باستاپقىدا قاڭتار ايىنىڭ سوڭىندا كانادالىق جۇك كولىگىن جۇرگىزۋشىلەر اقش-قا قاتىناۋ ءۇشىن مىندەتتى ۆاكتسينالاۋ پاسپورتتارىن ەنگىزۋگە نەمەسە ساپاردان كەيىن كارانتيندە وتىرۋعا مىندەتتەۋگە نارازىلىق بىلدىرگەن بولاتىن. ارتىنشا بۇل اكتسيا كوروناۆيرۋسقا قارسى شارالار مەن دجاستين تريۋدو ۇكىمەتىنىڭ ساياساتىنا قارسى جالپى نارازىلىققا اينالدى.
شەرۋشىلەر وتتاۆانىڭ ورتالىق كوشەلەرىن ءۇش اپتا بويى جاۋىپ تاستاپ, ۋاقىتشا شاتىر قۇرىپ جايعاسقان ەدى. الايدا وسى ماڭايدا تۇراتىن ازاماتتار تارتىپسىزدىكتەر مەن قاتتى دىبىستارعا شاعىمدانعان. ولار سىرتتا شىعا الماي, ءوز ۇيلەرىندە قامالىپ وتىرعانىن ايتادى.
كانادا استاناسىنىڭ بيلىگى مەن پوليتسياسى بۇدان بىلاي جاعدايدى باقىلاي المايتىنىن جانە نارازىلىقتى توقتاتۋ ءۇشىن قوسىمشا رەسۋرستار قاجەت ەكەنىن مويىنداپ, وتتاۆا ۇكىمەتى قالادا توتەنشە جاعداي جاريالادى. وسى جاعدايدا عانا ەل ۇكىمەتى شەرۋدى تاراتۋ ءۇشىن باتىل ارەكەتتەر جاساي الادى.
كانادالىق پوليتسەيلەر «تازارتۋ» وپەراتسياسىن جۇما كۇنى تاڭەرتەڭ باستادى. بۇعان دەيىن كانادا ۇكىمەتى نارازىلىققا شىققانداردى كۇشپەن تاراتۋعا مۇمكىندىك بەرەتىن توتەنشە جاعدايلار تۋرالى زاڭ قابىلدادى. وپەراتسيا كەزىندە 170 ادام قاماۋعا الىندى. قارسىلىق كورسەتكەن كەيبىر نارازىلاردى پوليتسەيلەر قولىن بايلاپ اكەتۋگە ءماجبۇر بولعان. سونىمەن قاتار ورتالىقتان 53 كولىك قۇرالىن سۇيرەپ شىعارعان.
سەنبىدە پوليتسيا پارلامەنتتىڭ الدىنداعى جانە پرەمەر-مينيستر كەڭسەسىنىڭ جانىنداعى الاڭنىڭ كوپ بولىگىن تازارتۋ ءۇشىن بۇرىش سپرەيى مەن شۋ گراناتالارىن قولدانعان. پوليتسيانىڭ مالىمەتىنشە, سەنبىدە قاماۋعا الىنعانداردىڭ كەيبىرى وققاعار كيگەن, ال سومكەلەرى مەن كولىكتەرىنەن ءتۇتىن گراناتالارى مەن باسقا دا جانعىش زاتتار تابىلعان.
وتتاۆا پوليتسياسىنىڭ ۋاقىتشا باستىعى ستيۆ بەلل پوليتسيا كامەراسىنا تۇسكەن نارازىلىق بىلدىرۋشىلەر جاۋاپقا تارتىلاتىنىن مالىمدەدى.
ء«بىز سىزدەردى انىقتاۋعا تىرىسامىز جانە قارجىلىق سانكتسيالار سالامىز, قىلمىستىق ايىپتاۋلار بولادى. تەرگەۋ تاعى بىرنەشە ايعا سوزىلادى», دەدى س.بەلل.
پوليتسيا وكىلدەرى وپەراتسيا كەزىندە زاڭسىز نارازىلىق بىلدىرۋشىلەرگە ايماقتان كەتۋگە ەسكەرتۋ جاساعانىن, حاباردى اشىق ءارى ناقتى جەتكىزگەنىن ايتادى.
سونىمەن قاتار كانادانىڭ ونتاريو پروۆينتسياسىنىڭ جوعارعى سوتى ءتۇرلى ەلدەردەن نارازىلاردى قولداۋ ءۇشىن جىبەرگەن ميلليونداعان دوللاردى, سونىڭ ىشىندە كريپتوۆاليۋتا جانە ءتۇرلى بانك شوتتارىن بۇعاتتاۋ تۋرالى شەشىم قابىلداندى. شوتتاردى بۇعاتتاۋ وتتاۆا تۇرعىندارى مەن بيزنەسمەندەردىڭ تالاپ-ارىزى نەگىزىندە قابىلدانعان. ادۆوكات پول چامپتىڭ سوزىنە قاراعاندا, مۇنداي شارا كانادالىق سوت ءىسى تاريحىنداعى العاشقى شەشىم بولعان.
پرەمەر-ءمينيستردىڭ ورىنباسارى كريستيا فرەلاند دۇيسەنبىدە وتكەن ءباسپاسوز ءماسليحاتىندا بانكتەر نارازىلىقتارعا قاتىسى بار كەز كەلگەن ادامنىڭ جەكە شوتىن ەشقانداي سوت شەشىمىنسىز بۇعاتتاي الادى دەپ مالىمدەدى. ول سونداي-اق كانادانىڭ «تەرروريزمدى قارجىلاندىرۋ» ەرەجەلەرىن كەڭەيتىپ, وعان كريپتوۆاليۋتا مەن كراۋدفاندينگ پلاتفورمالارى دا قوسىلاتىنىن حابارلادى.
حاكەرلەر وسىعان دەيىن GiveSendGo كراۋدفاندينگ پلاتفورماسىندا جۇك كولىگى جۇرگىزۋشىلەرىن قولداۋ ماقساتىندا جالپى قۇنى 8,4 ميلليون دوللار بولاتىن 93 مىڭ قايىرىمدىلىق تولەم كەلىپ تۇسكەنىن جاريالاعان.
ەل ۇكىمەتىنىڭ توتەنشە جاعداي جاريالاۋ تۋرالى شەشىمىن سىناعاندار دا بار. كانادانىڭ ازاماتتىق بوستاندىقتار قاۋىمداستىعى بۇل قادام ەلدەگى دەموكراتيا مەن ازاماتتىق بوستاندىققا قاۋىپ توندىرەدى دەگەن پىكىردە.
كەيبىر ساراپشىلار جەرگىلىكتى توپتىڭ قالىپتى نارازىلىق اكتسياسىنىڭ حالىقارالىق قوزعالىسقا ۇلاسىپ, قوعام تۇراقتىلىعىنا ۇلكەن قاۋىپ توندىرۋىنە Facebook-ءتىڭ دە ۇلەسى بار دەپ ەسەپتەيدى. كراۋدفاندينگ جاريالاپ, حالىقتان اقشا جيناۋ, ءتۇرلى حەشتەگتەر ارقىلى وقيعانىڭ ساياسي سيپاتىن ارتتىرىپ جىبەرگەندەر بار دەگەن دە پىكىر ايتىلدى.
دەسە دە, كوپتەگەن سىني پىكىرگە قاراماستان, باقىلاۋدان شىققان شەرۋدى ۇكىمەت پوليتسيا كۇشىمەن تاراتۋعا شەشىم قابىلداپ وتىر.
