سوڭعى جىلدارى ستريمينگتىك پلاتفورمالار, ياعني فيلم, ۆيدەوعا ارنالعان سايتتاردىڭ تانىمالدىلىعى ارتتى. ولار دا قوعامنىڭ تامىرىن باسىپ, ارقاشان سۇرانىسقا قاراي جاۋاپ بەرىپ تۇرادى. سوڭعى جىلدارى الەمدە Netflix, Amamzon prime, Ivi سىندى پلاتفورمالاردىڭ تانىمالدىلىعى ارتتى. بىلتىر Netflix-كە جازىلۋشىلار سانى ملن-عا جەتكەن.
Netflix بۇعان دەيىن شىعارىلعان فيلمدەر ۇسىناتىن مەدياتەكا عانا ەمەس, جوعارىدا ايتقانىمىزداي ءوزى دە فيلم ءونىمىن جاساۋشى سانالادى. قوعامداعى وزەكتى تاقىرىپقا قاتىستى فيلم, حيكايالاردى دەر كەزىندە ۇسىنۋىمەن كوپتىڭ نازارىنا ىلىككەن پلاتفورمادا بۇگىندە 3 600-دەن استام فيلم, 1 800-گە جۋىق تەلەباعدارلاما بار. الايدا سوڭعى كەزدەرى كورەرمەندەر Netflix تاقىرىبىنىڭ تىم «تولەرانتتى» ارناعا بۇرىلىپ جاتقانىن ايتاتىندار از ەمەس. ماسەلەن, العاشىندا پالتفورمادا ەۆرەيلەر, ورتودوكسالدى ەۆرەيلەردىڭ ءومىرى, يزرايل قارۋلى كۇشتەرىنىڭ جۇمىسىنا قاتىستى فيلمدەر كوپتەپ شىعارىلدى. ودان كەيىن قوعامداعى ازشىلىقتار تاقىرىبىنا قاتىستى ءونىم كوبەيدى. ال ەندى Netflix ءونىمىنىڭ بارلىعىندا مىندەتتى تۇردە قارا ءناسىلدى اكتەر كورىنىس تاباتىنىن ايتىپ جۇرگەندەر از ەمەس.
ءبىز سوڭعى كەزدەرى الەۋمەتتىك جەلىلەردە كوپتەپ تالقىلانعان بىرنەشە فيلم مەن ونىڭ تاقىرىبىنا توقتالماقپىز. بيىل پالتفورمادا «Tinder-دەگى الاياق» ءفيلمى مەن «اننانى ويلاپ تابۋ» حيكاياسى جارىق كوردى. جاريالانعان كۇنىنەن كوپ ۇزاماي قارالىم سانى ارتىپ, كوپ تالقىلانعان ونىمدەر قاتارىنا ەندى. كوپتىڭ نازارىنا ىلىگۋىنىڭ باستى سەبەبى – شىنايى وقيعا نەگىزىندە ءتۇسىرىلۋى. ەكى فيلم دە زامانداستارىمىز تۋرالى. ياعني الدانعان مەن الداعان تاراپ جايلى. «Tinder-دەگى الاياق» فيلمىنە الدانعان تاراپتىڭ ءوزى بايانداۋشى رەتىندە كورىنەدى. ءبىر توپ قىز Tinder دەپ اتالاتىن تانىسۋعا ارنالعان الەۋمەتتىك جەلىدە سىمباتتى ازاماتپەن تانىسىپ, الدانىپ, بۇگىندە ميلليونداعان قارىزدى تولەۋگە ءماجبۇر ەكەنىن ايتىپ بەرەدى. ءبىر قىزىعى, فيلم رەجيسسەرى فەليسيتي مورريس تۋىندىعا تۇسۋگە الگى «الاياقتىڭ» ءوزىن دە شاقىرعان. الايدا شيمون حايۋت ەسىمدى يزرايل ازاماتى ۇسىنىستان باس تارتقان.
