اۋەلگى جوسپار بويىنشا قحل-دىڭ قالعان ويىندارى وليمپيادادان كەيىن وتكىزىلۋى ءتيىس ەدى. الايدا بىرنەشە ماتچتىڭ كەيىنگە شەگەرىلۋىنە جانە جارىس كەستەسىنىڭ تىعىزدىعىنا بايلانىستى تۇراقتى بىرىنشىلىكتىڭ پرەزيدەنتى الەكسەي موروزوۆ بيىلعى ماۋسىمدى مەرزىمىنەن بۇرىن اياقتاۋعا ءماجبۇر بولعاندىعىن مالىمدەگەن ەدى. ءسويتىپ ليگا باسشىلىعى تۇراقتى چەمپيوناتتىڭ قاڭتار ايىنا دەيىنگى ارالىق ناتيجەلەرىن ەسكەرە وتىرىپ, پلەي-وففقا شىققان كوماندالاردى جيناعان ۇپاي ساندارىنىڭ پايىزىنا قاراي ىرىكتەپ الدى.
ەلوردالىق كوماندا تۇراقتى بىرىنشىلىكتىڭ تۋرنير كەستەسىندە 8-ورىنعا تابان تىرەپ, گاگارين جولىنداعى كۋبوكتىڭ پلەي-وفف كەزەڭىنە تىكەلەي جولداما الادى. جارىس ەرەجەسىنە سايكەس, پلەي-وففقا سوڭعى ورىنمەن شىققان كوماندا العاشقى ويىنىن تۋرنير كەستەسىندە ءبىرىنشى ورىن العان ۇجىممەن وتكىزەدى. ال «شىعىس» كونفەرەنتسياسىنداعى تۋرنير كەستەسىندە ماگنيتوگورسكىنىڭ «مەتاللۋرگى» كوش باستاپ تۇرعان ەدى.
ەڭ قىزىعى, «بارىس» پەن «مەتاللۋرگ» ۇجىمدارى بيىل قاتارىنان ءۇشىنشى جىل پلەي-وفف كەزەڭىنىڭ ءبىرىنشى ويىنىندا كەزدەسكەلى تۇر. 2019/2020 جىلعى ماۋسىمنىڭ 1/8 كەزەڭىندە كوماندالار بەس ويىن وتكىزىپ, ەلوردالىق كوماندا 4:1 ناتيجەسىمەن كەلەسى كەزەڭگە وتكەن ەدى. الايدا سول جىلى الەمدى شارپىعان كوروناۆيرۋس ىندەتى بارلىق ەلگە تاراپ, سالدارىنان سول جىلعى جارىستا كۋبوكتىڭ جەڭىمپازى انىقتالعان جوق.
كەلەسى 2019/2020 جىلعى پلەي-وفف باسەكەسىنىڭ العاشقى اينالىمىندا ەكى كلۋبتىڭ جولى قايتا ءتۇيىستى. التى ويىنعا جالعاسقان بۇل جولعى تارتىستا «مەتاللۋرگ» حوككەيشىلەرىنىڭ مەرەيى ۇستەم بولدى – 4:2. الايدا ماگنيتوگورسكىنىڭ كومانداسى شيرەك فينالدا ءدال وسىنداي ەسەپپەن بولاشاق گاگارين كۋبوگىنىڭ يەگەرى ومبىنىڭ «اۆانگاردىنان» جەڭىلىپ قالدى.
ەندى, مىنە, ەكى كلۋب بيىل ءۇشىنشى مارتە پلەي-وففتىڭ العاشقى كەزەڭىندە باق سىنايدى. ازىرشە كوماندالاردىڭ ەنشىسىندە ءبىر-ءبىر جەڭىس بار. بۇل جولى جەڭىسكە جەتكەن كوماندا جەكە ەسەپتە العا شىعادى. ايتا كەتەيىك, «بارىس» پەن «مەتاللۋرگ» قحل-دىڭ بيىلعى ماۋسىمىندا مۇزايدىندا ءتورت مارتە كەزدەسىپ, ەكى كوماندا دا ەكى رەتتەن جەڭىسكە جەتكەن.
پلەي-وفف ويىندارىنىڭ العاشقى ەكى ماتچى 1 جانە 3 ناۋرىز كۇندەرى ماگنيتوگورسكىدە, كەيىنگى ەكى كەزدەسۋ 5 جانە 7 ناۋرىزدا ەلوردادا وتەدى. جارىس ەرەجەسىنە سايكەس پلەي-وفف باسەكەلەرى ءبىر كوماندا ءتورت رەت جەڭىسكە جەتكەنگە دەيىن جالعاسادى. ەگەر ءتورت ويىندا جەڭىمپاز كوماندا انىقتالماسا, قوسىمشا ويىندار وتكىزىلەدى. بۇل ماتچتار 9 ناۋرىز (ماگنيتوگورسك), 11 ناۋرىز (نۇر-سۇلتان) جانە 13 ناۋرىز كۇندەرىنە (ماگنيتوگورسك) جوسپارلانعان.
