«ۇيىمداردا ەڭبەك زاڭناماسىنىڭ ساقتالۋىنا مەملەكەتتىك باقىلاۋدى قامتاماسىز ەتۋ, قاۋىپسىز ەڭبەك جاعدايلارىنا قۇقىقتى قوسا العاندا, قىزمەتكەرلەردىڭ قۇقىقتارى مەن بوستاندىقتارىن قورعاۋ ماقساتىندا الەۋمەتتىك ءال-اۋقات باسقارماسىن ودان ەڭبەك ينسپەكتسياسى باسقارماسىن ءبولۋ ارقىلى قايتا ۇيىمداستىرۋ ۇسىنىلادى», دەپ مالىمدەدى نۇرپەيىسوۆ.
سونداي-اق ونىڭ ايتۋىنشا, كرەاتيۆتى يندۋستريا باسقارماسىن جوعارىدا اتالعان قوعامدىق دامۋ باسقارماسىنىڭ فۋنكتسيالارىن بەرە وتىرىپ, جاستار ساياساتى باسقارماسى دەپ قايتا اتاۋ ۇسىنىلادى.
بۇل رەتتە كرەاتيۆتى يندۋستريالاردى دامىتۋ جونىندەگى فۋنكتسيونال كاسىپكەرلىك جانە ينۆەستيتسيالار باسقارماسىنا بەرىلەتىن بولادى.
«جوبا ەنەرگوتيىمدىلىك جانە ينفراقۇرىلىمدىق دامۋ باسقارماسىن ەنەرگەتيكا جانە سۋمەن جابدىقتاۋ باسقارماسىنا, تۇرعىن ءۇي ساياساتى باسقارماسىن كوممۋنالدىق ينفراقۇرىلىمدى دامىتۋ باسقارماسىنا, جاسىل ەكونوميكا باسقارماسىن ەكولوگيا جانە قورشاعان ورتا باسقارماسىنا, جايلى قالالىق ورتا باسقارماسىن قۇرىلىس باسقارماسىنا, قوعامدىق دەنساۋلىق باسقارماسىن قوعامدىق دەنساۋلىق ساقتاۋ باسقارماسىنا قايتا اتاۋدى كوزدەيدى», دەپ قورىتىندىلادى الماتى اكىمى اپپاراتىنىڭ باسشىسى.