«اننانى ويلاپ تابۋ» حيكاياسى ورىس قىزى اننا سوروكينا تۋرالى. ءوزىن باي نەمىس وتباسىنىڭ مۇراگەرى اننا دەلۆي دەپ تانىستىرعان بويجەتكەن نيۋ-يورك بۋرجۋاسىن الداپ سوققان. الداۋمەن قاتار بىرنەشە ميلليونىن قولدى ەتكەن.
ودان كەيىن پلاتفورمادا «قالىس قالعان» امەريكالىق سەريالدى نازارعا ۇسىندى. بۇل دا جوعارىدا اتالعان تۋىندىلار سارىنىندا. بۇل پلاتفورماداعى الاياقتار تۋرالى تۋىندىلاردىڭ جارتىسى عانا. الاياق كاسىپكەردەن بولەك الاياق دارىگەر تۋرالى دا ءفيلمدى تابۋعا بولادى. الايدا بۇل تاقىرىپتىڭ كوپكە قىزىق بولۋىنا نە سەبەپ؟ الاياقتار جاڭا جانر, جاڭا كەيىپكەر ەمەسى انىق. ماسەلەن, باس كەيىپكە شىن مانىندە الاياق بولىپ شىعاتىن « ۇلى گەتسبي» كينوكارتيناسى كينو الەمىندەگى بىرقاتار ماراپاتتى جەڭىپ الدى.
بۇل تۋىندىلاردان ساباق الىپ نە ومىردە قايتالايمىن دەۋشىلەر از. كينوسىنشىلار بارلىق سەبەپتى كارتينانىڭ ديناميكاسى مەن وقيعا جەلىسىنىڭ كورەرمەندى «ۇستاپ وتىرۋىندا» دەيدى. الاياق ماقساتىنا جەتۋ ءۇشىن ءتۇرلى ستسەناري قۇرىپ, ايلا-ءتاسىل قولدانادى, وزگەنىڭ سەنىمىنە كىرىپ, ساناسىن ۋلايدى. الاياقتار تاقىرىبىن زەرتتەپ, جۋرناليستىك زەرتتەۋىن فيلم باعدارلاماسى رەتىندە ۇسىنعان جۋرناليست ادۆا دادون بۇل كارتينالاردىڭ تارتىمدى بولۋىنا مىناداي سەبەپ ايتادى: «الاياقتىڭ قىلمىس ورنى – ونىڭ شەكسىز ويى». راسىمەن, كەيىپكەردىڭ شەكسىز ويى مەن بىتپەس ايلاسىنا ءتانتى بولعان كورەرمەن كەيدە الاياققا ىشتەي ريزا بولىپ, كەيدە جاپا شەككەنگە بولىسىپ وتىرادى. مۇنداي تۋىندىنىڭ ءىش پىستىرماسى انىق.
دەسە دە بۇل تاقىرىپتىڭ ءبىزدىڭ قوعامعا دا جات ەمەسىنە كۇندەلىكتى جاڭالىقتار دالەل. كۇن سايىن وتانداستارىمىزدىڭ «الدانىپ قالعانى» تۋرالى حابارلاردى كوزىمىز شالادى. قارجى پيراميداسىنىڭ قۇرباندارىنىڭ قاتارىنا الەۋمەتتىك جەلىدە تانىسقان ادامىنا نەسيە الىپ بەرگەن, بوپسالاۋعا ۇشىراعان دەگەندەر دە قوسىلدى. ودان بولەك وزدەرىن بانك قىزمەتكەرى رەتىندە تانىستىرعانعا قىرۋار قارجىسىن سەنىپ تاپسىرعاندار دا ارامىزدا تولىپ ءجۇر. سوندىقتان جوعارىداعى فيلمدەردىڭ ەلىمىزدە دە تانىمال بولۋى تاڭعالاتىن قۇبىلىس ەمەس. نەگىزگى ماسەلە –
فيلمنەن ساباق الۋ. اسىرەسە, جاسوسپىرىمدەر دە قاپەرىنە السا دەيمىز. ويتكەنى الەۋمەتتىك جەلى بارىمىزگە ورتاق, الايدا ونى قولدانۋ ماقساتى اركىمدە ءارتۇرلى.
