ۇكىمەتتىڭ Telegram پاراقشاسى ءمالىم ەتكەندەي, دەنساۋلىق ساقتاۋ ءمينيسترى ا. عينيات ءدارى-دارمەكپەن قامتاماسىز ەتۋ تۋرالى اقپارات بەردى.
«قازىر رەسپۋبليكانىڭ 8 وڭىرىندە - الماتى قالاسى, شىعىس قازاقستان, سولتۇستىك قازاقستان, الماتى, پاۆلودار, قوستاناي, اقمولا, تۇركىستان وبلىستارىندا 5 ملرد تەڭگەدەن استام سوماعا دارىلىك زاتتاردى تۇراقتاندىرۋ قورلارى جۇمىس ىستەيدى», دەدى ا. عينيات.
قالعان 9 ءوڭىر بويىنشا ءىرى كوتەرمە ءدارىحانا قويمالارىندا دارىلىك زاتتار قورى جاسالعان. ۆەدومستۆو باسشىسى ءدارى-دارمەكپەن قامتاماسىز ەتۋ ماسەلەلەرى ەرەكشە باقىلاۋدا ەكەنىن حابارلادى. قازاقستاندىق دەلەگاتسيانىڭ ازەربايجان مەن گرۋزياعا ساپارىنىڭ قورىتىندىسى بويىنشا بىرلەسكەن قۇجاتقا قول قويىلدى.
قر يندۋستريا جانە ينفراقۇرىلىمدىق دامۋ ۆيتسە-ءمينيسترى ب. قاماليەۆ قۇجاتتىڭ نەگىزگى ماقساتى ترانسكاسپي حالىقارالىق كولىك باعىتى بويىنشا تىعىز ىنتىماقتاستىقتى دامىتۋ جانە بىرىڭعاي لوگيستيكالىق كومپانيا قۇرۋ ەكەنىن اتاپ ءوتتى.
سونداي-اق قازاقستان, ازەربايجان جانە گرۋزيا اراسىنداعى بۇل باستاماعا تۇركيا رەسپۋبليكاسى قوسىلۋعا نيەتتى. اتالعان باعىت بويىنشا جۇك تاسىمالداۋ تۋرالى «قازاقستان تەمىر جولى» اق ۇك باسقارما توراعاسى ن. ساۋرانباەۆ باياندادى. ول بۇگىنگى تاڭدا جۇكتەردىڭ نەگىزگى نومەنكلاتۋرالارى (كومىر, كوكس, فەرروقورىتپالار جانە ت.ب.) بويىنشا ۆاگوندار مەن كونتەينەرلەر ارقىلى تاسىمالداۋعا ارنالعان كەشەندى تاريف مولشەرلەمەسى بەكىتىلگەنىن اتاپ ءوتتى. سونىمەن قاتار ن. ساۋرانباەۆ بۇعان دەيىن «اتامەكەن» ۇكپ مالىمدەگەندەي, قىتاي تاراپىنىڭ تەمىرجول تاسىمالى تاريفتەرىن ەداۋىر وسىرگەنىنە قاتىستى اقپاراتتىڭ راستالماعانىن حابارلادى.
بۇگىنگە دەيىن كۇندەلىكتى وتكىزىلىپ كەلگەن جەدەل شتاب وتىرىستارىن ەندى بيزنەس-قاۋىمداستىقتىڭ ءوتىنىشى بويىنشا ولاردىڭ سۇراقتارىنىڭ كەلىپ تۇسۋىنە قاراي اپتاسىنا ەكى رەت وتكىزۋگە شەشىم قابىلداندى. جەدەل شتابتىڭ كەلەسى وتىرىسى 17 ناۋرىزدا وتەدى.
