەرىن ەلەكتر ەنەرگياسىن جاڭارتىلاتىن ەنەرگيا كوزدەرىنەن جانە يمپورتتان تۇتىنۋعا اۋىستىرۋ», دەدى بولات اقشولاقوۆ.
