قازاقستاندىق كاسىپقوي بوكسشى يۆان دىچكو كەلەسى جەكپە-جەگىنىڭ وتەتىن كۇنىن جانە قارسىلاسىن انىقتادى. 6 ماۋسىمدا ول انگليانىڭ بورنمۋت قالاسىندا وتەتىن Zuffa Boxing 07 تۋرنيرىندە اۋىر سالماقتا ونەر كورسەتەدى.
دىچكونىڭ قارسىلاسى بريتاندىق حارۆي دايكس. ول كاسىپقوي رينگتە ءالى جەڭىلىپ كورمەگەن. ونىڭ ەسەبىندە جەتى جەڭىس جانە ءبىر تەڭ ناتيجە بار. الايدا بريتاندىق بوكسشى ازىرگە بىردە-ءبىر جەكپە-جەگىن مەرزىمىنەن بۇرىن اياقتاماعان. ياعني, بارلىق كەزدەسۋلەرى تورەشىلەر شەشىمىمەن شەشىلگەن.
دىچكونىڭ جەكپە-جەگى بوكس كەشىنىڭ اندەركارتىندا وتەدى. بۇل كەشتىڭ باستى وقيعاسى – ءبىرىنشى اۋىر سالماقتاعى بۇرىنعى WBO چەمپيونى كريس بيللام-سميت پەن كانادالىق رايان روزيتسكي اراسىنداعى ايقاس بولماق.
بىلتىر قىركۇيەكتە دىچكو تەرەنس كروۋفورد پەن ساۋل الۆارەس قاتىسقان بوكس كەشىنىڭ اندەركارتىندا جەڭىلىس تاپقان ەدى. قازاقستاندىق بوكسشى امەريكالىق دجەرمەين فرانكلين-كىشىگە تورەشىلەر شەشىمىمەن ۇتىلىپ قالدى.
قازىر يۆان دىچكونىڭ كاسىپقوي بوكستاعى ناتيجەسىندە 15 جەڭىس (ونىڭ 14-ءى – نوكاۋتپەن) جانە ءبىر جەڭىلىس بار. اۋەسقوي بوكستا يۆان ەكى مارتە وليمپيادا ويىندارىنىڭ قولا جۇلدەگەرى (2012, 2016), ازيا ويىندارى مەن ازيا چەمپيوناتىنىڭ جەڭىمپازى جانە الەم چەمپيوناتىنىڭ كۇمىس جۇلدەگەرى اتانعان.
ايتا كەتەيىك, Zuffa Boxing – UFC پرەزيدەنتى دانا ۋايت پەن ىقپالدى پروموۋتەر تۋركي ءال-شەيح بىرىگىپ قۇرعان جاڭا كاسىبي بوكس ليگاسى. قازاقستاندىقتار اراسىندا يۆان دىچكودان بولەك, وليمپيادا چەمپيونى دانيار ەلەۋسينوۆ تە وسى ليگامەن كەلىسىمشارت جاساعان.
