وسى دودادا دارالانعان دارابوزدار حالىقارالىق IMO وليمپياداسىنا قاتىسۋ ءۇشىن قازاقستاننىڭ ۇلتتىق قۇراماسىنا كىرۋ مۇمكىندىگىنە يە بولادى. وسىعان قوسا جۇلدەگەرلەردىڭ ديپلومدارى بولاشاقتا ۋنيۆەرسيتەتتەرگە تۇسۋدە ارتىقشىلىق بەرەدى. مىسالى, ەگەر ۇمىتكەرلەر بىردەي ۇپاي جيناسا, وندا باسىمدىق, ياعني وقۋعا ءتۇسۋ قۇقىعى وليمپياداشىعا بەرىلەدى.
ءال-فارابي اتىنداعى قازاق ۇلتتىق ۋنيۆەرسيتەتىندە وفلاين فورماتتا وتكەن «جىبەك جولى» وليمپياداسىنا قازاقستان, وزبەكستان, قىرعىزستان, تۇرىكمەنستان, تۇركيا, ازەربايجان, قىتاي, تاجىكستان جانە ۇلى جىبەك جولىنىڭ بويىندا ورنالاسقان باسقا دا ەلدەردەن وقۋشىلار قاتىستى.
«دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى تيمۋر نۇركەشوۆ: «بيىل «جىبەك جولى» ماتەماتيكالىق وليمپياداسىنا 10 ەلدىڭ كومانداسى قاتىستى. قازاقستاننان 7-11-سىنىپ ارالىعىنداعى 136 وقۋشى قاتىستى. ولاردىڭ بارلىعى – «ماتەماتيكا» ءپانى بويىنشا 2020-2021 وقۋ جىلىنىڭ رەسپۋبليكالىق وليمپياداسىنىڭ جانە رەسپۋبليكالىق جاسوسپىرىمدەر وليمپياداسىنىڭ وبلىستىق جانە قورىتىندى كەزەڭدەرىنىڭ جەڭىمپازدارى مەن جۇلدەگەرلەرى. «جىبەك جولى» وليمپياداسىنىڭ قورىتىندىسى بويىنشا ۇپايلار جەڭىمپازدارعا حالىقارالىق ماتەماتيكالىق وليمپياداعا (IMO) قاتىسۋ ءۇشىن قازاقستان رەسپۋبليكاسىنىڭ ۇلتتىق قۇراما كومانداسىنا كىرۋگە مۇمكىندىك بەرەتىنىن اتاپ وتكىم كەلەدى», دەيدى.
ۇيىمداستىرۋشىلاردىڭ ايتۋىنشا, وليمپيادانى ءار ەل ءوز اۋماعىندا وتكىزگەن. الايدا بارلىق مەملەكەتتەن كەلگەن زياتكەرلىك جارىسقا قاتىسۋشىلاردىڭ قورىتىندى ناتيجەلەرىن قازاقستاندا بولعان قازىلار القاسى قارادى.
وليمپيادا ناتيجەسى بويىنشا 8 وقۋشى I دارەجەلى, 14 وقۋشى II دارەجەلى جانە 24 وقۋشى III دارەجەلى ديپلومدارمەن ماراپاتتالدى. ال 2021 جىلى قازاقستاندىق زياتكەرلەر حالىقارالىق «جىبەك جولى» ماتەماتيكالىق وليمپياداسىندا 3 التىن, 19 كۇمىس جانە 27 قولا مەدال جەڭىپ العان بولاتىن.
