«قىسقى وليمپياداداعى ناتيجە كوڭىل كونشىتپەيدى. توكيوداعى سايىستا تەك قولامەن شەكتەلدىك. بەيجىڭنەن مۇلدە جۇلدەسىز ورالعان ۇلتتىق قۇراماعا قوعام رەنجۋلى. كوپشىلىكتىڭ سىنى ورىندى دەپ ويلايمىن. ەكى وليمپياداداعى ناتيجەمىز سپورت سالاسىندا قوردالانعان ماسەلەلەردىڭ بار ەكەنىن كورسەتىپ بەردى», دەدى مادەنيەت جانە سپورت ءمينيسترى داۋرەن اباەۆ.
مينيستر بۇل ماسەلەنى شەشۋ جولى – جۇيەلى جۇمىس ەكەنىن اتاپ ءوتتى. «الداعى ءتورت جىلدىڭ ىشىندە جاعدايدى وزگەرتە سالۋ وڭاي ەمەس. بۇعان تاڭدا ۋاقىت كەرەك. ول ءۇشىن بارلىق دەڭگەيدەگى سپورتشىلاردى دايىنداۋ جۇيەسىنە سپورت سەكتسيالارىنان باستاپ وليمپيا ويىندارىن قالىپتاستىرۋعا دەيىنگى كەشەندى وزگەرىستەر قاجەت. بۇگىنگى كۇنى ءبىزدىڭ الدىمىزدا تۇرعان ۇلكەن مىندەت – سپورتتى دامىتۋ باعدارلاماسىنىڭ باستاماسىن ازىرلەۋ. وعان سپورت نىساندارىنىڭ قۇرىلىسىنان باستاپ, جارىس كۇنتىزبەلەرى مەن وقۋ-جاتتىعۋ جيىندارىن جۇيەلەۋ, كاسىپتىك جانە بۇقارالىق سپورتتى قارجىلاندىرۋداعى بالانستى ورناتۋ, بارلىق دەڭگەيدەگى سپورت مەكتەپتەرىن كادرلارمەن قامتاماسىز ەتۋ. تورەشىلەردى, جاتتىقتىرۋشىلاردى, سپورت دارىگەرلەرىن دايارلاۋ جانە وسى سەكىلدى اتقارىلار جۇمىستار كوپ. ازىرلەنگەن دامۋ جوسپارىن ەل پرەزيدەنتىمەن كەلىسىپ, ونى جۇزەگە اسىرۋعا كىرىسەمىز. قازاقستاندىق سپورتشىلاردى دايىندايتىن «پاريج-2024» جانە «ميلان-2026» ارنايى باعدارلامالارى دا وسى جوباعا ەنگىزىلەدى. بار جاۋاپكەرشىلىك پەن جۇزەگە اسىرۋ جۇمىسىن مينيسترلىك ءوز مىندەتىنە الۋعا دايىن», دەدى د.اباەۆ.
سونداي-اق مينيستر سپورتتى دامىتۋ باعدارلاماسىن ازىرلەۋدى سپورتشىلاردى دايارلاۋ جۇيەسىنە تاۋەلسىز كەشەندى تەكسەرۋ جاساۋدان باستاۋ كەرەك ەكەنىن ايتتى. سونىمەن قاتار ول ۇلتتىق قۇراما سپورتشىلارىنا قاجەت قولجەتىمدى ينفراقۇرىلىم, بىلىكتى جاتتىقتىرۋشىلار تاپشىلىعى, از جالاقى الاتىن سپورت تورەشىلەرىنىڭ ماسەلەلەرىنە توقتالدى.
جيىن بارىسىندا ۆەدومستۆو باسشىسى بياتلون مەن شاڭعى جارىسىن دامىتۋ بويىنشا پيلوتتىق جوبانىڭ باستالعانىن جەتكىزدى.
