شىمكەنت قالاسىندا 2025 جىلعا دەيىنگى كەشەندى جوسپارعا سايكەس 75 015 ورىنعا ارنالعان 77 مەكتەپ سالۋ جوسپارلانعان. ونىڭ 54-ءى مەملەكەت ەسەبىنەن بولسا, 4-ءۋى مەملەكەتتىك-جەكەمەنشىك ارىپتەستىك نەگىزىندە, ال 19 مەكتەپ جەكە ينۆەستورلار ەسەبىنەن بوي كوتەرمەك.
بيىلعى جىلى 10 540 ورىنعا ارنالعان 16 مەكتەپ جىل سوڭىنا دەيىن پايدالانۋعا بەرىلەدى دەپ جوسپارلانۋدا. قالادا قۇرىلىسى ءجۇرىپ جاتقان 11 مەكتەپتىڭ ەسەبىمەن جەكەمەنشىك ءبىلىم مەكەمەسىنىڭ سانى 62-گە جەتەدى.
جەكە مەكتەپتەر سانىن كوبەيتۋ - بيۋدجەتكە تۇسەتىن جۇكتەمەنى تومەندەتۋگە, ورىن تاپشىلىعىن ازايتۋعا, ءبىلىم ساپاسىن جاقسارتۋعا جانە پەداگوگ مارتەبەسىن ارتتىرۋعا مۇمكىندىك بەرىپ وتىر. ال, بۇل ينۆەستور ءۇشىن تۇتىنۋ كەپىلدىگى بار تابىستى ءارى ۇزاق مەرزىمدى بيزنەس جوبا بولىپ تابىلادى. ال, بيىل بيۋدجەت ەسەبىنەن 5 مەكتەپتىڭ جانىنان قوسىمشا عيماراتتاردىڭ قۇرىلىسى جۇرگىزىلۋدە.
جاڭا نىساندار پايدالانۋعا بەرىلگەن تۇستا قالادا ءۇش اۋىسىمدى مەكتەپتەر سانى 9-دان 5-كە تومەندەيدى. جالپى ءۇش اۋىسىمدا ءبىلىم بەرەتىن مەكتەپتەر جانە مەكتەبى جوق شاعىن اۋداندار ماسەلەسىن 2023 جىلى, ال ورىن تاپشىلىعىن (دەفيتسيت) 2025 جىلعا دەيىن تولىعىمەن شەشۋ جوسپارلانعان.
