قارجى • 15 ناۋرىز، 2022

ميكروقارجى نارىعى جاندانا ءتۇستى

ميكروقارجى نارىعى بەلسەندى دامۋ جولىنا ءتۇستى. ءدال قازىرگى كەزدە ميكروقارجىلىق ۇيىمدار قاۋىمداستىعى قۇرامىنا كىرەتىن 65 ۇيىم ەل اۋماعىنداعى بۇكىل ميكرونەسيەنىڭ 87،4 پايىزىن ۇسىنىپ وتىر.

اباي قازبەك ۇلى

ميكروقارجىلىق ۇيىمدار قاۋىمداستىعىنىڭ باسشىسى ەربول ومارحانوۆ ەلىمىزدە كليەنتتەردى ءتيىمسىز قارجىلىق قىزمەتتەردەن قورعاۋعا جانە مقۇ-نى كليەنتتەردىڭ قۇقىقتارىن قورعاۋعا باعدارلاۋعا ارنالعان ناقتى ستاندارتتار كەشەنىن ەنگىزۋ قاجەت دەپ سانايدى. ونىڭ ايتۋىنشا، ميكروقارجىلىق قىزمەتتى جۇزەگە اسىراتىن ۇيىمدارعا زاڭدى سەرتيفيكات بەرۋ كليەنتتەر قۇقىعىن قورعاۋعا مۇمكىندىك بەرمەك. ودان كەيىنگى ماڭىزدى ماسەلە – ەتيكالىق مىنەز-ق ۇلىق ستاندارتتارىن ازىرلەۋ جانە ەنگىزۋ.

– بانك جانە ساقتاندىرۋ سەكتورىمەن سالىستىرعاندا بىزدە قارىز الۋشىلاردىڭ قۇقىعىن قورعاۋمەن اينالىساتىن ۋاكىلەتتى ومبۋدسمەن جوق. قازىر كليەنتتەر ماسەلەسىن ايتىپ قارجى نارىعىن رەتتەۋ جانە دامىتۋ اگەنتتىگىنە شاعىنادى، ونىڭ شاعىمىن قاراۋعا 3-14 كۇن ارالىعىندا ۋاقىت كەتەدى. بۇل كليەنت ءۇشىن وتە ۇزاق ۋاقىت. ال ميكروقارجى ومبۋدسمەنى قارجىلىق رەتتەۋشىگە جىبەرىلگەن مقۇ-عا قاتىستى وتىنىشتەر مەن شاعىمداردىڭ بۇكىل اعىنىن ءوز باقىلاۋىنا الۋ ارقىلى كليەنتتەردىڭ شاعىمدارىن جەدەل قاراي الار ەدى، – دەدى ە.ومارحانوۆ.

سونداي-اق ول تۇيتكىلدى جاعدايلاردى شەشۋ جانە كليەنتتەردى وقىتۋ، قولداۋ ماقساتىندا قور قۇرۋ كەرەك دەگەن دە ۇسىنىسىن ايتادى. «مقۇ-عا شاعىم كوپ بولعان سايىن ونىڭ قورعا تۇسىرەتىن اقشاسى دا كوبەيەدى. قور قارجىسى كليەنتتەردى وقىتۋعا، قارجىلىق ساۋاتتىلىقتى ارتتىرۋعا جۇمسالادى»، دەيدى قاۋىمداستىق باسشىسى.

ءبىرىنشى نەسيە بيۋروسىنىڭ مالىمەتى بويىنشا، 2022 جىلدىڭ 1 قاڭتارىندا مقۇ-لاردىڭ زايم پورتفەلى 811،1 ملرد تەڭگەنى قۇراعان.

– مقۇ-عا قاتىستى شاعىمداردىڭ ازدىعىنا سۇيەنە وتىرىپ، ميكرونەسيە نارىعى الەۋمەتتىك شيەلەنىستىڭ نەگىزگى كوزى ەمەس دەپ تە بولجاۋعا بولادى. سونىمەن قاتار مقۇ كليەنتتەر دەپوزيتىن ساقتامايدى، شوت اشپايدى، اۋدارىم وپەراتسيالارىن جۇرگىزبەيدى، قارجى جۇيەسىنىڭ تۇراقتىلىعى ءۇشىن تاۋەكەلدەردى كوتەرمەيدى. مقۇ نەسيە پورتفەلىنىڭ قۇرىلىمىندا 50 پايىزدان استامى – جەكە تۇلعالارعا جانە شوب سۋبەكتىلەرىنە كاسىپكەرلىك ماقساتتارعا بەرىلگەن شاعىن نەسيەلەر. مقۇ مىندەتى – بانكتىك قارجىلاندىرۋعا مۇمكىندىگى جوق جەكە تۇلعالاردى نەسيەلەۋگە سۇرانىستى بارىنشا قاناعاتتاندىرۋ، – دەپ اتاپ ءوتتى ە.ومارحانوۆ.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز