ى.التىنسارين اتىنداعى №159 گيمنازيادا وتكەن كەزدەسۋدە پارلامەنت ءماجىلىسىنىڭ دەپۋتاتى جۇلدىز سۇلەيمەنوۆا, مەدەۋ اۋدانىنىڭ اكىمى اسەت ماساباەۆ, Abai University رەكتورى دارحان ءبىلالوۆ جانە قالالىق ءبىلىم باسقارماسىنىڭ وكىلدەرى قالا مەكتەپتەرىنىڭ ديرەكتورلارى ساپالى مامان دايارلاۋ ماسەلەسىندەگى وزەكتى جايتتارعا نازار اۋداردى.
پرەزيدەنتتىڭ ەلىمىزدىڭ دامۋىنا قاتىستى تاپسىرمالارىنا توقتالعان ج.سۇلەيمەنوۆا پەداگوگ كادرلاردىڭ تاپشىلىعى, ينكليۋزيۆتى ءبىلىم بەرۋ ماسەلەلەرى, مۇعالىمدەردىڭ دەڭگەيىن كوتەرۋ, وقۋلىقتاردىڭ ساپاسىن ارتتىرۋ, قالا مەن اۋىل اراسىنداعى ءبىلىم سالاسىنداعى الشاقتىقتى جويۋعا بايلانىستى كەشەندى شارالار تاياۋ ۋاقىتتا جۇزەگە اسۋى تيىستىگىن العا تارتتى. سونىمەن قاتار مەكتەپتەر مەن بالاباقشالارداعى تاربيە ساپاسى, بىلىكتى باسشىلاردىڭ زاماناۋي تاربيەدەگى رولىنە قاتىستى باسىمدىقتار ايتىلدى.
ەلىمىزدەگى پەداگوگ كادرلاردى دايارلاۋداعى كوشباسشى وقۋ ورنىنا ارتىلار جاۋاپكەرشىلىك جوعارى. وسى ورايدا Abai University رەكتورى دارحان ءبىلالوۆ مەكتەپ ديرەكتورلارىنىڭ ءبىلىم ساپاسىن ارتتىرۋداعى ءرولىنىڭ جوعارى ەكەنىن, سونداي-اق ولاردىڭ باسقارۋ تەتىكتەرىن عانا ەمەس, مەكتەپ تۇلەكتەرىنىڭ قوعاممەن ىقپالداستىعى, تۇلعا بولىپ قالىپتاسۋى, ءوز قالاۋىنا وراي ماماندىق تاڭداۋى مەن كەلەشەكتە جۇمىسقا ورنالاسۋىنا دا ىقپال ەتۋى ءتيىس ەكەنىن اتاپ ءوتتى.
بۇعان قوسا د.ءبىلالوۆ كادر تاپشىلىعى, قالالىق جانە اۋىلدىق مەكتەپتەردەگى ءبىلىم بەرۋدەگى الشاقتىقتى جويۋ, پەداگوگتەردىڭ مارتەبەسى مەن ولاردىڭ بىلىكتىلىگىن ارتتىرۋ جوبالارىنىڭ, ءبىلىم بەرۋ باعدارلامالارىن ازىرلەۋدە قاپەرگە الاتىن ناقتى ماسەلەلەردى اتاپ ءوتتى.
بۇگىندە «ۋنيۆەرسيتەت – مەكتەپ» جوباسىندا تاراپتار بىرلەسىپ جۇمىس ىستەۋى شارت. وسى ورايدا نەگىزگى ءۇش باعىت بويىنشا جۇمىستار جولعا قويىلعان. بۇل باعىتتاعى جۇمىستارعا جوعارى كاسىبي مەنەدجەرلەردىڭ, تالانتتى كوشباسشى باسشىلاردىڭ كادرلىق رەزەرۆىن قالىپتاستىرۋ, دۋالدى جانە ينكليۋزيۆتى ءبىلىم بەرۋدى دامىتۋ قامتىلادى.
كەزدەسۋ بارىسىندا دەپۋتات ج.سۇلەيمەنوۆا ايتىلعان ماسەلەلەردى باقىلاۋعا الۋعا ۋادە ەتتى. ەلىمىزدەگى مەكتەپتەردى بىلىكتى كادرلارمەن قامتاماسىز ەتۋدە پەداگوگيكالىق ماماندىقتار بويىنشا وقيتىن ستۋدەنتتەرگە تەرەڭ ءبىلىم بەرۋ جانە كاسىبي داعدىلاردى قالىپتاستىرۋ – ءجيى قوزعالاتىن ماسەلە. وسى ورايدا الەمنىڭ كوپتەگەن ۋنيۆەرسيتەتىندە قولدانىلىپ جۇرگەن, سونداي-اق ءبىلىم بەرۋ ساپاسىن ارتتىرۋ جانە جوعارى كاسىبي مۇعالىمدەردى دايارلاۋدى جاقسارتۋ بويىنشا باسقا دا جوبالاردىڭ ماڭىزدىلىعى ايتىلدى.
الماتى
