قازاقستان قۇراماسى بۇل چەمپيوناتتا جۇلدەسىز قالسا دا ءبىز قۋاناتىنداي, ماقتان تۇتاتىنداي ءبىر جايت بار. ول – ۇلتتىق قۇرامانىڭ شابۋىلشىسى ءبىرجان ورازوۆتىڭ ەۋروپا چەمپيوناتىنىڭ باس مەرگەنى اتانۋى. ءيا, قارسىلاستار قاقپاسىنا 7 دوپ سوققان ءبىرجان وسى چەمپيوناتقا ناعىز بابىندا كەلىپتى.
ەۋروپا چەمپيوناتىنىڭ تاريحىنا ۇڭىلسەك, ءبىرجاننان بولەك, «باس مەرگەن» اتاعىنا سەرىك جامانقۇلوۆ تا يە بولعان ەدى. ول 2016 جىلى بەلگرادتا (سەربيا) وتكەن قۇرلىقتىق جارىستا التى گول سوعىپ, ميگەلين, ريكاردينيۋ سياقتى اتاعى الىسقا كەتكەن ويىنشىلارمەن ءبىر قاتاردا تۇردى.
ەۋروپا چەمپيوناتى 1996 جىلدان بەرى ۇيىمداستىرىلىپ كەلەدى. سودان بەرى سۇرمەرگەندەر قاتارىندا قازاقستان, پورتۋگاليا, يسپانيا, رەسەي, ۋكراينا, سەربيا جانە ازەربايجان سىندى ساناۋلى عانا ەلدەردىڭ ويىنشىلارى بار.
ەۋروپا چەمپيوناتى.
1996 جىل
كونستانتين ەرەمەنكو (رەسەي) – 8 دوپ
رەسەي فۋتزالىندا اتى اڭىزعا اينالعان كونستانتين ەرەمەنكو 1996 جىلى يسپانيانىڭ كوردوۆا قالاسىندا وتكەن ەۋروپا چەمپيوناتىندا 8 دوپ سوعىپ, ءتۋرنيردىڭ ۇزدىك مەرگەنى اتاندى. توپتىق سايىستا ءتورت رەت قانجىعاسى مايلانعان رەسەيلىك اياقدوپ شەبەرى جارتىلاي فينالدا بەلگيا قاقپاسىنان ەكى مارتە ساڭىلاۋ تاپتى. وسى ويىندا رەسەي 6:2 ەسەبىمەن جەڭىسكە جەتتى. ال فينالدا ك.ەرەمەنكو باستاعان قۇراما جارىس قوجايىندارىنان 3:5 ەسەبىمەن ۇتىلدى. بۇل ويىندا دا رەسەيلىك سۇرمەرگەن ءدۋبلدىڭ اۆتورى اتاندى.
ەۋروپا چەمپيوناتى.
1999 جىل
كونستانتين ەرەمەنكو (رەسەي) – 11 دوپ
يسپانيا 1999 جىلى قاتارىنان ەكىنشى مارتە ەۋروپا چەمپيوناتىن قابىلدادى. بۇل جولعى تۋرنير ۋەفا اياسىندا وتكەندىكتەن, رەسمي تۇردە ءبىرىنشى ەۋروپا چەمپيوناتى دەپ ەسەپتەۋگە بولادى. تۋرنير جەڭىمپازى بولىپ رەسەي قۇراماسى تانىلدى. ورىستار فينالدا يسپانيادان پەنالتي سەرياسى ارقىلى باسىم ءتۇستى. ال سۇرمەرگەندەر ءتىزىمىن سول كونستانتين ەرەمەنكو باستادى. ول تۋرنير بارىسىندا 11 گول سوقتى. ونىڭ التاۋىن توپتىق تۋرنيردە يتاليا, بەلگيا, پورتۋگاليا سياقتى مىقتىلاردىڭ قاقپاسىنا توعىتسا, ءتورت گول جارتىلاي فينالدا نيدەرلاند قاقپاسىنا سوعىلدى. فينالدا ك.ەرەمەنكو يسپانيا قۇراماسىنىڭ قاقپاسىنان دا ساڭىلاۋ تاپتى. وسىلايشا, ول ء«تۋرنيردىڭ سۇرمەرگەنى» دەگەن اتاقتان بولەك, ەۋروپا چەمپيوناتىنىڭ «ۇزدىك ويىنشىسى» اتاعىن دا جەڭىپ الدى.