مينيستر سپورتتىق رەزەرۆتى ساپالى دايىنداۋ قاجەتتىگىنە دە باسا نازار اۋداردى. 2022 جىلدىڭ 1 ساۋىرىنەن باستاپ رەسپۋبليكالىق دەڭگەيدە وليمپيادالىق سپورت تۇرلەرى بويىنشا ۇلتتىق قۇرامالاردىڭ سپورتشىلارىن دايىنداۋ فۋنكتسيالارىن ادەتتەگىدەي ۇلتتىق وليمپيادا كوميتەتى ەمەس, مادەنيەت جانە سپورت مينيسترلىگى جانىنداعى سپورتتى دامىتۋ جونىندەگى رەسپۋبليكالىق ديرەكتسياسى جۇزەگە اسىرادى. مينيستر جاۋاپتى ۆيتسە-مينيسترگە ديرەكتسيا قىزمەتىنىڭ قىسقا جانە ورتا مەرزىمدى كەزەڭگە ارنالعان جۇمىس جوسپارىن ازىرلەۋدى تاپسىردى.
«سىزدەن سۇرايتىنىم, ۇلتتىق قۇرامالاردىڭ دايىندىعىن تياناقتى جوسپارلاۋعا ءمان بەرىڭىز. ۇلتتىق وليمپيادا كوميتەتىنىڭ كۇنتىزبەلىك جوسپارىنا قايتا-قايتا وزگەرتۋ مەن تولىقتىرۋلار ەنگىزۋدى توقتاتاتىن كەز جەتتى. وسىنداي جۇيەسىز جوسپارلاۋدىڭ كەسىرىنەن ءبىز اقشانىڭ كوپ بولىگىن سپورتشىلاردىڭ اۋە بيلەتىنە جۇمسايمىز. ويتكەنى تىعىز الىنادى. سونداي-اق ديرەكتسيا ادىستەمە, كۇنتىزبە, سپورتشىلاردىڭ وقۋ-جاتتىعۋ بارىسى بويىنشا جوسپارلار مەن ەسەپتەردى قاتاڭ باقىلاۋعا الۋى كەرەك», دەدى د.اباەۆ.
ۇلتتىق وليمپيادا كوميتەتى سپورت ديرەكتسياسىنىڭ باسشىسى ەلسيار قاناعاتوۆ XXIV قىسقى وليمپياداداعى قىسقى سپورت تۇرلەرى بويىنشا ۇلتتىق قۇراما قورىتىندىسىن جاريالادى. ول ابزال اجىعاليەۆتىڭ, كونكيشى نادەجدا موروزوۆانىڭ جەتىستىگىن ەرەكشە اتاپ ءوتتى.
«وليمپيادانىڭ ناتيجەسى بىزگە سايكەس كەلمەيدى. جاستار العا ۇمتىلۋى كەرەك. 30 جاستاعى سپورتشىلاردىڭ باسەكەلەس ءىزباسارلارى جوقتىعىن كورسەتەدى. كوروناۆيرۋس ىندەتى گالىشەۆاعا اسەر ەتتى, قالمىرزاەۆاعا دا كارانتيندە شەكتەلۋگە تۋرا كەلدى. كونكيمەن جۇگىرۋ سپورتى دەگەندە قازاقستاندىق سپورتشىلاردان ەسىمىزگە ءبىرىنشى بولىپ دەنيس كۋزين تۇسەتىنى جاسىرىن ەمەس. بىراق كۋزين دۇنيەگە كەلگەن قوستاناي قالاسىندا مۇزايدىن كەشەنى جوق, ەسەسىنە فۋتبول ستاديونى سالىنىپ جاتىر. ەگەر ءسىزدىڭ وڭىردەن وسى سپورت تۇرىنەن الەم چەمپيونى شىققان بولسا, نەگە جابىق مۇزايدىن سالماسقا؟! مينيسترلىك باسشىلىعىنان وسى ماسەلەلەرگە نازار اۋدارۋدى سۇرايمىن. شورت-ترەك قازىرگى تاڭدا فريستايل موگۋل, فريستايل اكروباتيكا سەكىلدى الەمدىك سپورتتىڭ ەليتاسى سانالادى. فەدەراتسيالار سپورتتىڭ بۇل ءتۇرىن باعدارلاماعا ەنگىزىپ, ايماق سپورتشىلارى جۇمىلدىرىلۋى كەرەك. سەبەبى الەم تاجىريبەسىندە سپورتقا, ەڭ الدىمەن, فەدەراتسيالار جاۋاپتى. ءبىز سپورتتىق مەديتسيناعا كوڭىل بولە باستادىق, 3 وبلىستا ورتالىقتار جابدىقتالدى. عىلىم بويىنشا – گەنەتيكالىق زەرتتەۋلەر جۇرگىزە باستادىق», دەدى ە.قاناعاتوۆ.
