Ranking مالىمەتىنشە, وسى ءۇش بانكتىڭ جيىنتىق ۇلەسى ەلدەگى بارلىق ەكىنشى دەڭگەيلى بانك (ەدب) اكتيۆتەرىنىڭ 15,1 پايىزىن قۇرايدى. بۇل كورسەتكىش ءبىر جىل بۇرىن 14,2 پايىز, ال بەس جىل بۇرىن 9 پايىزدى قۇراعان. ارينە, 15 پايىز – وتە اۋقىمدى كورسەتكىش. سالىستىرا ايتار بولساق, قازاقستانداعى قىتايلىق بانكتەردىڭ ەدب اكتيۆىندەگى ۇلەسى 2 پايىزعا دا جەتپەيدى.
ءۇش رەسەيلىك بانكتىڭ ەكەۋى – سبەربانك پەن ۆتب-عا اقش سانكتسياسى سالىندى, سايكەسىنشە شەتەلدىك شەكتەۋ بۇل بانكتەردىڭ قازاقستانداعى ەنشىلەس ۇيىمدارىنا دا اسەرىن تيگىزەدى.
«اكتيۆ كولەمى بويىنشا سبەربانك تەك قانا قازاقستاندىق گيگانت Halyk Bank-كە جول بەرەدى. سوڭعى ءبىر جىلدا سبەربانك اكتيۆى 27,5 پايىزعا ءوسىپ, 2022 جىلدىڭ قاڭتارىندا 4,2 ترلن تەڭگەنى قۇرادى. ودان كەيىنگى ورىندا الفا-بانك – 926,9 ملرد تەڭگە. ءبىر جىلدا 16,3 پايىزعا وسكەن. ۆتب بانك اكتيۆى ءبىر جىلدا 36 پايىزعا ءوسىم كورسەتىپ, 474 ملرد تەڭگەگە جەتتى. قازاقستانداعى ەكىنشى دەڭگەيلى بانكتەر اراسىندا الفا-بانك پەن ۆتب بانك اكتيۆ كولەمى بويىنشا 11 جانە 12-ورىنداردى ەنشىلەيدى», دەپ جازادى Ranking.
ولاردىڭ نەسيەلەۋدەگى قارقىنى دا جوعارى. قازاقستاندىق ەدب اراسىندا رەسەيلىك بانكتەردىڭ قارىز پورتفەلىنىڭ جيىنتىق ۇلەسى سوڭعى جىلدا 15-تەن 17,4 پايىزعا كوتەرىلىپتى. نەسيەلەۋ كولەمى بويىنشا سبەربانك ەكىنشى ورىندا تۇر – 2,7 ترلن تەڭگە. بۇل – 2021 جىلدىڭ قاڭتارىمەن سالىستىرعاندا 1,5 ەسە جوعارى كورسەتكىش. الفا-بانكتىڭ قارىز پورتفەلى 36,8 پايىزعا ءوسىپ, 534,8 ملرد تەڭگەنى قۇراسا, ۆتب بانكتىكى 24,1 پايىزعا ءوسىپ, 218,2 ملرد تەڭگەنى قۇراعان.
«سالىمداعى رەسەيلىك بانكتەر ۇلەسى ءبىر جىلدا ءسال عانا قىسقارعان – 13,7-دەن 13,6 پايىزعا. 2022 جىلدىڭ قاڭتارىندا رەسەيلىك بانكتەردەگى سالىمدار 3,5 ترلن تەڭگەنى قۇرادى. ونىڭ 2,5 ترلن تەڭگەسى سبەربانككە تيەسىلى. الفا-بانكتىڭ سالىمى – 618,5 ملرد تەڭگە, ۆتب بانكتىكى – 338,6 ملرد تەڭگە. رەسەيلىك ەنشىلەس بانكتەردەگى سالىمداردىڭ 60 پايىزدان استامى – كورپوراتيۆتىك سالىمدار. جانە بۇل تاڭعالارلىق تا قۇبىلىس ەمەس. قازاقستاندا شەتەل ازاماتتارىنىڭ قاتىسۋىمەن 37,8 مىڭ زاڭدى تۇلعا تىركەلسە, سونىڭ 11,5 مىڭى رەسەيلىكتەر. سبەربانكتىڭ كورپوراتيۆتىك سالىمدارى – 1,4 ترلن, الفا-بانكتىكى – 405,2 ملرد, ۆتب بانكتىكى – 255,4 ملرد تەڭگە. بۇل رەتتە ۆتب بانك جالپى دەپوزيتتىك پورتفەلدەگى كورپوراتيۆتىك دەپوزيتتەردىڭ ەڭ ۇلكەن ۇلەسىنە يە – 75,4 پايىز. سوندىقتان دا ۆتب ءوز كليەنتتەرىن – زاڭدى تۇلعالاردى اقش دوللارى جانە ەۋرومەن جاسالاتىن كەز كەلگەن وپەراتسيا مەن ەسەپتەۋ جۇرگىزۋلەردەن ۋاقىتشا باس تارتا تۇرۋعا شاقىردى», دەلىنگەن زەرتتەۋدە.
ال رەسەيلىك ەنشىلەس بانكتەردەگى بولشەك سالىمدار 10,1-دەن 10,5 پايىزعا ءوسىپ, 1,4 ترلن تەڭگەنى قۇراعان. جەكە تۇلعالار سالىمى نەگىزىنەن سبەربانكتە كوپ جيناقتالعان (1,1 ترلن تەڭگە). ودان كەيىن الفا-بانك (213,4 ملرد تەڭگە) جانە ۆتب بانك (83,2 ملرد تەڭگە). ەسكە سالايىق, ەۋرووداق سالعان سانكتسيالاردى جۇزەگە اسىرعان SWIFT 12 ناۋرىزدا رەسەيلىك بىرنەشە بانكتى وزىنەن, ياعني حالىقارالىق تولەم جۇيەسىنەن اجىراتىپ تاستادى.
