ءتۇرلى ءتۇستى تەكەمەتتەر, كيىزدەن باسىلعان بۇيىمدار, باس كيىمدەر, قامىستان ورىلگەن ابزەلدەر, اعاشتان جونىلعان توستاعاندار, استاۋلار, بىلعارى بلوكونتتار, تاعى دا باسقا قولونەر بۇيىمدارىنىڭ ارقايسىسىنا نازار اۋدارماي كەتە المايسىز. ءار كومپوزيتسيانىڭ ەرەكشە ناقىشتا ورىندالعانى ونىڭ ءسانىن عانا ەمەس, قۇنىن دا اسپەتتەپ تۇرعانداي.
قازاقستان قولونەرشىلەر پالاتاسىنىڭ ۇيىمداستىرۋىمەن ەكى كۇن قاتارىنان وتكەن بۇل كورمەنىڭ جىل سايىن جىبەك جولى كوشەسىنىڭ بويىندا ءوتۋى جايدان-جاي ەمەس. ۇيىمداستىرۋشىلاردىڭ ايتۋىنشا, تابيعي ونىمدەردەن جوعارى تالعاممەن جاسالعان كوركەم دۇنيەلەردى كەلۋشىلەر ۇلى جىبەك جولىنىڭ بويىمەن وتكەن ساۋدا كەرۋەنىنىڭ زاماناۋي فورماسى رەتىندە قابىلدايدى. سوڭعى ون جىلدان استام ۋاقىتتان بەرى ءداستۇرلى شاراعا اينالعان قولونەر كورمەسىنە الماتىلىقتار عانا ەمەس, ەلىمىزدىڭ باسقا وڭىرلەرىنەن دە شەبەرلەر قاتىسۋدا.
بۇگىندە شەبەرلەر قولونەرلىك كاسىپتى جەكە كاسىپكەرلىكپەن ۇشتاستىرىپ, وسى سالانى دامىتۋعا بارىنشا ۇلەس قوسىپ كەلەدى. قازاقستاندىق شەبەرلەر جاساعان بۇيىمدار ەلىمىز عانا ەمەس, ەۋروپا, ورتالىق ازيا ەلدەرىنە دە تانىمال. بۇل كورمەنىڭ الەۋمەتتىك سيپاتى دا باسىم. قازاقستان قولونەرشىلەر پالاتاسى وسى جوبا اياسىندا الەۋمەتتىك قورعاۋعا مۇقتاج ازاماتتاردى ءجۇن مەن كيىزدەن بۇيىمدار دايىنداۋعا وقىتۋ, زاعيپ جانداردى ءجۇن مەن بىلعارىدان بۇيىمدار وڭدەۋگە جانە دايىنداۋعا, جۇمىسسىزداردى كۇمىس پەن مەلحيوردان زەرگەرلىك بۇيىمدار جاساۋعا ۇيرەتۋدى دە ماقسات ەتىپ كەلەدى.
الماتى