موگۋل فريستايلدان باس جاتتىقتىرۋشى ەلەنا كرۋگلىحينا قىسقى سپورت تۇرلەرىنەن جوعارى ساپالى ينفراقۇرىلىمى مەن 50 جىلدان اسا ءتيىمدى باسقارۋ ينستيتۋتتارى قالىپتاسقان اقش, رەسەي, نورۆەگيا, جاپونيا, شۆەتسيا باسقا دا ەلدەردىڭ سپورتشىلارىمەن سالىستىرعاندا قازاقستاندىق سپورتشىلاردىڭ باسەكەگە قابىلەتتى ەكەندىگىنە نازار اۋداردى.
«بىزگە رەزەرۆتىك كەشەندەر قاجەت. وقۋشى ساباقتان شىققان سوڭ جاتتىعاتىن ورىن جوق. سونداي-اق سپورتشىلارىمىز قاتىساتىن سايىستاردى باق-تا تىكەلەي ەفيردە كورسەتۋ ماڭىزدى. تورەشىلەر ادەتتە كانادا نەمەسە فرانتسيا سپورتشىلارىنىڭ ۇپايىن ارتتىرىپ جىبەرەدى. ويتكەنى ولاردى كورىپ, تاماشالاپ وتىرعان الىپ كۇش بار, ول – تەلەۆيزيالىق اۋديتوريا», دەدى ە.كرۋگلىحينا.
شاڭعى جارىسى بويىنشا باس جاتتىقتىرۋشى الەكساندر باتيايكين رەسپۋبليكا كولەمىندە بۇقارالىق سپورتتىق شارالاردى وتكىزۋ, وڭىرلەردەگى بالالار جاتتىقتىرۋشىلارىنا جاعداي جاساۋ, ونىڭ ىشىندە جالاقى كوتەرۋ, زاماناۋي سپورتتىق قۇرال-جابدىقتارمەن قامتاماسىز ەتىپ, ادىستەمەلەر ازىرلەۋ سەكىلدى ماسەلەلەرگە توقتالدى. سونداي-اق ول ءوز شاكىرتتەرىنىڭ وليمپياداداعى تومەن ناتيجەسى ءۇشىن كەشىرىم سۇرادى.
ۇلتتىق شاڭعى قاۋىمداستىعىنىڭ باس حاتشىسى اسقار ۆاليەۆ شاڭعىنىڭ فريستايل, ترامپليننەن سەكىرۋ, سكانديناۆيالىق كومبيناتسيا جانە تاۋ شاڭعىسى بويىنشا ۇلتتىق قۇرامالاردىڭ ناتيجەلەرىنە تالداۋ جاسادى.
«بۇل سپورت تۇرلەرىنىڭ دامۋى ءۇشىن 20, 40, 60 مەترلىك جاتتىعۋ ترامپليندەرى قاجەت. ەلىمىزدە تاۋ شاڭعىسىن دامىتپاۋ – وتە ۇيات دەپ سانايمىن. فريستايل-اكروباتيكا – وتە اسەرلى كورىنىس. ءبىزدىڭ سپورتشىلار ءۇش قارعىپ سەكىرۋگە باردى. بۇل – قولداۋدى قاجەت ەتەتىن پەرسپەكتيۆالىق كوزقاراس. جالپى, جازعى دايىندىققا ارنالعان ترامپلين نۇسقاسىن قاراستىرىپ جاتىرمىز», دەدى ا.ۆاليەۆ.
جيىن سوڭىندا قىسقى سپورت تۇرلەرى بويىنشا رودو ديرەكتورى مۇراتبەك قىپشاقباەۆ جيىنعا قاتىسۋشىلاردى شورتاندى قالاسىنداعى ۇلتتىق شاڭعى ورتالىعىمەن تانىستىردى. سونداي-اق ولار مادەنيەت جانە سپورت مينيسترلىگىنىڭ تاپسىرىسى بويىنشا رەجيسسەر الديار بايراكيموۆ تۇسىرگەن «پاراليمپياداشى» ءفيلمىنىڭ الدىن الا كورسەتىلىمىنە قاتىستى.
