قولىنداعى بارىن ءبولىسىپ, جارىم كوڭىل جانداردىڭ جاڭا مەكەنگە ءسىڭىسىپ كەتۋىنە سەپ بولىپتى. بۇل سوناۋ قيىردان كەلىپ, قازاق جەرىنە قونىس تەپكەندەردىڭ بۇگىنگى ۇرپاعى ماڭگى ۇمىتپايتىن تاريح.
جەرگىلىكتى حالىقپەن بىتە قايناسىپ, ەل باقىتىن بىرگە قالاسقان سول اتالارىمىز وزىنەن كەيىنگىلەرگە قيىن كەزدە قاناتىنىڭ استىنا العان حالىقتى, ورتاق وتانىمىز – قازاقستاندى قۇرمەتتەۋدى تابىستاپتى. ءبىزدىڭ بىرلىگىمىزدىڭ قازىعى وسىلاي قاعىلعان.
مەن دۇنيەگە كەلگەن اقمايا اۋىلىندا كوپتەگەن ەتنوس وكىلدەرى تاتۋ-ءتاتتى عۇمىر كەشىپ وتىر. وسى اۋىلداعى قازاق مەكتەبىندە ءبىلىم الدىم. مەكتەپتە وقىپ جۇرگەن كەزىمنەن «اباي وقۋلارىنا» قاتىسىپ, الەمدىك اقىل-ويدىڭ شىڭىنا جەتكەن دانانىڭ 200-گە جۋىق ولەڭىن جاتتادىم. ودان بولەك, ءبىر پوەماسىن باستان-اياق ايتا الامىن. وسىلايشا ۇلى ويشىلدىڭ ىزگىلىككە سالعان رۋحاني جولى ءتۇرلى ۇلتتاردى ءبىر-بىرىنە جاقىنداستىرا تۇسكەنىنە كوزىم جەتتى. قازىر قورقىت اتا اتىنداعى قىزىلوردا ۋنيۆەرسيتەتىندە قازاق ءتىلى مەن ادەبيەتى ماماندىعى بويىنشا ءبىلىم الىپ جاتىرمىن.
بۇگىندە جالپىحالىقتىق مەرەكەگە اينالعان العىس ايتۋ كۇنى – ءبىزدىڭ ورتاق تاريحىمىزدىڭ سيمۆولى. قازاقستان قۇتتى قونىسىنا اينالعان ءتۇرلى ەتنوستاردىڭ ميلليونداعان وكىلدەرىنىڭ قازاق حالقىنا تەرەڭ تاعزىمىنىڭ بەلگىسى. باستارىنا تۇسكەن اۋىرپالىقتى قايىسپاي بىرگە كوتەرە بىلگەن جۇرتقا دەگەن جۇرەكجاردى ريزاشىلىعى. مەيىرىم مەرەكەسىنە اينالعان اتاۋلى كۇن كەشەگىگە دەگەن قۇرمەت قانا ەمەس, ءبىرتۇتاس ەلدىڭ ەرتەڭىنە سەنىمنىڭ ايعاعى. «كەڭ بولساڭ, كەم بولمايسىڭ» دەگەن تاعىلىمدى ءتامسىلدى ۇستاناتىن قازاق ۇلتىنا العىس ايتۋ, كەشەگى قيىندىقتى كوزىمەن كورگەن الدىڭعى بۋىننىڭ بىزگە دەگەن اماناتى. بۇل كۇنى ءبىز بابالارىمىزدى ريزاشىلىقپەن ەسكە الامىز, اتا-انالارىمىزعا, مۇعالىمدەرىمىزگە, دوستارىمىزعا, سوڭعى جىلدارى ىندەتپەن كۇرەسىپ, مىڭداعان جاندى اجال تىرناعىنان اراشالاپ جاتقان دارىگەرلەرگە العىس ايتامىز.
ەلەنا پاك,
قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ 4-كۋرس ستۋدەنتى