2010 جىلى 39 جاسىندا كوز جۇمعان كونستانتين ەرەمەنكو ءوزىنىڭ سپورتتىق عۇمىرىندا 1132 گول سوققان. سوندىقتان دا بولار, ونىڭ جانكۇيەرلەر اراسىندا «ورىس پەلەسى» دەگەن لاقاپ اتى دا بار.
ەۋروپا چەمپيوناتى.
2001 جىل
سەرگەي كوريدزە (ۋكراينا) – 7 دوپ
2001 جىلى رەسەيدىڭ ماسكەۋ قالاسىندا وتكەن ەۋروپا چەمپيوناتىنىڭ باس مەرگەنى – سەرگەي كوريدزە. ۋكراينالىق مامان بۇگىندە قازاقستان قۇراماسىنىڭ باپكەرلەر شتابىندا جۇمىس ىستەيدى.
سەرگەي كوريدزە 2001 جىلعى ەۋروپا چەمپيوناتىندا 7 گولدىڭ اۆتورى اتاندى. ونىڭ التاۋىن توپتىق سايىستا, بىرەۋىن جارتىلاي فينالدا سوقتى. ۋكراينا وسى چەمپيوناتتا كۇمىس جۇلدەگە يە بولدى. فينالدا يسپانيادان ۇتىلدى – 1:2.
ەۋروپا چەمپيوناتى.
2003 جىل
سەرگەي كوريدزە (ۋكراينا) – 7 دوپ
2003 جىلى يتاليانىڭ اۆەرسا جانە كازەرتا قالالارىندا وتكەن ەۋروپا چەمپيوناتىندا سەرگەي كوريدزە تاعى دا 7 گول سوعىپ, سۇرمەرگەن اتاندى.
الايدا بۇل جولى دا ۋكراينا قۇراماسىنىڭ چەمپيون اتانۋىنا كومەكتەسە المادى. ۋكراينا فينالعا جەتكەنىمەن, شەشۋشى ويىندا يتاليادان جەڭىلدى – 0:1.
ەۋروپا چەمپيوناتى.
2005 جىل
فەرناندو گرانا (يتاليا) – 6 دوپ
2000-جىلداردىڭ ورتاسىندا يتاليادا كىشى فۋتبولدىڭ ءداۋىرى ءجۇردى. وعان سەبەپ, يتاليالىقتار توقسانىنشى جىلداردىڭ سوڭىندا قۇراماعا برازيليالىقتاردى شاقىرا باستادى. ءتىپتى ءبىر كەزدەرى يتاليا قۇراماسىنىڭ 80 پايىزىن لاتىنامەريكالىقتار قۇرايتىن. سونىڭ دا اسەرى بولار, يتاليا 2003 جىلى ەۋروپا چەمپيونى, 2004 جىلى الەم چەمپيوناتىنىڭ كۇمىس جۇلدەسىنە يە بولدى.
2005 جىلى چەحيانىڭ وستراۆا قالاسىندا ۇيىمداستىرىلعان ەۋروپا چەمپيوناتىندا يتاليا قۇراماسىنىڭ ويىنشىسى فەرناندو گرانا 6 دوپپەن ءتۋرنيردىڭ سۇرمەرگەنى اتاندى.
گرانو برازيليادا تۋىپ-وسكەن. 1999 جىلى يتاليا ازاماتتىعىن الدى. 2003 جىلى يتاليانىڭ ەۋروپا چەمپيونى اتانۋىنا وسى گرانا باستاعان برازيليالىق لەگيونەرلەردىڭ كومەگى كوپ ءتيدى. گرانانىڭ ءوزى 2005 جىلعى ەۋروپا چەمپيوناتىنىڭ باس مەرگەنى اتاندى – 6 دوپ.
ەۋروپا چەمپيوناتى.
