اتالعان كونفەرەنتسيانى «دۋبنا» مەملەكەتتىك ۋنيۆەرسيتەتى, رەسەي جاراتىلىستانۋ عىلىمدارى اكادەمياسى, رەسەي گەولوگيالىق قوعامى جانە ۆ.ۆەرناندسكي اتىنداعى مەملەكەتتىك گەولوگيالىق مۇراجاي ۇيىمداستىرعان بولاتىن.
ايتا كەتۋ كەرەك, جەڭىمپاز جۇپ قازاقستاننان قاتىسقان جالعىز-اق كوماندا بولىپتى. ال جالپى, كونفەرەنتسيادا بۇلار ۇزدىك شىققان «ادامنىڭ شارۋاشىلىق قىزمەتىندە تاۋ جىنىستارى مەن مينەرالدارىن قولدانۋ» باعىتى بويىنشا 14 جوبا سىنعا تۇسكەن.
جوبا جەتەكشىسى – گەوگرافيا ءپانىنىڭ مۇعالىمى جانار بايمەتوۆانىڭ ايتۋىنشا, وقۋشىلار قاراعاندى اۋماعىندا كومىردىڭ پايدا بولۋىنىڭ گەولوگيالىق ەرەكشەلىكتەرىن جانە ونى زاماناۋي كومىر ونەركاسىبىندە قولدانۋ تەحنولوگياسىنىڭ قىر-سىرىن اشۋ جولىندا جەمىستى ەڭبەك ەتكەن.
ال داليلا قۋانىشوۆا اتالعان كونفەرەنتسياعا ەكى اي بويى دايىندالعاندارىن ايتادى.
– بۇل – ءبىزدىڭ ورتاق ەڭبەگىمىز. شىنىمدى ايتسام, ءبىرىنشى ورىن الامىز دەگەن وي ءۇش ۇيىقتاساق تۇسىمىزگە كىرمەگەن ەدى. قۋانىشىمىزدا شەك جوق. بۇل جەڭىس بىزگە سەنىمدىلىك بەردى, ىلگەرى جىلجۋعا ىنتالاندىرادى. الداعى ۋاقىتتاعى جوسپارىمىز زور. «كومىر ونەركاسىبىنىڭ ەكولوگياعا جانە قورشاعان ورتاعا اسەرىن ەسكەرە وتىرىپ دامۋى» تاقىرىبى بويىنشا جۇمىس ىستەيمىز دەگەن نيەتىمىز بار, – دەيدى د. قۋانىشوۆا.
قاراعاندى وبلىسى
