بۇل جولى ز.الدامجار اتىنداعى قوستاناي الەۋمەتتىك-تەحنيكالىق ۋنيۆەرسيتەتى جابىلدى. مينيسترلىكتىڭ مالىمدەۋىنشە, وسىعان دەيىن ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنە ۋنيۆەرسيتەت قىزمەتكەرلەرىنەن شاعىمدار ءتۇسىپتى. اتالعان شاعىمدار ۋنيۆەرسيتەتتە جوسپاردان تىس تەكسەرۋ جۇرگىزۋگە سەبەپ بولعان. ناتيجەسىندە, كوميسسيا تەكسەرۋ پاراعىنىڭ 46-تارماعىنىڭ 35-ءى بويىنشا زاڭسىزدىقتاردى انىقتادى.
ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى توراعاسىنىڭ ورىنباسارى مانشۇك ابدىكارىم: ء«بىزدىڭ باستى مىندەتىمىز – ەلىمىزدە ءبىلىم مەن كادرلار دايارلاۋدىڭ ساپاسىن ارتتىرۋ. ەگەر بۇگىن ۋنيۆەرسيتەتتەر ءتيىستى تالاپتارعا ساي بولماسا, وندا ەرتەڭ ءبىلىمى مەن بىلىكتىلىگى جۇمىس بەرۋشىلەردىڭ سۇرانىسىنا ساي كەلمەيتىن مامانداردى شىعارامىز. ارينە, تەكسەرۋ جانە ليتسەنزيانى قايتارىپ الۋ – ساپالى ءبىلىم بەرۋدى ەمەس, تەك پايدا تابۋدى ءبىرىنشى ورىنعا قوياتىندار ءۇشىن ءتيىمسىز شارا. مينيسترلىك ءبىرىنشى تەكسەرۋدەن كەيىن جوو باسشىلىعىنا بۇزۋشىلىقتاردى جويۋعا ۋاقىت بەرەدى. بىراق كوبىنە ولار سوت تالقىلاۋلارىنا ۋاقىت جۇمساۋدى ءجون ساناپ, كەمشىلىكتى جويۋعا اسىقپايدى. ارينە, بۇل ۋنيۆەرسيتەتتىڭ جابىلۋ ۋاقىتىن ەداۋىر كەشىكتىرىپ, ستۋدەنتتەردەن تولەم تۇرىندە كىرىس الۋعا مۇمكىندىك بەرەدى», دەيدى.
م.ابدىكارىمنىڭ ايتۋىنشا, ۋنيۆەرسيتەت قىزمەتىنە قاتىستى شاعىمدار 2020 جىلدان باستاپ تۇسە باستاعان.
كوميسسيا جۇمىسىنان سوڭ ۋنيۆەرسيتەت تاراپىنان تەكسەرۋ ناتيجەلەرىنە شاعىم تۇسكەن. الايدا ءبىرىنشى جانە ەكىنشى ساتىداعى سوتتاردىڭ شەشىمدەرىمەن كوميتەتتىڭ تەكسەرۋ ناتيجەلەرى بويىنشا بارلىق اكىمشىلىك اكتى وزگەرىسسىز قالدىرىلىپ, ۋنيۆەرسيتەتتىڭ شاعىمدارى قاناعاتتاندىرىلمادى. ەندى ونى جوعارعى سوت قارايدى.
سونىمەن قاتار كوميتەتتىڭ شەشىمىمەن ۋنيۆەرسيتەت باس ليتسەنزياسىنان ايىرىلدى. بۇل شەشىمگە قاتىستى دا ۋنيۆەرسيتەت تاراپى سوتقا شاعىمداندى.
