تابيعاتتان سىر تارتساڭىز, جانىڭىز تازارادى نە كوڭىلىڭىزگە شىنايى كوركەم سۋرەتتەر قونادى. تاڭسارىدە تاۋعا شىققان جولاۋشىداي تازا اۋانىڭ جۇپارىنا ماستانىپ, قۇستاي قاناتىڭىزدى ەركىن سەرمەگىڭىز كەلەدى. قاراڭىزشى, سول ەركىندىك زاماناۋي سۋرەتشى راشيد قۇلباتىروۆتىڭ «تاڭ» كارتيناسىندا دا بار. تابيعاتتىڭ تاماشاسىن كوز الدىڭىزعا كوشىرگەن شەبەردىڭ شىعارماسى تۇمانعا ورانعان تىرشىلىكتى تەربەپ تۇرعانداي.
جالپى, قىلقالام شەبەرى بەينەلەۋ ونەرى كەڭىستىگىندە ءارتۇرلى باعىتتا جۇمىس ىستەپ جۇرگەن سۋرەتشى. ول مەيلى پەيزاج, جانرلىق كارتينالار, ۇلتتىق تاقىرىپتاعى تۋىندىلار بولسىن, ءارتۇرلى كوركەم جانرلاردا جەمىستى ەڭبەكتەنىپ كەلەدى. دەسە دە ونىڭ سۇيىكتى جانرى – پەيزاج. ال شابىتىنىڭ قاينار بۇلاعى – ارۋ الماتى. نەگە دەسەڭىز, قالا پەيزاجدارى مەن ىلە الاتاۋىنىڭ لاندشافتارىن كوپ جازعان سۋرەتشى وسى قالادان الدەبىر رۋحاني كۇشتىڭ بوياۋىن الادى.
باقساڭىز, «تاڭ» كارتيناسىندا الاتاۋ بوكتەرىنىڭ قىستى كۇنگى تاڭعى كورىنىسىن بەينەلەگەن. اسپان استىندا ۇلبىرەگەن بيىك-بيىك شىرشالار ءتىزىلىپ تۇر, ال ولاردىڭ ار جاعىنان ءتۇس جاعىنان اسپانمەن تۇتاسىپ كەتكەن تاۋ كەلبەتى بايقالادى. اسەم شىرشالاردىڭ بۇتاقتارىن قار باسقان. بۇل اعاشتارعا تاڭعاجايىپ سيپات بەرىپ تۇر. كۇننىڭ اق جانە كوگىلدىر ءتۇستى بالعىن ساۋلەلەرى ومبى قار مەن اعاشتاردىڭ جوعارعى ۇشتارىنا بايلانىپ قالعانداي.
سۋرەتشى اق, كوگىلدىر, كوك تۇستەردىڭ رەڭكتەرىن پايدالانا وتىرىپ, سالقىندىق پەن ايازدى سەزدىرەدى. ءتىپتى, ۇيىتقىپ سوققان جەلدىڭ قالاي قار جامىلعىسىن كوتەرگەنىن جانە كارتينانىڭ ەكىنشى پلانىنداعى مۇناردا الىپ شىرشالاردىڭ بىرىنەن سوڭ ءبىرى سوزىلا ورنالاسقانىن كورۋگە بولادى.
بۇل كارتينادان ءبىزدىڭ كوز الدىمىزعا جايلى ءتۇس, كومەسكى كولەڭكەلەر, قىسقى ورماننىڭ ۇنسىزدىگى, تىنىشتىق پەن ۇيلەسىم كەلەدى.
