بۇۇ-نىڭ «بولىنگەن اۋماقتى باقىلاۋ كۇشتەرى» ميسسياسى قولباسشىسىنىڭ رەزەرۆىندەگى ەكىنشى جانە ءۇشىنشى بىتىمگەرلىك روتالاردىڭ كومانديرلەرى پودپولكوۆنيكتەر جانىبەك نۇرلانوۆ پەن ءىلياس الماتوۆ دەسانتتىق-شابۋىلداۋ اسكەرلەرى قولباسشىلىعىنىڭ وكىلىنە اسكەري كونتينگەنتتەردىڭ اۋىسقانى جايلى باياندادى.
ساپتىق الاڭداعى قازاقستان رەسپۋبليكاسىنىڭ مەملەكەتتىك تۋىن تاپسىرۋدىڭ سالتاناتتى ءراسىمى الدىڭعى قۇرامنىڭ قىزمەتتى اياقتاپ, جاڭا كونتينگەنت ميسسياسىنىڭ باستالعانىن ءبىلدىردى.
ءۇشىنشى بىتىمگەرلىك كونتينگەنت روتاسىنىڭ قولباسشىلىعىن قابىلداعان پودپولكوۆنيك ءىلياس الماتوۆ دايىندىق بارىسىندا مەڭگەرىلگەن كاسىبي داعدىلار اسكەري قىزمەتشىلەرگە جۇكتەلگەن مىندەتتەردى ءتيىمدى ورىنداۋعا مۇمكىندىك بەرەتىنىن اتاپ ءوتتى.
ميسسيانى ورىنداۋ كەزەڭىندە ەكىنشى بىتىمگەرلىك كونتينگەنت مىڭنان استام ءىس-شارا وتكىزدى. ينجەنەرلىك-ساپەرلىك توپ ءتورت مىڭعا جۋىق جارىلىس قاۋپى بار زات پەن قولدان جاسالعان جارىلعىش قۇرىلعىنى جويدى.
بىتىمگەرلەر باقىلاۋ بەكەتتەرىندەگى قاۋىپسىزدىكتى قامتاماسىز ەتىپ, اۋماقتى پاترۋلدەدى, گۋمانيتارلىق جۇكتەردى الىپ ءجۇردى, ەۆاكۋاتسيا جۇمىستارىن جۇرگىزىپ, جەرگىلىكتى تۇرعىندارعا مەديتسينالىق كومەك كورسەتتى.
بازاعا كەلگەن ءۇشىنشى بىتىمگەرلىك كونتينگەنتتىڭ اسكەري قىزمەتشىلەرى ورنالاسۋعا جانە ىستەردى قابىلداۋ جۇمىستارىنا كىرىسىپ كەتتى. روتا شتابى جەكە قۇرامنىڭ قىزمەتتىك مىندەتتەرىن ناقتىلاپ, بۇۇ-نىڭ مانداتىندا كوزدەلگەن تاپسىرمالاردى ورىنداۋعا دايىندىقتى ۇيىمداستىراتىن بولادى.