2007 جىل
سيريلو (رەسەي), دانيەل (يسپانيا), پرەدراگ رايچ (سەربيا) – 5 دوپ
بايقاپ وتىرعاندارىڭىزداي, 2007 جىلعى ەۋروپا چەمپيوناتىنىڭ سۇرمەرگەن اتاعىن ءۇش فۋتبولشى ءبولىستى.
رەسەي ساپىندا 2006-2014 جىلدار ارالىعىندا ونەر كورسەتكەن سيريلو – برازيليانىڭ تۋماسى. 2003 جىلى «سپارتاك» كلۋبىنا كەلىپ, ەكى جىلدان كەيىن رەسەي ازاماتتىعىن الدى. ءۇش رەت ەۋروپا چەمپيوناتىنىڭ جۇلدەگەرى بولدى. رەسەي قۇراماسىندا ويناعان برازيليالىقتاردىڭ ىشىندە كەرەمەت ويىنىمەن كوزگە تۇسكەن وسى سيريلو بولاتىن.
يسپانيا قۇراماسىنداعى ۇزدىك شابۋىلشىلاردىڭ ءبىرى دانيەلدىڭ دە ەجەلگى
وتانى – برازيليا. 1995 جىلى يسپانيانىڭ «مەحورادا» كلۋبىنا كەلگەن ويىنشى ءبىر جىلدان كەيىن سول ەلدىڭ ازاماتتىعىن الدى.
ال پرەدراگ رايچقا كەلسەك, بۇل ويىنشى توپتىق ويىندا-اق بەس دوپ سوعىپ, دودانىڭ باس مەرگەنىنە اينالدى. سەربيا قۇراماسى رەسەي, يسپانيا, ۋكراينا سياقتى ازۋلى كوماندالارمەن ويناعانىنا قاراماستان, رايچتىڭ بۇل تۋرنيردە ايى وڭىنان تۋدى. ول رەسەي جانە ۋكراينا قۇرامالارىنىڭ قاقپاسىنا قوس-قوستان گول سوقسا, يسپانيا قاقپاسىن ءبىر مارتە ءدال كوزدەدى.
ەۋروپا چەمپيوناتى.
2010 جىل
بيرو جادە (ازەربايجان), حاۆي رودريگەس (يسپانيا), جوەل كەيرۋش (پورتۋگاليا), سااد اسسيس (يتاليا) – 5 دوپ
2010 جىلى ماجارستاننىڭ بۋداپەشت جانە دەبرەتسەن قالالارىندا وتكەن ەۋروپا چەمپيوناتىندا العاش رەت 12 كوماندا قاتىستى. ءتۋرنيردىڭ باس جۇلدەسى بەسىنشى مارتە يسپانياعا بۇيىردى. ال مەرگەندەرگە كەلسەك, بۇل جولى ءتورت ويىنشى سۇرمەرگەن اتاندى. اتاپ ايتساق, بيرو جادە (ازەربايجان), حاۆي رودريگەس (يسپانيا), جوەل كەيرۋش (پورتۋگاليا), سااد اسسيس (يتاليا) سىندى اياقدوپشىلار بەس دوپتان سوعىپ, سۇرمەرگەندەر تىزىمىندە قاتار تۇردى.
ەۋروپا چەمپيوناتى.
2012 جىل
تورراس (يسپانيا) – 5 دوپ
يسپانيا قۇراماسىنىڭ ساپىندا جاسىنداي جارقىلداعان حوردي تورراس – كىشى فۋتبولدا كەرەمەت ناتيجەگە قول جەتكىزگەن الەمدەگى ساناۋلى ويىنشىلاردىڭ ءبىرى. ول – الەم چەمپيونى, ەۋروپانىڭ ءتورت دۇركىن جەڭىمپازى. قۇرلىقارالىق كۋبوكتىڭ يەگەرى. سونىمەن قاتار ۋەفا كۋبوگىندا ەكى رەت باس جۇلدەگە يە بولدى.
2012 جىلى حورۆاتيانىڭ زاگرەب جانە سپليت قالالارىندا وتكەن ەۋروپا دوداسىندا تورراس تاعى ءبىر اتاققا قول جەتكىزدى. ول جوعارىدا اتالعان جەتىستىكتەرىنە ەۋروپا چەمپيوناتىنىڭ سۇرمەرگەنى دەگەن اتاقتى قوسىپ الدى. تورراس تۋرنير بارىسىندا قارسىلاستار قاقپاسىن بەس رەت ءدال كوزدەدى.
