اتالعان ءىس-شاراعا رەسەي دەنساۋلىق ساقتاۋ مينيسترلىگىنىڭ «ۇلتتىق كارديولوگيا مەديتسينالىق زەرتتەۋ ورتالىعى» – چازوۆ اتىنداعى كارديولوگيالىق ورتالىعىنان 14 مامان كەلدى. اقپاننىڭ 16-18 كۇندەرى كارديوحيرۋرگتەر, كارديولوگتەر جانە انەستەزيولوگتەر توبى قازاقستانداعى سوزىلمالى جۇرەك جەتكىلىكسىزدىگى بار پاتسيەنتتەردى ىرىكتەۋ, باقىلاۋ جانە حيرۋرگيالىق ەمدەۋ ۇدەرىسىمەن جان-جاقتى تانىستى.
«العان اسەرىمىز كۇتكەنىمىزدەن اسىپ ءتۇستى. كارديوحيرۋرگيالىق كومەكتى قامتاماسىز ەتۋ جانە HeartMate 3 جوعارى تەحنولوگيالىق قۇرىلعىسىن يمپلانتاتسيالاۋدىڭ قىر-سىرى ۇڭعىل-شۇڭعىلىنا دەيىن قاراستىرىلعان ورتالىقتىڭ قۇرىلىمى تاڭعالدىرادى. جۇرەك ورتالىعى كارديولوگتەرىنىڭ جوعارى بىلىكتىلىگىن ەرەكشە اتاپ وتكىم كەلەدى. كارديولوگتەردى حيرۋرگيالىق ەمدەۋ پروتسەسىنە بىرىكتىرۋ پاتسيەنتتەردىڭ وپەراتسيادان كەيىنگى باقىلاۋدى كلينيكالىق تۇردە جالعاستىرۋعا مۇمكىندىك بەرەدى. بۇل وتە ماڭىزدى. سونداي-اق ورتالىق كارديولوگتەرىنىڭ جۇرەكىشىلىك گەموديناميكا تۇسىنىگى تاڭعالدىردى. ءبىز ولارمەن ءبىر تىلدە سويلەستىك. بۇل ۇجىمنان جاعىمدى اسەر قالدى: مەيىرىمدى جانە بارلىق سۇراققا جاۋاپ بەرۋگە دايىن», دەدى چازوۆ اتىنداعى كارديولوگيالىق ورتالىعىنىڭ انەستەزيولوگ-رەانيماتولوگى ەلەنا دزىبينسكايا.
جۇرەك ورتالىعىنىڭ قىزمەتكەرلەرى پاتسيەنتتەردى دايىنداۋ, ولاردىڭ جاعدايىنا كلينيكالىق-پسيحولوگيالىق باعالاۋ جۇرگىزۋ, وپەراتسيادان كەيىنگى ەمدەۋ جانە وڭالتۋ تۋرالى ايتىپ بەردى.
«شەبەرلىك ساباعى باعدارلاماسىندا دارىستەر, تەوريانى تاجىريبەدە قولدانۋ قامتىلدى. سونداي-اق مەديتسينا قىزۋ تالقىلاندى. بۇل وقىتۋ ماسكەۋ مەديتسينالىق ورتالىعىنىڭ ارىپتەستەرىمەن بەلسەندى تاجىريبە جانە ءبىلىم الماسۋعا ىقپال ەتتى», دەيدى كارديوحيرۋرگيا ءبولىمىنىڭ مەڭگەرۋشىسى, كارديوحيرۋرگ دارىگەر سۆەتلانا نوۆيكوۆا.
قازىر شەبەرلىك ساباعى بارىسىندا وپەراتسيا جاسالعان پاتسيەنتتەردىڭ جاعدايى ءتاۋىر, دارىگەرلەردىڭ باقىلاۋىندا. ولاردىڭ جۇرەگىنە يمپلانتاتسيالانعان قۇرىلعى ءومىر ساپاسىن جاقسارتۋعا كومەكتەسەدى جانە جۇرەك ترانسپلانتاتسياسىنا كوپىر بولا الادى.
«بۇگىنگى تاڭدا رەسەيدە LVAD قۇرىلعىسىن يمپلانتاتسيالاۋ تاجىريبەسى از. بۇل رەتتە قازاقستاندىق مامانداردىڭ تاجىريبەسىن اۋىز تولتىرىپ اتاپ وتۋگە بولادى. ويتكەنى جۇرەك ورتالىعىندا وسىنداي 400-گە جۋىق وپەراتسيا جاسالدى. شەبەرلىك ساباعى وتە مازمۇندى ءوتتى. وقىتۋ تەك تەوريالىق ساباقتاردان عانا ەمەس, سونىمەن قاتار جانۋارلار ماتەريالىندا پراكتيكالىق وقۋدان, سونداي-اق وپەراتسيالىق پروتسەسكە قاتىسۋدان تۇردى. ونىڭ بارىسىندا ءبىز قۇرىلعىنىڭ قالاي يمپلانتاتسيالانعانىن كوردىك», دەيدى ماسكەۋدەن كەلگەن كارديوحيرۋرگ كيريلل مەرشين.
