قازىرگى تاڭدا ۇكىمەت جەرگىلىكتى اتقارۋشى ورگاندارمەن جانە ۇيىمدارمەن بىرلەسىپ, مەملەكەتتىك ورگانداردىڭ نىساندارىن قالپىنا كەلتىرۋ جانە تارتىپسىزدىكتەر سالدارىنان زارداپ شەككەن كاسىپكەرلىك سۋبەكتىلەرىنە كەلتىرىلگەن زالالدى وتەۋ بويىنشا جۇمىس جۇرگىزىپ جاتىر.
قاڭتارداعى وقيعالار كەزىندە ەلىمىزدىڭ 8 وڭىرىندە 42 مەملەكەتتىك ورگان عيماراتىنا زالال كەلتىرىلدى. بۇل – الماتى, شىمكەنت قالالارى, الماتى, جامبىل, قىزىلوردا, اتىراۋ, اقتوبە جانە شىعىس قازاقستان وبلىستارى.
ر. سكلياردىڭ ايتۋىنشا, كەلتىرىلگەن شىعىننىڭ جالپى سوماسى شامامەن 30 ملرد تەڭگەنى قۇرادى, ونىڭ ىشىندە رەسپۋبليكالىق بيۋدجەتتەن 18 نىساندى قالپىنا كەلتىرۋگە 28 ملرد تەڭگە باعىتتالدى.
«بارلىق نىساندارعا تەحنيكالىق تەكسەرىس جۇرگىزىلدى, ونىڭ قورىتىندىسى بويىنشا 28 عيماراتقا الداعى جوندەۋ جۇمىستارىن جۇرگىزۋ, سونداي-اق 14 عيماراتقا كۇردەلى جوندەۋ جانە رەكونسترۋكتسيالاۋ جۇمىستارىنىڭ قاجەتتىلىگى انىقتالدى. بۇگىنگى تاڭدا 21 نىساندا جوندەۋ جۇمىستارى اياقتالدى. ناۋرىز ايىنىڭ سوڭىنا دەيىن 5 عيماراتقا, بيىلعى مامىر جانە ماۋسىم ايلارىندا قالعان 2 نىسانعا جوندەۋ جۇمىستارى جۇرگىزىلەدى», — دەدى ءبىرىنشى ۆيتسە-پرەمەر.
سونىمەن قاتار كۇردەلى جوندەۋ مەن رەكونسترۋكتسيالاۋدى قاجەت ەتەتىن 14 مەملەكەتتىك نىساندا جۇمىس جۇرگىزىلىپ جاتىر. كەستەگە سايكەس 7 عيماراتتا جۇمىستار ناۋرىز ايىندا, 5 نىساندا ماۋسىم ايىندا اياقتالادى.
«ەداۋىر كەلتىرىلگەن زاقىمدى ەسكەرە وتىرىپ, الماتى قالاسى اكىمدىگى مەن «قازاقستان» ترك عيماراتىن قايتا جاڭارتۋ جۇمىستارى بيىلعى قازان ايىندا اياقتالادى دەپ كۇتىلۋدە», — دەپ ناقتىلادى ر. سكليار.
بۇعان قوسا, تارتىپسىزدىك بارىسىندا 1 630 شوب سۋبەكتىسىنىڭ مۇلكىنە شامامەن 38,6 ملرد تەڭگەگە شىعىن كەلگەن.
قر پرەمەر-ءمينيسترىنىڭ ءبىرىنشى ورىنباسارىنىڭ ايتۋىنشا, مەملەكەت باسشىسىنىڭ كاسىپكەرلىك سۋبەكتىلەرىنە كەلتىرىلگەن زالالدى وتەۋ جونىندەگى تاپسىرماسىن ورىنداۋ اياسىندا تارتىپسىزدىكتەر سالدارىنان تۋىنداعان زارداپتاردى جويۋ جونىندەگى كوميسسيا قۇرىلدى. كوميسسيا وسى جىلعى 20 قاڭتاردا شوب سۋبەكتىلەرىنە كەلتىرىلگەن م ۇلىكتىك زياندى وتەۋ تەتىگىن قابىلدادى.
وتەماقى جەرگىلىكتى اتقارۋشى ورگان جانىنداعى وڭىرلىك كوميسسيالار كەلگەن زالال كولەمىن قۇجات نەگىزىندە راستاعاننان كەيىن جۇزەگە اسىرىلادى. بۇل ورايدا كاسىپكەرلەر فيسكالدىق دەرەكتەرگە سۇيەنە وتىرىپ, جەڭىلدەتىلگەن تارتىپپەن 10 ملن تەڭگەگە دەيىن الا الادى.
«تولەمدەر ۇكىمەتتىڭ رەزەرۆىنەن, سونداي-اق جەكە قورلار ەسەبىنەن بەرىلەدى. بيىلعى 11 ناۋرىزداعى جاعداي بويىنشا وڭىرلىك كوميسسيالار جالپى سوماسى 5,3 ملرد تەڭگەگە 1630 ءوتىنىشتىڭ 1 192-ءسىن ماقۇلدادى», — دەپ حابارلادى ر. سكليار.
قالعان 438 كاسىپكەر وتەماقىنى باعالاۋ راسىمدەرى اياقتالعاننان كەيىن الادى.
