فوتو: gov.kz
قورعانىس مينيسترلىگىنىڭ مالىمەتىنشە, استانانىڭ جيناۋ پۋنكتىندە باستى نازار تسيفرلىق شەشىمدەرگە اۋدارىلعان. «Smart-ۆوەنكومات» جانە «e-مەدوسموتر» جوبالارى راسىمدەردى جىلدامداتۋعا, ادام فاكتورىن ازايتۋعا جانە شاقىرۋ پروتسەسىن بارىنشا اشىق ەتۋگە مۇمكىندىك بەرەدى.
سونداي-اق قورعانىس ىستەرى جونىندەگى دەپارتامەنتى, اكىمدىك جانە ارداگەرلىك ۇيىمداردىڭ وكىلدەرىمەن بىرگە اسكەردى جاساقتاۋ جانە بارلىق قاتىسۋشى قۇرىلىمداردىڭ ءوزارا ءىس-قيمىلى ماسەلەلەرى تالقىلاندى.
جيىندا اسكەرگە شاقىرىلۋشىلارعا ەرەكشە نازار اۋدارىلدى. اشىق اڭگىمە بارىسىندا گەنەرال-مايور اسقار مۇستابەكوۆ ولاردىڭ كوڭىل كۇيى, تۇرعىلىقتى جايى جانە قىزمەتكە دايىندىقتارى تۋرالى سۇرادى. جاستارعا «سروچنيك 2.0» باعدارلاماسىنىڭ ارتىقشىلىقتارى مەن بۇل باعدارلاما قىزمەتتەن كەيىن ەلدىڭ جەتەكشى جوعارى وقۋ ورىندارىنا تۇسۋگە مۇمكىندىك بەرەتىنى ايتىلدى.
«توعىزىنشى سىنىپتان كەيىن اسكەري كوللەدجگە تۇسكىم كەلدى, بىراق مۇمكىندىك بولمادى. ۋنيۆەرسيتەتتى بىتىرگەن سوڭ اسكەرگە بارۋعا, مىندەتتى قىزمەتتى وتەۋگە ناقتى شەشىم قابىلدادىم. قازىر مەديتسينالىق تەكسەرۋدەن ءوتىپ, مكق قاتارىنا قۇجات جيناپ ءجۇرمىن», دەدى اسكەرگە شاقىرىلۋشى التاير ساكەن.
كوكتەمگى اسكەرگە شاقىرۋ: ءوتىنىمدى ەندى ونلاين بەرۋگە بولادى
قورعانىس ءمينيسترىنىڭ ورىنباسارى ورنالاستىرۋ جاعدايىنا, تاماقتاندىرۋدىڭ ۇيىمداستىرىلۋىنا جانە مەديتسينالىق كوميسسيا جۇمىسىنا باعا بەردى. تەكسەرىستەردىڭ ساپاسى مەن كابينەتتەردىڭ جابدىقتالۋىنا ءجىتى نازار اۋدارىلدى.
«استانانىڭ جيناۋ پۋنكتىندەگى بارلىق پروتسەستەر قاجەتتى دەڭگەيدە ۇيىمداستىرىلعان, مۇندا اشىقتىق پەن شاقىرۋ ناۋقانىنىڭ تيىمدىلىگىن ارتتىرۋعا باعىتتالعان زاماناۋي تسيفرلىق شەشىمدەر قولدانىلادى. شاقىرىلۋشىلار ءۇشىن بارلىق قاجەتتى جاعدايلار جاسالعان», دەدى ول.
مەملەكەتتىك ورگاندار مەن قوعام وكىلدەرىمەن كەزدەسۋدە گەنەرال-مايور اسقار مۇستابەكوۆ شاقىرىلۋشىلارعا مورالدىق قولداۋ كورسەتۋدىڭ ءرولىن ەرەكشە اتاپ ءوتتى. ول ارداگەرلەردىڭ قاتىسۋى مەن كۇشتىك قۇرىلىمدارمەن ءوزارا ءىس-ارەكەت جاستارعا قىزمەتتىڭ باستاپقى كەزەڭىنەن سەنىمدى وتۋگە جانە ونىڭ ماڭىزىن تۇسىنۋگە كومەكتەسەتىنىن ايتتى.
