قر سىرتقى ىستەر مينيسترلىگىنىڭ ءباسپاسوز قىزمەتىنىڭ مالىمەتىنشە, بيىلعى جىلدىڭ 9 ناۋرىزىندا نۇر-سۇلتان ۋاقىتى بويىنشا ساعات 16:02-دە اتىراۋ قالاسىنان كاتوۆيتسە قالاسىنا (پولشا) 4-ءشى ەۆاكۋاتسيالىق ۇشاق ۇشىپ شىقتى.
بۇعان دەيىن ءۇش رەپاترياتسيالىق رەيسپەن قازاقستانعا 432 قر ازاماتى جەتكىزىلدى.
قازىرگى ۋاقىتتا كاتوۆيتسە قالاسىندا 165 قازاقستاندىق بار. ۋكراينا-پولشا شەكاراسىن كەسىپ ءوتۋ كەزەگىندە قر ازاماتتارى جوق. لۆوۆتاعى قر قۇرمەتتى كونسۋلدىقتىڭ جانىنداعى ەۆاكۋاتسيالىق جيناۋ ورنىندا 11 ادام جينالدى, ال حاركوۆتا 7 وتانداسىمىز قالىپ وتىر.
ۋكرايناداعى قر ەلشىلىگىنىڭ اقپاراتىنا سايكەس, ماريۋپول قالاسىنداعى قر ازاماتتارىنىڭ جالپى سانى 18 ادامدى قۇرايدى. ەلەكتر ەنەرگياسى مەن تەلەفون جۇيەلەرىنىڭ ۇزىلۋىنە بايلانىستى بۇگىنگى تاڭدا ولارمەن بايلانىس ورناتۋ مۇمكىنشىلىك جوق. سۋمى قالاسىندا 2 قازاقستان ازاماتى بار, ولارمەن تۇراقتى بايلانىستامىز. اتالعان ازاماتتار گۋمانيتارلىق دالىزدەر ارقىلى ەۆاكۋاتسيالانادى دەپ كۇتىلۋدە, اتالعان دالىزدەردىڭ اشىلۋى رەسەي مەن ۋكراينا تاراپتارىمەن تالقىلانۋدا.
كيەۆ قالاسىنداعى جاعدايدىڭ ۇشىعۋىنا بايلانىستى قازاقستاندىق ديپلوماتتار لۆوۆ قالاسىنا ۋاقىتشا كوشىرىلدى جانە ولار قر ازاماتتارىنا كومەك كورسەتۋ جۇمىستارىن شتاتتىق رەجيمدە جالعاستىرۋدا.
«قر ديپلوماتتارىنىڭ كومەگىمەن 57 قازاقستاندىق اۋىر جۇك كولىگىنىڭ 44-ءى ۋكراينا اۋماعىنان شىقتى, ال قالعان 13 اۆتوكولىكتىڭ جۇرگىزۋشىلەرىنە جان-جاقتى كومەك كورسەتىلۋدە», دەلىنگەن حابارلامادا.