ەۋروپا چەمپيوناتى.
2014 جىل
ەدەر ليما (رەسەي) – 8 دوپ
ەدەر ليما – رەسەي فۋتزال تاريحىندا ەۋروپا چەمپيوناتىندا سۇرمەرگەن اتانعان ەكىنشى برازيليالىق لەگيونەر.
برازيليا ويىنشىسى 2006 جىلدان 2017 جىلعا دەيىن يۋگورسكىنىڭ «گازپروم-يۋگرا» كومانداسىنىڭ نامىسىن قورعادى. 300-دەن استام ويىن وتكىزدى. رەسەي قۇراماسىنداعى العاشقى ويىنىن 2009 جىلعى الەم چەمپيوناتىندا سولومون ارالدارىنا قارسى وتكىزىپ, جەتى گولدىڭ اۆتورى اتاندى. وسى ويىندا رەسەي 16:0 ەسەبىمەن جەڭىسكە جەتتى.
ليما بەلگيانىڭ انتۆەرپەن قالاسىندا ۇيىمداستىرىلعان ەۋروپا چەمپيوناتىندا 8 گولدى ءوز ەنشىسىنە جازدى.
ەۋروپا چەمپيوناتى.
2016 جىل
ميگەلين (يسپانيا), ماريو راۆيلوس (يسپانيا), الەكس (يسپانيا), ريكاردينيۋ (پورتۋگاليا), سەرىك جامانقۇلوۆ (قازاقستان) – 6 دوپ
2016 جىلى سەربيانىڭ بەلگراد قالاسىندا وتكەن ەۋروپا چەمپيوناتى قازاقستان فۋتزالى ءۇشىن جاقسى جاڭالىققا تولى بولدى. قارت قۇرلىقتىڭ باستى باسەكەسىنە تۇڭعىش رەت قاتىسقان ەلىمىزدىڭ اياقدوپشىلارى قولا جۇلدەنى جەڭىپ الدى. سونىمەن قاتار ۇلتتىق قۇرامانىڭ بەلدى ويىنشىلارىنىڭ ءبىرى سەرىك جامانقۇلوۆ 6 دوپ سوعىپ, مەرگەندەر تىزىمىندە بولدى. س.جامانقۇلوۆتان بولەك, بۇل چەمپيوناتتا ميگەلين, ماريو راۆيلوس, الەكس سىندى يسپانيالىقتار دا ءوز ەنشىلەرىنە التى گولدان جازدى. اتى اڭىزعا اينالعان پورتۋگاليالىق ريكاردينيۋدىڭ دە قانجىعاسىندا التى گول بار.
س.جامانقۇلوۆ – قازاقستان فۋتزالى تاريحىندا ەۋروپا چەمپيوناتىندا گول سوققان العاشقى فۋتبولشى. ول توپتىق باسەكەنىڭ ءبىرىنشى تۋرىندا رەسەي قاقپاشىسىن قاپى قالدىردى. ودان كەيىنگى ويىندا حورۆاتيانىڭ قاقپاسىن ەكى مارتە ءدال كوزدەدى. شيرەك, جارتىلاي جانە فينالدىق ويىنداردا دا س.جامانقۇلوۆ الاڭنان گول سوقپاي كەتپەدى.
ەۋروپا چەمپيوناتى.
2018 جىل
ريكاردينيۋ (پورتۋگاليا) – 7 دوپ
پورتۋگاليالىق ريكاردينيۋ 2016 جىلى تۇڭعىش رەت ەۋروپا چەمپيونى اتاندى. تەك اتانىپ قانا قويماي, ءتۋرنيردىڭ سۇرمەرگەنى جانە «ۇزدىك ويىنشىسى» دەگەن اتاقتاردى قوسا جەڭىپ الدى.
سلوۆەنيادا ريكاردينيۋ 7 گول سوقتى. بىلتىر ليتۆادا وتكەن الەم چەمپيوناتىنان كەيىن ايگىلى پورتۋگاليالىق سۇرمەرگەن سپورتتىق كارەراسىن اياقتادى.
